Ullumi innarluutilinnut ikorfartuisarnissamut inatsit siullermeerlugu oqaluuserissavarput taamaattumik innarluutilinnut taakkulu ilaqutaannut ullumi ulloq oqaluttuarisaanermut pingaaruteqarpoq.
Nammineq angummut ullut tamarluinnaasa ullup unnuallu infantil autismeqartumut aleqatut qullilinngitsoorsinnaanngilanga.
Angajoqqaat ilaquttallu nunamut allamut nuuttariaqarsimasut
Qularutissaanngilaq ukiorpassuarni Kalaallit Nunaanni innarluutilittagut iluamik paarisinnaasimannginnatsigit, pineqaraluarpata inunnguutigalugu innarluuteqarneq imaluunniit inuit inuunerup ilaani innarluuteqalersimasut aamma pineqaraluarpata tarnikkut imaluunniit timikkut innarluutillit.
Tamatuma kinguneranik amerlaqaat innarluutilinnut ilaqutaasut Kalaallit Nunaat qimallugu aallaannartariaqarsimasut. Inuit asasat inuunerat misileraatigineqarneq ajorpoq ajoraluartumillu ulloq manna tikillugu taamaassimavoq.
Sullissinerit sivisoorsuarmik pisarsimapput, ilinniarsimasunik ikiorneqarnissaq ajornarsimavoq, kommunit Namminersorlutillu oqartussanut utertitaaqattaarnerit pisarsimapput, atuarfiit, misissuinerit, inunnik isumaginninnermut siunnersortit aamma peqqinnissaqarfik angajoqqaanit nukittoqisunit uteqattaarfigineqartuartarsimapput aamma qatanngutinut paarsisunulluunniit inunnut innarluutilinnut. Ilugnersoraluarlutik iluamik ikiorneqarsinnaasarsimanngillat imaluunniit attaveqatigiinneq amingartarsimavoq pisuni amerlasoorpassuarni.
Taamaattumik angajoqqaat nukittuut nuuttariaqartarsimapput – nukissaqarallartillutik – Danmarkimut, iluamik ikiorneqarumallutik. Inuiaqatigiittut annaasaqartaqaagut aamma taamaattoqartussaanngilluinnaraluarpoq.
Taavami inatsit iluaqutaassava?
Naamik, nammineq kisimi iluaqutaanavianngilaq.
Taamaattumik Suleqatigiissitsisuni Inatsisartunut saqqummiussinitsinni pissutsit arlallit tikkuapagut kattuffinnit angajoqqaat ilaasortaaffiinit aamma innarluutilinnut qanigisaasut ujartorneqartut pillugit aamma taamaattumik aningaasartaqartitsnissaq ujartorparput soorlu inunnik isumaginninnerup iluani allani taamaattoq, nukinnik pisariaqartitsisoqartillguu aamma inunnik immikkut ilinniarsimasunik pisariaqartitsisoqartillugu il.il.
Aamma isornartorsiorparput kommunit kisimik pitsanngorsaatinniarsarineqarneri, annilaanngatigaarput pisuutitassarsiorluni uteqattaartitsiuarnissaq inatsisip siunertaa naapertorlugu ingerlatsinissaq suleqatigiissutigineqarsinnaanngippat.
Namminersorlutik Oqartussat ammaattariaqarpaat avataaniik sulisussarsiorsinnaanissaq, akissarsiassallu pitsaasut qularnaarlugit, tassa sulisussat iluamik akissarsiaqartinneqarnissaat qulaarnaarlugu aamma qularnaarlugu inunnik isumaginninnerup iluani immikkoortortaqarfiit pitsaanerusumik suleqatigiissinnaanngornissaat taamatullu eqaannerusumik.
Ilinniarsimaasunik sulisoqalernissarput qularnaartariaqarparput iluamik misissuinernik ingerlatsisinnaasunik, ikiorsiissutit pissarsisariaqarpagut aamma piginnaanngorsaqqiisarnissaq siuarsagassarujussuuvoq sualummik sineriatsinni.
Aamma isornartorsiorparput ilaquttat isumasiorneqarneq ajornerat, piginnaanngorsaqqinnissanut ikiorsiisoqartannginnra, kajumissaarisoqartannginnera aamma ilinnialernissamut kiisalu oqittunik sullivissanik nassaarniartoqarneq ajornera innarluutilittatta iluaqutigilluarsinnaasaannik. Atuarfeqarfik, Peqqinnissaqarfik Inunnillu Isumaginnittoqarfik ilungersorujussuartinneqareerput aamma taamaattumik neriuppugut partiit tamarmik suleqatigiillutik immikkoortut pineqartut taakku marluk iluarsartuukkumaaraat.
Iluarsisariallit taajugassagut amerlaqaat.
Inatsit nammineq naammanngilaq kisianni ajunngitsup tungaanut alloriarneruvoq.