Nunami tamarmik meeqqat atuarfii pitsanngorsartariaqarput nunap ungataaniit ilinniartitsisunik atuinissaq pineqaraluarpalluunniit, inuutissarsiutit atuarfiullu suleqatigiinnerunissaat pineqaraluarpalluunniit imaluunniit pineqaraluarpat meeqqat makittarnissaat atuariartorlutillu.
Meeqqat atuarfiata pitsaassusaa massakkut akuerineqarsinnaanngilaq aamma meeqqat atuartut ilisimasaasa qaffasissusaat meeqqat atuarfiat qimakkaagamikku.
Nalunaarutit naatsorsueqqissaarnerillu ukiuni kingullerni takutippaat nukarlerni ingerlalluarsimangaanni aamma angajullerni ingerlalluartoqartartoq. Ilinniarluarsimalernissamut pisariaqarpoq iliuuseqarasuartoqartalernissaa. Soqutiginassagaluarpoq takussallugu aamma pissutsit tamakku meeqqat atuarfianniit ilinnialernissamut piareersarfinnut ikaarsaarnermi atuuttarnersut imaluunniit sivikitsumik ilinniarnermi aamma sivisuumik ilinnialernermi. – Tassa meeqqat ilinniarfimminni ingerlalluartarpat meeqqat atuarfiani nukarlerni ingerlalluarsimagunik?
Iliuuseqapallattarnerit iluaqutaasut paasiniarlugu pisariaqanngilaq misissuinerpaalussuarnik takoqqaarnissaq pineqaraangata meeqqat inuusuttullu siunissaat. Atortussat pigereerpagut maannakkullu qularnaaginnartussaavagut meeqqanut inuusuttunullu iliuusissat ataqatigiissut.
Inuttut aningaasarsiornikkullu ajornartorsiutit pissutaaqataapput meeqqat inuusuttullu amerlaqisut meeqqat atuarfianni ingerlanerluttarmata, aamma atuartitsinerup pitsaassusaa taamatullu ilinniartitsisut ilinniartitaanerat aamma pissutaaqataasunut ilaavoq. Taasakkali tamarmik ajornartorsiutaapput ilisimaneqarluartut.
Aningaasarpassuit atortarpagut inuusuttut ingerlalluartinniarsarinerigut meeqqat atuarfiani atuarunnaareernerisa kingorna, malunnarporli aningaasat kukkusumik atortarigut. Pingaaruteqarluinnarpoq meeqqat meeqqat atuarfiani soraarummeersimallutik unittarnissaat sulinerminni atorsinnaasaminnik imaluunniit ilinniarusutaminnik qinaasinerminni. Inuutissarsiortut ilinniarluarsimasullu oqartarput ilinniarnerminnut atatillugu sungiusaatigalugu sulisussanik ilinniartunillu allanik ilinniarluarsimasunik amingaateqartarlutik aamma naammassereersimasunik. Ilinniakkat pitsaassusaat qaffassartariaqarparput ajoqutaasullu unitsipallallugit. Ullumimut naleqqiullugu sukkanerusumik, siunissami uteqqittussaajunnaarlugu.
Naatsorsoruminaappoq sooq Naalakkersuisut ilinniartitsisut kattuffiata inuutissarsiortullu innersuussutaannik piviusunngortitsiniaasaarpallaarnersut imaluunniit sooq ilinniartitsisutut ilinniarsimasunik avataaneersunik amerlanerusunik pissarsiniarniannginnersut tamannami pisariaqarmat. Meerartagut akigaagut kalaaliorusunnersuatsinni tamannalu kialluunniit iluaqutissarsiviginavianngilaa. Soorunami meeqqat atuarfiat aaqqissuunneqarsinnaavoq piginnaanerit tamaasa atorneqartussanngorlugit, nunavissut piginnaaneri aamma avataaneersut piginnaaneri. Aamma ilinniartitsisut ilinniaqqissinnaasariaqarput piginnaanngorsarlutillu. Pisariaqartinneqarpoq taamaallaat sulisut amerlineqarnissaat.
Minnerunngitsumik inunnik isumaginninnikkut politikkimi iliuuseqartoqarnissaa pisariaqartinneqarpoq, pimoorussinngilagut kinguarsaajuarlutalu, pineqaraangata aningaasaliissutissat, pikkorissunik sulisussarsiornissaq aamma inunnik isumaginninnermi atorsinnaasunik periuseqalernissaq. Sooruna Iliuuseqarasuartarnissaq aallartikkusunngikkipput, siusinaarlutalu sakkortuumik iliuuseqartalerluta, tamanna paasiuminaalluinnarpoq. Siunissaq eqqarsaatigalugu akilersinnaanerpaasussaavoq tamanna aamma minnerunngitsumik inuusuttut ilinniarsimasut piginnaaneqarluartullu siunissami nunatsinni sulilerumaartussat eqqarsaatigalugit.
Ilaqutariit meerartallit aamma naartusut, ikiupallattariaqarput, piginnaanngorsartariaqarput aamma inuttut suliniarfigisariaqarput pisariaqartitsippata, sakkortuumik misigisaqarniariartut ajornartorsiuteqaliinnartulluunniit suliniarfigisariaqarput, meeqqat siunissaat pitsaasoq qularnaarumallugu.
Iliuuseqarasuartarneq suliniarfigigutsigu ilaqutariillu meerartallit illersorlualerlugit aamma meeqqat ingerlanerluttunik ilaqutallit, taava siunissami inernerit pitsaasut isummaminnik takkussuutilissapput.
Pingaaruteqarluinnarporli massakkorluinnaq iliuuseqarnissarput aamma pilersaarusiortariaqarpagut ingerlariaqqinnissat inuttut, atuarfimmi, ilinniarnermi aamma kollegiani inissaqarneq eqqarsaatigalugu. Ullumikkut ingerlanerput aningaasarsiornikkut, inuit aningaasaqarnerat eqqarsaatigalugu imaluunniit inunnik isumaginninneq eqqarsaatigalugu akilersinnaanngilaq. Eqqumiittuali aanna sooq najoqqutassat ersarissut atuallakkusunnginnerigut?
Kingullermik IMAK aamma GE politikerinut kusanarluinnartunik innersuussuteqarput, kisianni suli tusarfiginngilarput politikerit suniarnersut. Innersuussutigineqartut ilaasa piviusunngortinneqarnissaat eqqarsaataava?
Soorlu kattuffiit angisuut marluk imaannaanngitsunik itisuumik pineqartunut ilisimasallit eqiiallatsitsisimassagaluartut innersuussutaallu ingerlaannaq piviusunngortinneqarlutik.
Sooruna susoqanngitsoq?
Isumannaatsumik ilinniarnissaq tunngavissinneqartarpoq meeqqat atuarfiani immikkoortorlu pitsanngorsaaviginngikkutsigu ilinniartitaaneq inuutulluunniit ingerlaaserput allanngortinneqarnavianngilaq.
Atungarliuutit kingornuttakkat aatsaat qaangerneqarsinnaapput ilinniagaqarnikkut aamma ilinniarneq aqqutaasarmat nuannernerusumik inuuneqarnissamut, akissarsiarissaarnerunissamut aamma siunissami ilaqutariittut ingerlalluarnerunissamut.
Suniataqarata isiginnaaginnarsinnaanngilagut ukiut tamarluinnaasa meeqqat atuarfianiit angusaqarnerlullutik naammassisartut.
Inuiaqatigiit meerartagullu pitsaanerusumik inuuneqalersittariaqarpagut.