Qapputtuarput, susoqarneq ajorpoq
Qaqugu uissagatta ajornartorsiutigullu piviusut suliarilerlugit?
Innuttaaqatitta pingajorarterutaat Danmarkimi najugaqarput!!
Sooruna maani najugaqatiginngikkaatigut? Atorfissaqarteqaagummi. Pissutaatippaat nunatsinni tungiuinerup ajornerunera, tikilluaqqusaannginnertik, atuarfiit pitsaanngitsut, akissarsiat pitsaanngitsut, init sussaanngitsut, qinngasaarisarnerit, tarnikkut peqqippiannginneq allarpassuillu.
Politikerigut qaqugu uissagamik innuttaasullu ajornartorsiutaat piviusut suliarilerlugit?
ISORNARTORSIUILERUTTA sorpassuit atorlugit pisuutinniarsarilissavaatigut – allaqqussinnaanngilarli isornartorsiuinigut anittariaqarpagut allanngortitsiumalluta!
Qanorsuaq tungiuinikkut ajornartorsiuleqqaartariaqarpugut aamma allatigut qanorsuaruna ajornartorsiuleqqaartariaqargugut aallartissagutta suleqatigiilluta – oqaatsit aporfiginagit, sumiuuneq apeqqutaatinnagu aamma inuttut suunngitsunik oqalunneq atornagu, qularnaarumallugu innuttaasut nuannersumik inuuneqalernissaat?
Uangut politikerit suliamiik suliamut sulivugut, siunertaqaratali aamma isumaqarluta suliatta tullia kusanariaqqiffissaqanngitsoq annassutigiumaarlugu.
Mittarfiliortiternerit takorluukkallu piviusuunngitsut. Oqaruaatikkut siunnersuisarneq aningaasaliiffiginagilli imminut toqunniartut sivisuumik oqaloqatigineqarlutik katsorsarneqartarnissaat imaluunniit kinguaassiutitigut atornerlunneqarsimasut sivisuumik katsorsarneqartarnissaat, tarnikkut persuttakkaat. Illut oquttut kiisalu angerlarsimaffeqanngitsut. Utoqqalinersiat illuatungaani inuuniarneq akisoorsuaq.
Innuttaasut tikkuartorneqarput
Politikkikkut suliniutit amerlanersaanni suut tamarmik pineqarput innuttaasulli tunngaviusumik pisariaqartitaat puigorluinnarsimapput aamma uangut politikerit isornartorsiorneqalaalerlutalu eqqorneqartutut pisuutinneqartutullu sukkanerpaamik qisuariartarpugut. “Aningaasassaqanngilagut” ” Nunap tamarmiusup ataqatigiisinnissaa akisuallaaqaaq”, ” Pisariaqartippagut xxxx iluamik ingerlalissappata”. Taava ingittaraagut utaqqiinnalertarlugulu tungiuinerup suli ajornerulernissaa. Peqataanik innuttaasut nilliapput akerliussutsimillu takutitseqattaarlutik oqartarlutik: Uangut aaqqiissutissat pigaagut.
Politikerillu arlaannanngualluunniit qarluallanneq ajorpoq oqarluni pingaarnersiuinerit allanngortinneqarsinnaagaluartut. Mittarfiliortiternissanut aningaasaliisoqarsinnaappat taava soorunami aamma inuit aningaasaliiffigineqarsinnaasariaqarput. Meeqqat inuusuttullu. Innarluutillit. Angerlarsimaffeqanngitsut. Ilaqutariit naliginnaasut meerartallit akisoorujussuarni meeqqerivinniititaqartut. Inuinnaat akissarsiaasa qaffannissaannut. Suliffiit nutaaliornissaannut.
Kattuffiit inuutissarsiortullu peqatigiiffiisa tulleriiginnarlutik ikiuukkumallutik oqaluttuarisaraluarpaat qanoq iliortoqarsinnaagaluartoq ajornartorsiutit iluarsineqassappata. Sunnguamilluunniilli tuninngisaannarpagut.
Inuit ulorianartorsiortut, meeqqat inuusuttullu, ilinniartiaaneq, akissarsiat qaffannissaat, peqqinnissaqarfik aningaasaliiffigeqqullugu suaartaleraangatta taasarpaatigut “akisussaaffeqanngitsuliortutut” aamma “uppertikkuminartutut” sunnguamilluunniilli eqqaaneqarneq ajorpoq akisussaassuseqanngitsuliorluni taamannaannaq aningaasaliiffigineqartoq mittarfiliortiternissaq, ataqatigiinngitsoq, kinguaattuulereersoq aamma siunissamut qularnaarinngilluinnartoq. Minnerunngitsumillu ukiut 40-t kingulliit ingerlanerini tusaamasaassutigerusullugit aningaasaliiffigineqarsimasut sanaartugassat angisoorsuit akisoorsuillu.
Immaqaana inunnut aningaasanik atuineq kisimi akisussaasseqanngitsuliornerusimasoq.
Uffa taakku kisimik qularnaatsumik aningaasaliiffigineqarsinnaasutuaagaluartut.
Alianarlunilu quianaannartumik uangut politikeriusugut takorluulertarpakka ingillluartitaariarlutik assammik nuuinik siutitik matusaraat sisuulertarlutillu aqqutinnaarsuartik atuallallugu.
Inuimmi naalliuttut nimaarnerat tusaasinnaanngikkaanni tusilartoqarsimassaaq imaluunniit inuit nerisassaqarumallutik, ineqarumallutik, peqqissuujumallutik ilinniarumagaluarlutilluunniit meeqqatik allalluunniit meeraat pillugit nialliasut tusaasinnaanngikkaanni tusilartoqarsimassaaq.
Tusilangaarataallu allaat innuttaasut pisuutitsiassuagut!
Oqarluartaarutaasut ilaat makkuusarput “Inuit suliumanngitsut tassaapput eqiasuttut”, “Sulinerusariaqarput aamma sivisunerusumik”, “Inuit pikkorissut atorfinitsittariaqarpaat, politikerimmi taama oqalupput”, Tungiuineq akilertariaqarpaat”, “ajunngilaq inuit ilaat naveertaraluarutsigit aggerfiat piinnarlugu”. Tamakku tamarmik sulisunut, nunami maani inuinnarnut, sullivinnullu ajoqutaapput. Unitseriartigit! unikaallalaariarta! Issagut salilaariarlugit sila nittaattoq qivialaariartigu!.
Pissusitoqqat atorsinnaanngillat.
Upperinngikkumma avatangiisitit qiviakkit. Tungiuineq isasuulerpoq, meeqqat atuarfiat ingerlanerluppoq, aningaasaqarnerput annaanneqaqqatartarpoq isertitatta annersaannit, tassalu Naalagaaffiup tapiissutaanit aalisarnikkullu iseritanit.
Taavalu ittuuillisaarluta tamakku nipituumik oqaatigisoorutsigit, nuimasut alassavaatigut, akooqqujunnaassavaatigut ingullutalu aallartilluta piumasaralugu iluamik oqalussasugut. Inuttut nakkutigineqarpugut. Ingasattorujussuarmik. Oqassanatalu uffa taamaattoqartoq. Eqqartoqquneqanngitsut qaqitsiartarpagut eqqartoqquneqanngitsulli aaqqiissutissat taannasagit – suliassaq angisoorsuuvoq aqqutitsinnilu kukkussagutta nassuerutigisigu allanngortillugulu. Eqqartorneq ajorpaput akisoorujussuusoq naqqaniik allanngortitsiniarluni isornartorsiuineq. Qarasaasiami inuit naapittarfiini malersugaaneq misigisassaavoq, tusagassiutini, ingutsinerit sukkanerpaamik siaruartipallanneqartarput aamma nippaarillutik eqqortumik oqaluttut saassutarineqartarput.
Politikkikkut tusilartuuneq akisunaarpallaaleqaarput
Oqallisigeqqusaanngitsoq. Politikerit tusilartut arlaannaataluunniit eqqaaneq ajorpaa, innuttaasut AKISUNAARERUJUSSUAREERSUT – akisunaarlugu akiliisartut maani najugaqarusullutik. Aningaasatigut, ineqarnikkut aamma tungiuinikkut.
Eqqartorneqanngisaannarpoq ilumut paasisinnaagipput inuit sakkortuumik inuunerminni misigisaqarsimasut, innarluutillit, napparsimasut, kanngutsaattuliorfigineqarsimasut, saassunneqarsimasut, angerlarsimaffeqanngitsut, piitsut,kinguaassiutitigut kanngutsaattuliorfigineqarsimasut, imminut toquttut imaluunniit puullaaqerulunnerup inuit aqullaartittarai taamaattumillu ikiortariaqartut peqqisseqqissagunik.
Kisianni inuit tamakku ikiorneqarneq ajorput. Inuit naalliullutik inuulersarput naatsorsueqqissaarnermullu ilanngunneqariarlutik naaviigaalersarlutik.
Kanngunaqaaq imminut qinngasaarunneq, imminut immikkoortiterneq sumiuussuseq tunngavigaugu aamma sumut ataneq – nuna, oqaatsit imaluunniit illoqarfiit tunngavigalugit. Oqarluni akerleriittugut. Inuiaqatigiinni uangutsinni inuit assigiipput, suminngaanneeraluarunilluunniit aamma oqaatsit suut atoraluarunikkilluunniit. Ajornartorsiutitta eqqartornerini ammip qalipaataa tunngaviusussaanngilaq. Taappiilliortitsiniarneruvoq aaqqiissutissallu kinguarsarneqarlutik “uangutsunnut taakkununngalu ” immikkoortiterinitsigut. Ersisaarutit qanganisaanersaat.
Nikinniaaluusaartugut angerlarsimaffeqanngitsortagut angallapput qiullutik, tarnikkut napparsimasut tutullutik, utoqqaat artorsaatitut taagorneqarput aamma meeqqat inuusuttullu ilarpassui imminnut illersortussanngorlugit imminiiginnagaapput.
Putusaarinerit sanaartugassarsuit angisuut piinnarlugit, artorsartut nipangersarlugit, inissat pillugit akisussaaffik pisortaqarfinnut assigiinngitsunut miloriunneqaqattaarpoq, utoqqaat fuck-yuorneqarput inuillu ukiorpassuit ilungersorlutik sulisimanertik pillugu nungullarnikut alaannarneqartarput, soraarnerussutisiassaat ilanngarterneqarlutik aamma politikerit tatigisaqanngitsut inuit kaasarfissiortarpaat akiliisinniarlugit, oqartariaqarluta akileraartartut akiliutaat tuttartut aserorterinernut, inerteqquteqarnernut, peqqusinernut aamma sanaartugassanut tusaamasaassuteqarnissaq piinnarlugu sanaartorneqartartunut – pisariaqartitsisut uniorlugit. Suna tamaat qujarullugu oqaluppugut, politikerit assortornaveersaarlugit imaluunniit politikkikkut eqqortumik isumallit kisiisa iluaqusersorlugit.
Taamaanngippat isornartorsiuisut qinngasaarlugit, qummoroortarluta akinaveersaarlugilluunniit nipangersissavagut, kiserliortillugit. Inuttut nakkutigalugit.
Inoqatigut tusaqqusaaraluarput aqqusinerni, akerliussutsimik takutitsisarlutik, Facebookimi, MIO-mi, innarluutillit illersuisuanni, inunnik isumaginnittoqarfinni, sullivinnilu – aamma sumiikkaluarunilluunniit nipissartik tamaat torlulaartaraluarput. Politikerit eqeersaraluarpaat. Aaqqiissutissanik massakkorluinnaq atorneqarsinnaasunik tikkuussisaraluarput.
Iliuuseqarneq oqaluinnarnermiik pitsaaneruvoq
Ataatsimoorluta suleqatigiittariaqarpugut iluatsitsissagutta. Ataqatigiilluta. Paasisariaqalerparput immitsinnut pinngitsoorsinnaanata.
Isumatigisat kisimik politikkeqatigisarneri atorunnaartariaqarpoq, taamatut aamma akerlerisat politikkianik suussaajunnaartitsisarneq unittariaqarpoq, suarsuit assortuussutigiunnaartariaqarpagut, tungiunerlu qularnaarlugu, ilinniartitaaneq aamma nammineq sinaakkusianut naapertorlugit siuarsaasariaqalerpugut.
Illuatungiliuttut naalakkersuisuutitaqartulluunniit siunnersuutaat angernerlugit naaggaarnerlugilluunniit taasisarneq qimattariaqarpoq tamatta immikkut isumaqarnerput piinnarlugu. Siutigut inussatsinnik mileqqujunnaarlugit tusarnaartariaqalerpugu – issagut salillugit piviusoq qiviartariaqalerparput.
Iluarsisassat taajugassagut amerlaqaat, politikerit inuinnaallu iluarsisassaat. Eqqarsartariaaserpulli allanngortingaatsiaqqaartariaqarparput.
Periusitoqqat alarlugit, tasiorluta eqaatsumik aaqqiissutissarsiortariaqarpugut siunissaq ungasinnerusoq isigalugu.
Inunnik isumaginninnermi ajornartorsiutit pillugit Danmarkip annerusumik suleqatigineqarsinnaanera qujaruttariaqarparput, ilinniartitaaneq, peqqinnissaqarfik, inuit ajornartorsiortut inissialiortiternerlu aalluttariaqalerpagut.
Soraarnerussutisiassat, akiitsunik akiliisitsiniarneq, imigassamik matusisarnerit ammaasarnerillu imaluunniit ilinniartitaanermik allanngortitsisarnigut piviusunngortikkiaartuaartalertariaqarpagut piffissaqartitsinerulluta. Pilersaarutigut nassuiarluarlugit, ersarissumik aalajangiusimallugillu.
Ullumikkut aaqqissuussineq qiviartariaqarparput.
Aalajangerlutalu sumut ingerlaniarluta. Oqqatiinnarunnaarluta.
Sumi aallartissaagut?
Inuutissarsiorneq, inunnik isumaginninneq, pisortat ikiorsiissutaat, suliffeqarfiit kisermaassisut, aalajangiisoqassatillugu politikkimi ersarissumik ingerlatsinissaq, kattuffiit isumaqatiginiarnissaat, ilinniartitaaneq, suliffeqarneq peqqinnissaqarfillu aallarniutigisinnaavagut – paasiniarlugu ingerlatseriaaseq uangutsinnut iluaqutissiisarnersoq? Iliuutsigut naammappat? Ajunngitsumik ingerlatsivugut?`
Naagga? taavami ila aaqqiissutissanik nassaariarta innuttaasut tikkuartuusakkunnaarlugit, “takornartat” pisuutiusakkunnaarlugit, mattussuijunnaarluta tusarnertussallu tulliuttut piunnaarlugit.
Piffissaq pisariaqartinneqartoq atorlugu ilungersuutigut piviusunngortikkiartuaartariaqarpagut. Ukiut sisamakkaarlugit raajatut pissikarluta pipallattaqattaarunnaarluta. Raajat assersuutigigakkit raajanut utoqqatseraluarpunga, mamaqaammi aamma massakkoqqissaaq assut isaatitsissutaapput. Politikkikkulli ajornannginnersiuisaqattaarnerit piffissaq ungasinnerusoq isigalugu eqqarsaatiginnguarnagu peqattaartut paarlattuanik ammuinnaq ingerlappaatigut, soorlu qunugineqartoq oqaatigissallugu allarluinnarnik pisariaqartitsisugut. Pipallatat pipallannerlu atorsinnaanngillat.
Sapiissuseqartariaqarpoq takorluugaq piviusunngortinneqarsinnaanngitsoq suaartaatigissallugu aamma immaqa taaneqanngitsoornermik kinguneqassaqqooqaaq.
Pisariaqarporli oqaatiginissaa. Politikerit nuannarineqarniaannarlutik issiasariaqanngillat, sulisariaqarpulli ajunnginnerusussaq anguniarlugu – inuiaqatigiinnut aamma tassani innuttaasunut.
Uangut, innuttaasut, inuinnartut suleqataasariaqarpugut pisariaqartinneqartoq allanngortitsinissaq anguniarlugu aamma anguniagarput angusserlugu pingaarnersiuinissamut.
Ajunngitsussaq pillugu ilungersortariaqalerpugut.
Eqqarsariaaserput allanngortittariaqarparput.
Immitsinnut pilluta aamma kinguaassagut pillugit.