Sakialluut ajoraluartumik suli nappaataavoq kalaallinik eqquisoq sakkortuumik.
Nappaatip akiorneqarnissaanut aningaasanik pivugut kisianni sooruna nappaat nunatsinni suli atuuttoq?
Kapuuisarnissagut qangatut sissuertigiunnaarsimarpasippagut. Tamannalu pigajuttarpoq sunaluunniit nappaat suujunnaarsivinneqaleraangat. Kisianni soorlu takuneqarsinnaasutut pingaaruteqarluinnarpoq kapuuinerit ingerlatiinnarnissaat, iluatsitsisoqartarmammi kikkut tamarmik kapoorneqarpata.
Nunarsuarmi nunat imminnut qalligaluttuinnarput, taamaattumik Asiamiit, Afrikamiit nunarsuullu sinneraneersunik nunatsinniittoqartarpoq aamma nunanit avannerlerneersunik EU-meersunillu nunatsinniittoqarpoq taakkulu tamarmik nappaat nassariaannaavaat.
Sipaarnissaq pillugu nappaatinut kapuuinissaq sallerpaatinneqarunnaartarpoq soorlu eqqarsaatigalugu sakialluut, nappat nunarsuup sinnerani tamarmi atorneerukkiartormat.
Erseqqissartuartariaqarparpullu kapuuinerit sipaarutigineqanngisaannassammata.
Naalagaaffiit Peqatigiit aamma iliuuseqalerput
Nunarsuarmi naalagaaffinni siuttut Naalagaaffiit Peqatigiinni ataatsimiissutigeqqammerpaat nunarsumi ataatsimoorlutik sakialluut akiorniarlugu. Ataatsimiinneq tamanna pivoq New Yorkimi Naalagaaffiit Peqatigiit Ataatsimeersuarnerannut atatillugu. Taanna ataatsimiinneq sakialluut akiorniarlugu ataatsimiinnerni perngaataavoq. Nunarsuarmioqatigiit anguniarpaat nunarsuarmi tamarmi sakialluut nungussimassasoq 2050-mi.
Taamatut anguniagaqartunut ilannguteriarta.