Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:

Naalakkersuisunut apeqqutit:
1.  Nuummi kollegani siniffissat 218-t, Aasianni 32-t, Ilulissani 70-t, Sisimiuni 72-t, Qaqortumilu kollegiani siniffissat  74-t pilersaarusiorlugit naammassilerunarput, takuuk akissut § 37 naapertorlugu apeqqummut 114-mut, 2019-mi. Taakku ukioq manna sanaartorneqarnissaat pilersaarutaavoq aamma aningaasaliissutissat aningaasanut inatsisimmi immikkoortinneqarnikuupput.

Qulaani sanaartornissamut suliariumannittussarsiuussinisssamut atortussat qaqugu piareerneqarumaartut Naalakkersuisut naatsorsuutigaat aamma sanaartornerup qaqugu aallartinneqarnissaa Naalakkersuisut naatsorsuutigaat?

2.  Kollegiani inissarsiortunut inissaqartikkumallugit inissianik attartornernut 2015-mi, 2016-mi, 2017-mi kiisalu ajornanngippat 2018-mi  Namminersorlutik Oqartussat qassinimmita aningaasartuuteqarsimappat? Ilanngullugit taarsiullugit inigisariaqakkanut?

3.  Namminersorlutik attartortitsisartunit inissamik attartorneq agguaqatigiisillugu  qanoq akeqartarpa, KAF attartortariaqarsimatillugu aamma ilinniartoq inigisaminut KAF-imut qanoq akiliisarpa?

4.  Ilinniartut ilinniarnersiutisiallit qassit ullumikkut  inissartik nammineq isumaginikuuaat?

5.  Namminersorlutik Oqartussanit illoqarfinni, Nuummi, Ilulissani, Aasianni, Qaqortumi Paamiunilu ilinniartut qassimmita inissaminnik utaqqisut allattorneqarsimappat?

6. Suliamut tunngasunik allanik soqutiginaatilinnik Naalakkersuisut paasissutissiisinnaappat?

(Inatsisartunut ilaasortaq, Tillie Martinussen, Suleqatigiissitsisut)
Tunngavilersuut:
§ 37 naapertorlugu apeqqutikka nr. 114-2019 malitseqartillugit matumuuna kollegianik sanaartornissamut tunngasunik apeqquteqaqqippunga. Malunnarpoq immikkoortumi aporfeqartoq aamma pisariaqartinneqarluinnarpoq sanaartornerup pisama aallaartinneqarnissaa.

Kingullermik apeqqutinnut akissutini takusinnaavarput ukiup matumap ingerlanerani sanaartugassanut immikkoortunut pilersaarutit agguaanneqassamaartut, taamaakkaluartorli apeqquteqarusunnarpoq sualummik malunnarmat kollegiat sanaartorneqarnavianngitsut naak aningaasaliisoqareernikuugaluartoq.

Ilinniartorpassuit uniinnartariaqartarput, aallartinngitsoortarput imaluunniit ilinnialernissartik imaluunniit ilinniarnermik ilaa kinguartittariaqartarpaat kollegiani inissaqannginnertik pissutigiinnarlugu. Tamanna qangarsuarli ajornartorsiutaavoq, kisianni allaanngilaq annerusumik iliuuseqartoqarneq ajortoq.

Pissutaaqataasinnaavoq ataatsikkut sanaartukkat amerlavallaalinnginnissaannut sissuerneq.

Kisianni Namminersorlutik Oqartussat ataanni nuna tamakkerlugu sanaartortartut qanoq sanaartorsinnaatiginerat, suliassat qanoq amerlatigineri il.il. pillugit  malinnaasoqanngippat kiisalu sulisussarsiarineqarsinnaasut qanoq amerlatigineri il.il. ilisimaneqanngippata taava eqqoriaaqattaarnerit kisimik pisartussaassapput.

Eqqoriartariaqanngitsorli tassaavoq illoqarfinni pisariaqartitsinerpaaffiusuni kollegialiortiternissanut aningaasaliissutit atorneqanngitsut amerlalluinnarmata naak sanaartugassat pisariaqartinneqarluinnaraluartut ilinniartut inissaqaqqullugit, ilinniarnermik nalaani.

Taamaattumik eqqumiippoq sanaartorneq eqqarsaatigalugu annerusumik susoqarpasinngimmat taamaattumik aamma tamatumunnga suut pissutaanerat paasissallugu pingaaruteqarpoq, ataatsikkut sanaartugassaqarpallaarnerup pissutaasinnaanerata saniatigut.

Naapertuilluanngitsuliornertut isigeqqajaanarpoq mittarfiliornissat pilersaarusiorneqarmata sulisussat avataaneersut nunatsinneersullu isumalluutigisussanngorlugit tamannali atuutinngilaq kollegialiornissat eqqarsaatigalugit.

Aamma soqutiginarpoq tusassallugu sanarfinermut sanaartornermullu aningaasaliissutinut atunngitsoorneqartunut Naalakkersuisut namminneq  isumaat tusassallugu aamma soqutiginarpoq tusassallugu qanoq iliorluta sanaartugassat pisariaqartinneqartut sanaartulersinnaannerigut. Naggataatigullu minnerunngitsumik soqutiginarpoq tusassallugu kollegianut utaqqisut qassiunersut aamma ilinniartut qassit  iluatsitsillutik ullumikkut nammineq inissartik isumagisarneraat. Paaserusunnarpoq takorusunnarmat ilinniartut qassit ilumut inissaminnik pisariaqartitsigaluarnersut, naak ilaatigut immaqa taakku inissaminnik nassaarsinnaasaraluartut.

Kisianni ilinniartut iluatsitsillutik nammineq inissarsisartut tunngavigalugit takuneqarsinnaanngilaq ilumut ilinniartut eqqarsaatigalugit tamanna naapertuuttuliornerunersoq aamma takuneqarsinnaanngilaq kollegiani inissaqartitaannginneq ilinniarnermik unitsitsiinnartariaqarnermut pissutaaqataanersoq. Taamaakkaluartorli soqutiginarpoq tusassallugu pissutsit ullumikkut qanoq innersut ikerinnakkut ilinniarunnaartartut amerlassusaannut neleqqersuussisinnaajumalluta kiisalu inissaqarniarnermut tunngatillugu kisitsisinut.

Aamma tusassallugu soqutiginassaaq Naalakkersuisut sanaartugassat, titartaanerit il.il. qanoq pilersaarusiussamaarneraat il.il. ukiuni aggersuni.

Taamatuttaaq aamma soqutiginarpoq tusassallugu, tigussaasumik, sanaartugassat aningaasalerneqareersimasut qanoq siuartinneqarsinnaanersut kiisalu utaqqisut allattorsimaffii aamma immikkoortumi immikkut aningaasartuutaasariaqalersut suunersut, sanaartukkat ataatsikkut aallartinneqartu amerlavallaarneri  pissutaalluni ajornartorsiortoqarmat aamma sulisussaqarniarnermut sunniuteqartumik.

Apeqqutit akeqquneqarput ullut qulit iluanni.