Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:
Naalakkersuisunut apeqqutit:
- Innarluutillit pillugit inatsisissaq iluarsisaq Naalakkersuisut tusarniutiginikuuaat. Naatsorsuutigisinnaanerlutigu Innarluutillit pillugit Inatsisissaq nutaaq 2019-mi Ukiakkut Ataatsimiinnermi saqqummiunneqarsinnaassasoq?
- Tamanna siunertaanngippat taava suut pissutaappat Naalakkersuisut innarluutillit pillugit inatsissamut siunnersuummik tulliani ataatsimiinnissamut saqqummiussisinnaannginnerannut?
3. Naalakkersuisut qinnuigaakka naatsumik nassuiaqqullugu Innarluutillit pillugit Inatsisissap siusinnerusukkut inatsisissamut 2017-mi Ukiakkut Ataatsimiinnermi immikkoortoq 20-tut saqqummiunneqartumut naleqqiullugu suut pingaarnertut assigiinngissutiginerai? Ajornanngippat aamma nukiit oqaatigeqquneqarput pissarsiarineqarsinnaasut eqqarsaatigalugit.
(Inatsisartunut ilaasortaq, Tillie Martinussen, Samarbejdspartiet – Suleqatigiissitsisut)
Tunngavilersuut:
Naalagaaffiit Peqatigiit innarluutillit pillugit isumaqatigiissutaat Kalaallit Nunaanni malinneqanngilaq. Amerlaqaat malinneqanngitsut. Aamma taamaannikuuvoq piffisami sivisoorsuarmi.
Taamaattumik Suleqatigiissitsisuni kissaatingaarput innarluutillit taamatullu ineriartornermikkut akorngutillit ullumimut naleqqiullugu politikkikkut pingaarnerutinneqalissasut.
Suleqatigiissitsisuni takusinnaavarput siusinnerusukkut siunnersuutaareersoq kattuffinnut tusarniaassutigalugu nassiunneqarnikuusoq aamma Inatsisartuni siullermeerneqarnikuusoq.
Tusarusupparput tulliani ataatsimiinnissami siunnersuut taanna oqaluuserineqassamaarnersoq aamma nassuiaanneqarusuppugut tamanna pissanngippat suna pissutaanersoq.
Nalunngisatsitut Naalakkersuisup innarluutillit pillugit inatsisip kinguaattoornera utoqqatsissutiginikuuaa oqarluni suliniutit nutaat ilanngunneqarnissaat pissutaasoq.
Imaassinnaavoq suliniutit taakku nutaat pitsanngoriaataarujussuassamaartut siunnersuummut saqqummiunneqareersumut. Pitsanngoriaatit ima angitigisimarpasipput allaat inatsit pisariaqartinneqarluinnartoq ukiup aappaa avillugu kinguartinneqartariaqarsimalluni.
Ersarillunnartumik nassuiaqquarput pitsanngoriaatit suut pineqarnersut.
Suleqatigiissitsisuni alianartutut isigaarput inatsit taama pingaaruteqarluinnartigisoq Naalakkersuisut sulinerannit pingaarnerutinneqarsimanngimmat, inuimmi innarluutillit qanorluunniit ukioqaraluarunik pisinnaatitaaffeqartariaqarput periarfissaqaannaratik aamma qularnaartariaqarpoq pisariaqartitartik naapertorlugu ikiorneqartarnissaat. Aamma taamaappoq innarluutillit ilaqutaat eqqarsaatigalugit.
Taamaattumik apeqqutikka apeqqutigaakka.
Apeqqutit akeqquneqarput ullut qulit iluanni.