Nutaarsiassani tusaqqammerparput ilinniartitaanikkut angukit kinguussaaqqasut sualummik ilinniagartuunngorniartartut akornanni.
Aamma paasivarput angutit inuusuttorpassuit imminut toquttartut amerlaqisut kiisalu pinerluttartut amerlanersaat angutaasut – sualummik sakkortuumik pinerluuteqartartut akornanni. Suli oqallisaaqqusaanngillat angutit nukappiaqqallu ajornartorsiortut.
Angutit misigissutsitik nammineq ersukkajuttarpaat. Nukappiaraatillutik oqaluttuunneqartarput akiuuttariaqartut, nukappiaqqat qianeq ajortut, kamassanngitsut – inuusuttunngoraangamillu katersuuffigisarpaat nukittunerpaat tassaasut “qianeq ajortut” imaluunniit “akiuussinnaalluartut” misigissutsiminnillu takutitsigaangamik sanngiinnerarneqartarput. Atuarfinni sakkortuumik qisuariartartut naveersittarput, artorsartitsisuunerarneqartarput – pisariaqartitaallu takuneqanngisaannarlutik. Paarlattuanik pillarneqartarput taamaasillutillu misigissutsitik ungasinnerulersarpaat ajornerpaangaagallu inuiaqatigiit qimarratigisarpaat. Matunissartik ilikkartarpaat.
Nukappiaqqat nipaarluit oqaaseqartorsuunngitsullu qarsupiinnarneqartarput kiserliortitaasarlutillu.
Nukappiaqqat angutillu ajornartorsiutaat eqqartorumanngittuarsinnarpagut, misigissusaat aamma qanoq aninguisinnaanersut oqaatsigut atorlugit, oqariaatsigut aamma nukappiaqqat angutillu suusariaqarnerit pillugit isummagut pigiliutiinnakkat eqqartorumanngilagut. Malunnarpoq angutit ajortianerusut ulorianartorsiornerullutillu arnanut naleqqiullutik, pinerluttartut amerlanersaat angutaammata. Annaattariaqarpagut kingusinaartigata.
Massakkut aatsaat angerlarsimaffinni perulluliortoqaraangat takusarpagut, isertitsivinniileraangat imaluunniit inersimasutut atornerluisunngoraangata. Nukappiaqqat angutillu sumunnarfissaqanngitsut ataatsimoorfinnillu ornitassaqanngitsut, peroriartorsimanertik tujorminartoq eqqartorusuleraangamikku, kamatsik aqussinnaajunnaaraangamikku, angerlarsimaffimmi ajornartorsiuleraangamik imaluunniit aappariinnikkut ajornartorsiuteqaleraangamik. Tamanna ajornartorsiutaavoq.
Siullerpaamik ulorinaartorsiortunut tulliatullu inuiaqatigiinnut.
Oqaloqatigiissinnaaneq aamma angutitut pissuseqarnissaq
Inuiaqatigiinni takussaanngilaq angutit sapertut imaluunniit piumanngitsut, ersersinneqaannarporli qangatut inooriaaseqartugut tamannalu qaangertariaqarparput. Angutit nukappiaqqallu pillugit isummat pigiliutiinnakkat aquppaatigut tupinnanngilarlu naggataatigut piviusunngortarmata.
Angutit nukissuarnik ulikkaartariaqanngillat, nipaatsuusariaqanngillat qatimaattartut sunullu tamanut naammgittartuusariaqanngillat – qunusuitsuusariaqanngillat angutiviujumallutik.
Angutaaneq tassaavoq inuuneq, sunik tamanik nassataqartoq – angutaassuseq pillugu isummiussaqarpugut aalajangersimaqqissaartumik angussuusariaqartutut naatsorsuullugit.
Angutit nukittuut nukappiaqqallu nukittuut aamma qiasarput. Aamma anniaateqartarput.
Nukittuneq aamma qajannarnerusinnaavoq, misigissutsinik malussarinneq, eqqarsartaatsikkut inerisimaneq, ikiortissarsiorneq silarsuaq artornarsivallaaraangat, imminut ilinniarneq peqqinnartumillu peqateqarneq. Angutit nukappiaqqallu aamma qinnutigisinnaasariaqarpaat katsorsarneqarnissartik imminnut tulluuttumik, ulluminnut tulluuttumik, inoriaatsiminnut tulluuttumik aamma avatangiisinut peqatigisartakkanut tulluuttumik.
Inuiaqatigiinni tamatumap oqallisiginissaa amingatigaarput.
Angutit soorunami aamma isumalluillaqqissuupput, asannittuupput, nukittupput, sallaatsuupput arlarpassuarnillu piginnaaneqarlutik, inuttut allatulli. Nersualaarneqarneruna ajuinnartut kinaanertik pissutigalugu. Uangut aamma arnat, qangatut perorsaariaaseqaratta, pissuseqaratta aamma qangatut
angutit arnallu qanoq ituusariaqarnerat pillugu eqqarsariaaseqarluta. Nukappiaqqat mikisunnguullutilli ilinniartarpaat angutiviit qanoq ittuunersut aamma qanoq ittuussanersut.
Angutinut inuusuttorpassuarnut pissanganartarpoq ineriartornerminnut ajoqutaasinnaasumik peqarteqarniartarneq imaluunniit kinaassutsiminnik isertuussisarneq aamma qanoq innerminnik isertuussisarnerat. Pinerluttarnerup ineriartornera, angerlarsimaffimmi eqqissiviilliortarnerit, atornerluinerit imaluunniit angutit imminut toquttarnerat ajunngitsumut saatissagutsigu pisariaqarpoq oqallinnissarput.
Angutinut nukappiaqqanullu innersuussiviusinnaasut amingaataapput uummataat inuunerallu aserorsimappata.
Allatut oqaloqateqarnissamut periarfissat
Ammasumik oqallisigisariaqarparput angutit nukappiaqqallu aamma pisariaqartittarmassuk oqaloqateqararnissat tarnillu pissusaanut immikkut ilisimasalimmik oqaloqateqartarnissartik, inuunerminni kanngissimappata. Oqaloqatigiinneq ilinniartariaqaraat matunatik imaluunniit qisuariartarnissaq. Angutit nukappiaqqallu ataatsimoorfiit siuarsartariaqarpagut misigissutsinik eqqartuiffiusinnaanngorlugit, suulluunniit oqaloqatigiissutigineqarsinnaanngorlugit – meeqqerivinni meeqqallu atuarfianni allartilluta. Nukappiaqqanut isiginneriaaserput inuiaqatigiittut allanngortittariaqarparput. Paarisariaqarpagut iluamillu pillugit nukappiaqqallu maluginiapallattarlugit meeqqerivimmiinneranni allatut pissusilersulissagaluarpa.
Qularnaartariaqarpagut iliuuseqarasuartarnissat, meeqqat atuarfiani aamma kingusinnerusukkut ilinniarfinni. Ataqqinarsaaqqinneq atortariaqarparput oqaloqatigiittarnerlu inuit atornerluisunngortinnagit, isertitsivinnut mattunneqartinnagit imaluunniit angerlarsimaffimmi perulluliortunngortinnagit.
Angusassanik toraagaqarluta sulisariaqarpugut, nukappiaqqanut angutinullu pinerluttunngorsimasunut oqaloqateqarsinnaaneq ilinniartitsissutigisariaqarparput. Qisuariarneranniit aamma sapinngisamik siusinaarluta meeqqat ikilernikorpassuit aqqutaat aseruitsinnagu.
Angutit oqaloqatigiittarfiit amerlanerusut amingaatigaagut, angutinit siulersorneqartut, angutinut tulluussakkat. Pisariaqartipparput angutit timi atorlugit susassaqartarnissaannut periarfissat amerlanerusut aamma suiaassuseq aallaavigalugu peqatigiittarnissat eqeersaatigalugit. Oqaloqatigiittarnerit amingaatigaagut siunertaralugu kamammik katatsisarnissaq.
Eqqartoqqusaanngitsoq tamanna arajutsisarparput, inuiaqatigiinnik pilersitsinikuugatta isumaqartunik angutit nukappiaqqallu nipaarluusut, akisinnaasut nukittuujusullu. Allaat immaqa pisariusutut sanngiitsutulluunniit isigeqqajaasarpagut – anniaatitik oqaluttuarinialeraangatigit.
Ilumuunngilaq angutinut isiginneriaaseq taamaattoq aamma ittangaqaaq. Nukappiaqqat angutillu kukkusatut misigisimassanngillat anniaateqarnerminni imaluunniit tamakkunannga eqqartuinialeraangamik.
Nukappiaqqat angutillu misigissusaat pillugit oqaloqatiginneriaaseq amingaatigaarput, meeqqat atuarfianni tamanna aallartittarpoq. Peqatigiiffiit peqqinnartut, suiaassuseq aallaavigalugu atoqatigiittarneq, asanninneq, anniarneq, kamak aamma inuuneq eqqartortariaqarput. Nukappiaqqanut atuarfinni aserortunut siunnersuisinnaaneq inorparput ilaatillugu ataqqissallugu naluarput sakkortuumik qisuariartarneq tassaammat ikiortissaasuanermik takutitsineq.
Aamma imaassinnaavoq “Illit imaannerit” pillugu oqaloqatigiinnikkuinnaq qaangerneqarsinnaanngitsoq, allaffimmi, imaassinnaavoq susassaqartitsinerit atorlugit oqaloqatigiissutigisariaqartut soorlu ataatat angutillu nukittuut atorlugit – ineriartortittariaqarparput angutit nukappiaqqallu anersaartorfissaat. Angutit ataatsimoorfiini nukittuuni. Pilersissavagut nukappiaqqat nukittuut, ataatat aamma angutit.