Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:
Naalakkersuisunut apeqqutit:
Konto pingaarnermut 84.40.15-mut aningaasaliissutissatut illuartinneqarsimasunu tunngatillugu suliariumannittuussisarneq qanoq sivisutigisarpa eqqarsaatigalugit Nuummi, Aasianni, Qaqortumi, Sisimiuni Ilulissanilu kollegialiortiternissat kiisalu Paamiut kollegiat pioreersut iluarsaannissaat eqqarsaatigalugu?
2. Naatsorsuutigisinnaavarput konto pingaarnermi 84.40.15-mi aningaasat immikkoortinneqarsimasut atorlugit sanaartornissat iluarsaassinissallu pilersaarusiorneqareersimasut aallartinneqarnissaat? Taamaassimappat sanaartornerit aallartinnissaasa qulakkeernissaasa tungaanut piffissaq qanoq sivisutigisoq ingerlaqqaassava? Taamaattoqarsimanngippat sanaartornerit aallartinnissaasa qulakkeersinnaannginnerat sumik pissuteqarpa?
3. Naalakkersuisut isumaqarpat siunertaqartoq ukiup aningaasaliiffiusup aallartinnerani 71 mio. koruunit atorneqarsimannginnerat pissutaalluni pilersaarusiortoqarsimannginnera naak illoqarfinni ilinniarfiusuni kolligiani inissaqannginneq pissutaasaraluartoq ilinniartorpassuit aallartissinnaasannginnerannut, ingerlaqqissinnaasannginnerannut imaluunniit ilinniakkaminnik naammassinnissinnaasannginnerannut?
4. Aningaasat atorneqarnissaat qulakkeerumallugu immikkoortumut pilersaarusiornerit qaqugu naammassisussatut Naalakkersuisut naatsorsuutigaat taamaasilluni kollegiani inissat piareersinnaaqqullugit? Suliap tamatumap naammassineqarnissaa qaqugu pisussatut Naalakkersuisut naatsorsuutigaat? Tusagassiutini upernaaq tusarparput, immikkoortumut pilersaarut novemberimi naammassineqassamaarpaluttoq. Neriorsuut tamanna sumut killippa?
5. Suliamut tunngasunik allanik soqutiginaatilinnik naalakkersuisut paasissutissiisinnaappat?
(Inatsisartut ilaasortaq, Tillie Martinussen, Suleqatigiissitsisut)
Tunngavilersuut:
Amerlaqaat ilinniarnerminnik unitsitsiinnartariaqartut, aallartinnissaminnik unitsitsiinnartartut imaluunniit ilinniarnerminnik imaluunniit ilinniarnermik ilaanik kinguartitsisariaqartartut, kollegiani inissaminnik tunineqarsinnaannginnertik pissutigalugu. Ajornartorsiut tamanna qangali ilisimaneqarpoq, kisianni Suleqatigiissitsisuni paasivarput kollegianik pisariaqartinneqaraluaqisunik sanaartornissaq kinguartikulaneqartoq.
Aamma peqataanik paasivarput pilersaarutit pingaarutillit arlallit ukiumiit ukiumut nuunneqartarsimasut nassuiaatigineqartarluni; Aningaasanut Inatsimmi “qanganitssami” angumerineqarsinnaasimanngitsut, taamaattumillu pilersaarutit ukiup tullianut nuunneqartariaqarsimasut.
Sanaartornerillu aallartinneqanngitsoorlutik.
Assorsuaq tamanna eqqumiigaarput, taamaattumik Naalakkersuisunut arlalinnik apeqquteqarpugut. Pingaaruteqarpoq misissussallugu suut aporfiit piussutigalugit sanaartornerit aallartinngitsoorneqartarsimanersut.
Nuummi kollegiani katillugit inissat 218-nik, Aasianni 32-t, Ilulissani 70-t Sisimiuni 72-t, Qaqortumilu 74-t 2019-mut Aningaasanut Inatsimmeereerput.
Malunnarporlu pineqartut 2018-miit 2019-mut nuuginnarneqarsimasut.
Inissat taakku pisariaqartinneqartorujussuupput; ilinniartunit.
Illoqarfinni kollegialiorfigineqartariaqaraluartuni kollegialiornissamut aningaasaliissuterpassuit atorneqanngitsoorlutik uninngaannarput, taakkumi atorlugit ilinniartut ilinniarnerminni inissaqarsinnaanissaat qularnaarneqartussaagaluarpoq.
Ajornartorsiut ilisimanngikkallartillugu siammerterinissaq isumagineqarsinnaanngilaq.
Naapertuilluarnerunngitsutut isumaqarfiginarpoq timmisartoqarfiliassat pilersaarusiorneqarsimammata ungataaneersunik sulisulersornissaq isumalluutigalugu taamatullu nunatsinneersunik, taamaattorli kollegialiortiternerit eqqarsaatigalugit assigusumik periuseqartoqarumanani.
Aamma tusassallugu soqutiginarpoq kollegianut pisariaqartinneqaraluartunut aningaasaliissutit atunngitsuukkat Naalakkersuisut qanoq isumaqarfigineraat kiisalu taakku pisariaqartinneqartut sanaartorneqalernissaat qanoq qularnaarneqarsinnaanersoq.
Aningaasanut Inatsimmi aningaasat atorneqanngitsoortut, illuliassatut pilersaarutigineqareersunut atugassiissutit ilanngtereerlugit ikittuinnaanngillat.
Aningaasanut Inatsit atuaqqissaaraanni ilaatigut allassimavoq naliginnaasumik sanaartornermi ineriartortitsisoqarsimasoq kollegianut atugassanik taamaattut sukkasuumik piviusunngortikkumallugit. Kisianni utaqqisaajuarallarput.
Paasissallugu souqutigaarput qanoq tamanna pisinnaanersoq, inissat pisariaqartinneqaqimmata.
Ilinnniartut ilaasa nammineq inissarsinissartik isumagisassajunnarsivaat.
Kisianni soorlu nutaamik illuliornermi akit qaffakkiartorput nunami sulisussaaleqineq pissutaalluni – qularnanngilarlu tamatumap akit suli qaffatsinnerujumaarai – taamatullu aamma illoqarfiit ilaanni inissianut naliginnaasumik attartortittakkanut utaqqisarneq sivisoorujussuuvoq, taamaattumi, SU-qarluni sunngiffimmilu sulisarluni nammineq inissarsinissamut periarfissat annerpaajunngillat.
Taamaattumik sumiiffiit ilaanni tamanna aamma ilinnialersartut ikerinnakkut uniinnartarnerannut pissutaaqataassaqqooqaaq.
Apeqqutit akeqquneqarput ullut qulit iluanni.
Tillie Martinussen
Samarbejdspartiet – Suleqatigiissitsisut