Folketingimi Kalaallit Nunaannilu ullumi ataatsikkut oqaluuserineqarpoq eqqartuussiveqarnermut inatsit. Ilaatigut Danmarkimi DNA-registerimut isersinnaalissaagut, ajortuliortut DNA-vinik tigusisinnaalissaagut, tamatumuunalu inatsisitigut isumannaatsuunissaq qaffassarneqassaaq. Aamma uppernarsaasersuisarneq pitsanngorsarneqassaaq.
Tamanna atorneqarsinnaassaaq meeqqanut kinguaassiutitigut kanngutsaattuliornissap pinngitsaaliinissalluunniit unitsinnissaanut.
Kinguaassiutitigut kanngutsaattuliortarneq oqaluttuaannanngortittariaqarmat.
Aamma qularnaartariaqarparput meeqqanut kinguaassiutitigut kanngutsaattuliortoqarsimatillugu unnerluussinerit tunuartinneqartannginnissaa. Taamaattumik unnerluussisoqaraangat pinngitsoorani MISISSUISOQARTASSAAQ aamma taamaattumik kaammattuutigissavarput danskit naalagaaffiata Kalaallit Nunaanni politiinut ikorfiinissaa, aningaasatigut nukitsigullu inatsit taamattoq malinneqartaleqqullugu.
Suleqatigiissitsisuni isumaqarpugut inatsit taanna nammineq inatsisiliorluta malitseqartittariaqaripput kinguaassiutitigut kanngutsaattuliortarnerit piffissaq sivisooq isigalugu suliniarfigisinnaajumallugu.
Soorlu qulakkeertariaqarparput meeqqat 15-t inorlugit napparsimavimmi paasineqarpata nappaatipalaartut – imaluunniit naartunaveersaatinik aallertut – oqaloqatigineqartarnissaat.
Oqaloqatigiinnerit peqqinnissaqarfiup sulisuinit ingerlanneqartariaqarput, peqqissaasunit aamma allanit pikkorissareersimasunit. Aama oqaloqatigiinnerni paasissutissiissutigineqarsinnaasariaqarput meeqqap sumut qanorlu innersuunneqarsinnaanersoq kissaatigippassuk kinguaassiutitigut kanngutsaattuliortoqarsimaneranik nalunaaruteqarnissaq, angajoqqaavi akuersiteqqaanngikkaluarlugit. Aamma meeqqat tamanna pisuussutiginngisaannarpaat.
Pinaveersaartitsineq aningaasaliiffigineqarli
Soorlu takoreeripput atisaqaratik assilitissimasunik siammarterisarnissamut inatsit sukaterneqartoq aamma kissaatiginaraluarpoq sakkortuumik takutissallugu meeqqanut kinguaassiutitigut kanngutsaattuliornerit akuerineqarsinnaanngillluinnartut ilaatigut malitseqartitsilluni inatsisiliornikkut aamma peqqinnissaqarfimmi periutsinik allanngortitsinikkut.
Taamaattumik Naalakkersuisut kaammattorusuppagut meeqqanik nappaatipalaartunik, naartunaveersaartinik piniartunik imaluunniit naartusunik / naartuersikkusuttunilluunnii oqaloqateqartalernissaq qularnaaqqullugu. Taamaasilluta meerartagut inuusuttagullu paarilluarnerulissagaluarpagut.
Aamma qularnaartariaqarparput Peqqinnissaqarfimmut aningaasaliisoqartarnissaa qularnaarumallugit oqaloqatigiittarnissat taamaattut aamma soorlu peqqissaasunik ilinniartitsinissamut atugassanik imaluunniit ilinniarsimasut allat meeqqanik oqaloqatiginnittalernissaat angujumallugu pisariaqarpat aamma video atorlugu.
Isumaqarpugut aamma atoqatigiittarneq pillugu ilinniartitsineq qularnaartariaqartoq app-iliornikkut, atuarfinni akullerni annernilu atuartut meeqqat atugassaannik immaqaluunniit DVD imaluunniit qarasaasiakkut atorneqarsinnaasunik ilinniartitsissutinik sanaartornikkut tamanna ingerlanneqarsinnaavoq. Taamaasiornikkut aamma atuartitsineq ingerlassinnaavarput aamma paasissutissiissutigalugu kinguaassiutitigut atoqatigiinneq peqqinnartoq suunersoq, killiliisarnissaq il.il. ilumoorukkutsigu kinguaassiutitigut kanngutsaattuliornerit ikilisarnissaat qularnaarlugulu iliuuseqarasuartarnissat. Siunnersuuteqarnitsitut meeqqanik oqaloqateqartarnerit aallartinneqarpata meerartagut inuusuttagullu illersorsinnaanerulissavagut kanngutsaattuliorfigineqarnissaannut.
Periarfissamut nutaanut DNA-nik katersisalernissamut ilanngukkaanni taava maannakkut atuuttumi inatsimmi ajornarunnaassaluarpoq qularnaarneqassagaluarlunilu pinerlussimasut tigusarineqartarnissaat, kiisalu sukkasuumik pitsaasumillu nalunaarsorneqartalernissaat, taamaattumik uangutsinniik ersarissumik nalunaarutigissavarput – inatsisiliortunit – kinguaassiutitigut ukiuni taamannani kanngutsaattuliortarsimanerit nungutinneqartussanngortut.