Innuttaasut Eqqisseqatigiinnissamut isumalioqatigiisitaq alla pisariaqartinngilaat, soorlu Ineqi Kielsenip S-meersup siunnersuutaatut taassuma qinigaassaguni tamanna suliniutiginiarmagu.
Innuttaasut pisariaqartinneruaat Peqqinnissaqarfiup pitsanngorsarluarnissaa.
Meeqqat inuusuttullu ulorianartorsiortut pisariaqartippaat inunnik isumaginninnerup ingerlallualernissaa. Innuttaaqatitta innarluutillit massakkorluinnaq pisariaqartippaat sinaakkut ataqqinarnerusumik inuuneqalernissamut periarfissiisut.
Nunatsinni angerlarsimaffeqanngitsut pisariaqartippaat housing-first, angerlarsimaffeqalerusullutik aamma tarnikkut ikiueqqaarnissaq. Innuttaasut imminut toqunnissaminnut qanittut oqarasuaammut saaffiginnissinnaanermik pitsaanerusumik ikiorneqartariaqarput.
Eqqisseqatigiinnissamut Isumalioqatigiisitaq kingullermik iliuuseqarami, isumalioqatigiisitap nalunaarusiaq 10 millioner koruuninik akeqarsimasoq Naalakkersuisunut apuuppaat!
Nalunaarummi iliuusissat arlallit siunnersuutigineqarput 10 millioner koruuninik Landskarsimut aningaasartuutaanerup saniatigut. Iliuusissat arlaannaannuullu innuttaasunut ulloq mannamut iluaqusiinikuunngillat.
Isumalioqatigiisitap nalunaarutaani ilaatigut siunnersuutigineqarpoq Eqqisseqatigiinnissamut Aningaasaateqarfiliortoqassasoq siunertaralugu “sakkuusinnaasunik ineriartortsinissaq aamma katsorsaanermi periusiusinnaasunik ineriartortitsinissaq, innuttaasut katsorsarneqarneranni atorneqartussanik. Tunngaviusumik inatsisitaarnissamut Isumalioqatigiisitaq illusivoq 7,5 millioner koruuninik akilimmik. Illoqarfimmi angerlarsimaffeqanngitsut erloqiffianni aamma innuttaasut inuttut ikiorneqarsinnaanngiffianni tamatumalu saniatigut illuni oquttuni najugaqarfiusumi. Kina ikiorneqarpa?
Isumalioqatigiisitat taamaattut innuttaasunik naapertuuttumik ikorfiineq ajorput, ajornartorsiutiviit iliuuseqarfiginissaannut asuli puigorsaataagaamik.
Paarlattuanik aqqutissanik nutaanik ujaaseriarta, tassani Naalagaaffeqatigut suleqatigalugit ataatsimoorluta iliuuseqarluta, ataatsimoorneq toqqissisimanartoq pilersillugu peqataasut tamarmik iluaquserlugit.
Danmarkimik suleqateqarneq imaanngilaq kalaallit oqaasiinik kulturiannilluunniit tunulliussineq. Naak taamatoq oqalunneq inuit ilaannut tusarneqimmat taasinernik pissarsiviusaraluartoq.
Dankarmi suleqatigisariaqarparput amma ikioqatigiiffigisinnaasagullu paarlattunik ersarissartariaqarpagut. Innuttaasut iluaquserlugit – politikerit qinigaaqqinnissaminnik taamaallaat eqqarsartut iluaquserniarsarinagit.
Danmarki ajortorsuartut isigineqarallartillugu ukiuni 40-ni kingullerni kukkusumik politikkeqarsimanermut akisussaaffeqarnerput nassueritigisinnaanngilarput. Taamaattumik maannakkut politikeriusut aamma sapersimasaminnut akisussaatinneqarsinnaanngillat. Suleqatigiinneruleraluarutta annaasassaqanngilagut.
Paarlattuanik pisoqassaaq. Naalagaaffeqatigiinni suleqatigiinnissamut pitsaasunillu iliuuseqarnissamut periarfissarsuarnik ulikkaarpoq.
Ineqi Kielsen taamaallaat isumaqatigisinnaavara oqarmat akisussaaffik tigusariaqartoq.
“Qanga naapertuutinngittuliortarnerit akuerinngikkallartillugit” ingerlaqqissinnaanngilagut.
Nassuerutigeriartigu ineqarneq, inunnik isumaginninneq, peqqinnissaqarfillu eqqarsaatigalugit kukkusumik politikkeqarsimalluta taamaaleriarluta Folketingimi sulinerput aqqutigalugu isumassarsioriarta suleqatigiillutalu.
Aatsaat taamaaliorutta alloriaqqissinnaavugut.