Isummat ajornartorsiutitaqanngitsoortussaanngitsut kingulliit tusaqqammerpagut:
Nuna allamiunut oqartussaanerup tigunissaa.
Namminersorlutik Oqartussat artukkersorneqassapput aamma oqartussaaffimmik tigusinerup kinguneranik Namminersorlutik Oqartussat tigoriigaanni suliassat maannamut iluatsinneqarsimanngitsut suli artorsartitsinerulissapput.
Namminersorlutik Oqartussat assersuutigalugu makku ingerlatarilernikuuai: Peqqinnissaqarfik, inunnik isumaginninneq, inissaqarneq kiisalu kommuninik suleqateqarneq, ullumimut naleqqiullugu pitsaanerungaartumik suliniarfigisariaqartut.
Pisariaqartinngilarput oqartussaaffinnik amerlanerusunik tigusinissarput, tigoriikkattali iluamik aqunnissaat isumagisariaqarparput.
Kommunit Namminersorlutik Oqartussat oqaloqatiginiartuarpaat qisuariartarneralli nikerartorujussuuvoq. Suliassarpassuit kommuninut tunniussuunneqarput taamaasillutik nuna tamakkerlugu politikerit oqarsinnaanngortarput, kommunit kukkusartut, namminerliuku aningaasanik nukinnillu naammattunik akuersissuteqanngisaannartut.
Eqqartorneqartuarpoq aatsaat taama suliffissaaleqisut ikitsigisut, oqarnerli ajorput, kisitsinit suut tunuanniinnersut imaluunniit sunik ajornartorsiortitsilersarnersut.
Naak Suleqatigiissitsisut tikisitat pillugit eqaatsumik aaqqiisoqarnissaa anguniartuaraluaraat, imaanngilaq uangut nammineq nukiit pivut isiginngitsuusaarigut imaluunniit tunulliukkigut.
Sulisussaaleqinerli ajornartorsiortitsilluinnarmat, mittarfiliornerinnaanngitsoq sullivinnili tamani, allatut ajornartumik sulliviit inuttalersortariaqarpagut peqataanillu nunaqavissunik ilinniartitsilluta.
Matchgruppe 2 aamma 3-miittut pitsaasumik piginnaanngorsarumallugit eqimattanut kajumissaatinik takutitsisariaqarpugut. Sulineq imminut akilersinnaasariaqarpoq. Eqimattaniittut inuit pitsaanerpaamik sulisartuunermut ikaarsaartittariaqarpagut, aningaasaqarnikkut iluarsartuussinerit kisiisa sakkuginagit qularnaarniarlugu ikiorsiissutinik pisarnissaat uffa suliffeqarlutik akissarsiorfimminnik aammali ikiortariaqarpagut imminut ikiorsinnaaleqqullugit atornerluisuusimappata imaluunniit aningaasaqarnerminnik iluamik naammattusaarisinnaanngippata.
Nuna allamiunut oqartussaalernerup ajornartorsiutit pilersinneqartartut qaangiutsinnavianngilai pilersittagassaminut naleqqiullugu aamma Matchgruppe 2-miittunut 3-miittunullu suliassarpassuit iluarsinavianngilai.
Naamerluinnaq. Pisortat allaffissornerat alliallaqqiinnassaaq, immikkoortorlu pipallattumigaasiit suliamiik suliamut aaqqiivigineqaqattaassaaq Namminersorlutik Oqartussat suli ajornartorsiuteqarnerulersillugit taamatullu ingerlatsiviit.
Immikoortut tigoriikkagut iluarseqqaariartigit.
Suleqatigiissitsisuni kissaatigaarput tikisitat najukkami sulisartunngussasut. Oqaatsit pillugit suliniuteqarnissaq pisariaqartutut isigaarput, sulisussaqalerumalluta oqaatsitsinnik ilinniarusuttunik Kalaallit Nunaannilu innuttaalersussanik. Akissaqanngilagut sunnginnissatsinnut. Inunnik sullissisussat amerlanerit pisariaqartippagut ataatsimoorluta kisitvissagutta.
Suliffeqarneq pilersaarusiortariaqarpoq, isumaqatigiissutit piffissaagallartillugu iluarsisariaqarput, ilinniartitaaneq pillugu iluarsartuussisariaqarpugut, aningaasarsiorneq pillugu iluarsartuussisariaqarpugut, tikisitanik sulisoqarneq pillugu eqaannerusunik periuseqartariaqarpugut aamma oqaatsit pillugit suliniarnissaq iluaqusiissapput pitsaanerusunik ingerlalernissatsinnut.
Qulequttat ilaatigut taakkuupput pikkoriffiginerusariaqakkagut qularnaarumallugit suliffeqarnermi sinaakkutit pitsaanerpaat.
Kalaallit Nunaanni sulineq toqqissisimanartuusariaqarpoq.