Ilinniarnersiutisiat iluarsartuunneqarnerat pillugu nalunaarut Siumup, Demokraatit Atassutillu akuerinikuusaat naapertuuttumik atuutinngilaq.
Kalaallit Danmarkimi ilinniartut nunaminnut akiliunneqarlutik angalasarnissaminnik arsaarneqarput, ilinniarnermik aallartinneraniik qaammatit 15-t siulliit iluanni allamik ilinnialersimanertik pissutigiinnarlugu.
Nalunaarut atuutilermat ilinniartut qitornallit nunartik asasartik tikeraarsinnaajunnaarpaat.
Taavami ilinniartut qitornaat angerlaqqikkunik qanoq misigisimassappat, nunaminnut ukiorpassuarni takusimanngisaminnut – immaqaluunniit takusimanngisaannakkaminnut?
Ilinniartut nunaminnut attuumassuteqarnerat paarilluartariaqarparput, qularnaarlugulu angerlartarsinnaanissaat suliffittaarlutillu aamma angerlarusuttarumaartut nunani allani ilinniarlutik aallartikkunik. Atorfissaqarteqaagummi.
Danmarkimi nunanilu allani ilinniartut kalaallit eqqarsaatigalugit ajornartorsiutit massakkut piusut arlallit suliarisariaqarpagut:
Akiliunneqarlutik ukiumut ataasiarlutik angerlartarsinnaaneranni partiit qulaani taasat allannguivigisimasaat atorunnaarsinneqartariaqarpoq.
Ilinniartut ilaquttaminnut attaveqartuarnissaat qularnaartariaqarpoq, ilinniarnerminnut atatillugu sulisinnaasariaqarput nunatsinni inuutissarsiorneq ilikkartariaqaramikku aamma pisunut malinnaanissaminnut periarfissaqartuartariaqaramik.
Ilinniartuutigut Danmarkimi najugaqartutut nalunaarsorneqalertarput nunatsinnit ilinniarnersiutisiaqarunnaaraagamik, taamaatullu amerlanerit suli annaajortorpagut.
Tamatuma saniatigut nunani allani ilinniartut nunatsinnit ilinniagaqarnersiutisiaqartinneqanngikkunik qinersinerni taasisinnaatitaanngillat. Taamaattumik arlallit aamma qinersisinnaatitaanertik annaasarpaat taamaasillutillu nunamut angerlarfissaminnut sunniuteqaqataasinnaajunnaartarput.
Ilinniartuutitta nunatsinnut attuumassuteqarnissaat piiarparput. Tamanna ajorluinnarpoq.
Nalunngisatsitut ilisimasanik annaasaqartuarpugut kiisalu inuit nunatsinnit nunanut allanut nutsertuarput. Tamanna illuatugaanut saatittariaqarparput.
Suleqatigiissitsisuni taamaattumik isumaqarpugut nalunaarut allanngortinneqartariaqartoq, tassungalu atatillugu Folketingimi ilaasortaalerumaarnissaq Danmarkimi kalaallit ilinniartut qanimut oqaloqatigiuarnissaannut atortariaqarparput, qanorlu iliorutta tamarmik angerlaqqittalernissaat qulakkiissanerlugu pilersaarusioqatigiiffigisariaqarparput. Atorfissaqarteqaagummi.
Ilinniartut aallartinnerminnik qaamatit 15-t siulliit KINGORNA ilinniakkamik allamik aallartitaqartut allaat nunatsinnukaqqusaajunnaarput.
Ilinniartut akiliunneqarlutik angerlartarsimagaluartut akiligassarpassuarnik nassinneqartaleriataarput, akilersinnaanngisaminnik aammalu kalerrinneqaqqaaratik.
Allannguineq ilinniartorpassuarnik ilisimaneqarsimanngilaq, ilinniartunut siunnersuisut allaat tamanna kingusinaarlutik paasisimavaat.
Aaqqittariaqarpoq!
Kalaallit Danmarkimi ilinniartut piisaarlutik inuunngillat naak politikeritta ilaat taamatut oqalukkaluartut. Nunatsinni kalaallit ilinniartut kollegiamiinnermut akiliutigisartagaannut naleqqiullugu Danmarkimi kollegiamiinnermut akiliutigineqartartut qaffasinnerujussuupput. Tamatuma saniatigut ilinniartorpassuit kulturi nutaaq ilinniaqqaartariaqartarpaat aamma ilisimasassatigut piumasaqaatit qaffassartariaqartarput malinnaaniaraanni illinniagarlu naammassillugu. Peqataanik sorpassuit unamminartut puttussuutilersarput
angerlaqqinnialeraangata; nunatsinnut attuumassuteqarnermik amiakkunngua tigummiinnariarlissuk. Aamma qularnaariartigu taakku oqaloqatigilluarnissaat.
Danmarkimi ilinniartuugaanni angerlarserneq aamma magiaasaqaaq. Utertikkusoqaagullumi.
Taamaattumik allannguutit piviusunngortinnissaat qularnaartariaqarparput. Piaarnerpaamik.