Piujuaannartitsinissaq tunngaviginagu aalisarneq ajoqusiivoq
KNAPK-p siulittaasuata Henrik Sandgreenip sunniut pissutaasorlu paarlaappai umiatsiaararsorlutik aalisartut isornartorsioramigit, inummi taanna isumaqarpoq aalisarsinnaanermut akuersissutit amerlavallaat umiatsiaararsortunut tunniunneqartartut.
Paarlattuanik Siumup aalisarnermut Naalakkersuisorisimasai qissimittariaqaraluarpai, taakkuami eqqunniukuuaat aalisakkanut paggatassiiffiit. Ajorpoq aalisartut paggatassiissutinik tamarmik aalisarsinnaanerat, Naalakkersuisuusimasummi Qeqertarsuup Tunuani, Uummannami Upernavimmilu pisasseeqqaarluni aalisarfiusaraluartut ammaannikuuai.
Aalisartut umiatsiaararsortut pisuunngillat Avannaani aalisapilunnermut.
Ajoqusiisoq tassaavoq paggatassiineq kiisalu pisassiisarfiit akornanni sumulluunniit aalisariarsinnaatitaaneq, killeqanngitsumik aamma akuersissutitaqanngitsumik.
Qeqertarsuup Tunuani qaleralinniarnerup ajalusoornera Avannaani aalisarnermut sunniuteqarnerluppoq, tassami siku aanniariartoq aalisariutit anginerumaat Uummannap eqqaanut aalisariartarmata umiatsiaararsortut inangerlugit. Aalisariutit Ilulissaneersut aalisartarput aalisarfitoqqaminni aamma tunitsiviit ulikkaartortarpaat umiatsiaararsortut tunitsivissaarutingajallugit
Piujuaannartitsinissaq iluamik pilersaaruteqarfiunngilaq, kiisalu pisassiisarnerup iluarsartuunneqarsimannginnera taama pissuseqalersimanermut pissutaavoq. Taamaattumik KNAPK-p siulittaasuata pissutaasoq sunniullu paarlaappai umiasiaararsortut pisuutillugit, uffa taakku nunaqarfinnik napatitsisut aamma tamanit eqiasuinnerpaallutik nunami maani suleqataasut.
Uumassuseqarneq aningaasaavoq, eqqissisimasumillu akisussaasunut eqqarsaatigillaqquarput aalisagaqarfiit ulorianartorsiormata taamatullu aningaasarsiornerput. Taamaattumik pisariaqarpoq akisussaassuseqarluni aalisarnermut inatsimmik aalajangiinissaq. Susoqanngippat kinguaassagut sussaarutissavagut. Toqqagassarput nuanniitsuuvoq, taamaakkaluartorli aalajangiisariaqarpugut.
Ilaatigut paggatassiiffiit isummerfigisariaqarpagut aamma aalisagaqassutsimut tamanna qanoq sunniuteqartarnersoq. Tungiuinitsinni tunngavipput sequmeriaannaavarput ilungersunartorsioreertigaluta – sualummik maannakkut mittarlifortiternernut aningaasaliissutinut taarsiiortulernitsinni.
Pisut pineranni aalisarneq pillugu isumalioqatigiisitaq nipaarluulluinnarpoq. Tusagarput kingulleq tassaavoq immaqa februaarimi inuttalersorneqarumaartoq. Asuleerneruvallaaqaaq. Pilersipallanneqartariaqarpoq.
Aalisarneq pillugu isumalioqatigiisitaq tamanit sinniisuuffiusariaqarpoq: Partiinit tamanit, Kalaallit Nunaanni Sulisitsisut Peqatigiiffiannit, KNAPK-mit kiisalu aalisartunit, taakkumi napaannarnissaat uani pivarput.
Nuna tamakkerlugu atuuttussamik isumaqatigiissuteqarneq taamaallaat pisinnaavoq partiit tamarmik peqataappata, oqaatsimmi iliuuseqarnermik malitseqartinneqartariaqalerput aamma qulakkeertariaqarparput, nunatsinni aalisarnerup tamanit iluaqutissarsivigineqarnissaa atuutsittuartariaqarparput.