Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna saqqummiuppakka:
Naalakkersuisunut apeqqutit:
Mittarfiliortiternerit kinguaattoorfiussagaluarpata taava mittarfiliortiternissanut naatsorsuutit ataatsimoortut qanoq sunnerneqassappat?- A) Kinguaattoornerit pissutigalugit immikkut qanoq aningaasartuuteqartoqassava soorlu sanaartornerit tamaasa ataatsimut isigalugit?
Naalakkersuisut pilersaaruteqarfiginerlugu siuariartornerit pillugit innuttaasut qanoq tusarlerneqartassanersut imaluunniit mittarfiliortiternerit kinguaattoorfiussagaluarpata qanoq tusarliinerit pisassanersut?
3. Mittarfiliortiternut atatillugu sanaartukkat tamakkiisut pillugit taakkuluunniit ilaannaat pillugit akiliisinnaajunnaartoqassagaluarpat – aallaqqaataani – qeqqata missaani imaluunniit sanaartornerup naajartonerani, taava kikkut akiliisariaqassappat ?
3. A) Apeqqutip taasuma assinga, mittarfiliortiternermut atatillugu pilersuisut arlaat imaluunniit mittarfiliortiternermi sanaartoqataasut arlaat akiliisinnaajunnaassagaluarpat kina akiliissava?
4. Akiliisinnaajunnaartoqarnerani Naalagaaffik akiliissappat, taava akiliutigineqartut Naalagaaffiup tapiissutaaniit peerneqassappat?
5. Innuttaasut qaqugu paasisinnaalissavaat sanaartornermut pilersaarutit tamakkiisut taamatullu mittarfiliortiternermut attuumassuteqartut allattugaatit?
6. Inatsisartunut ilaasortat, suliamut tunngatillugu allatugaatinik tamarmiusunik saqqummiussivigineqarsinnaasimanngitsut qaqugu mittarfiliortiternermut atatillugu allattugaatnik isertuussatut naqissuserneqarsimasunik saqqummiussivigineqarsinnaanngussappat?
Tunngavilersuut:
Kikkut tamarmik soqutigaat qulaani apeqqutit akineqarnissaat, Aningaasanut Inatsisissatsinnut sunniuteqartussaammata taamatullu naliginnaasumik aningaasaqarnitsinnut annertuumik sunniuteqartussaammata, akiliisinnaajunnaartoqassagaluarpat imaluunniit kinguaattoortoqarneran akisunaarneqalissagaluarpat.
Aamma tusassallugu soqutiginarpoq mittarfiliortiternernut atatillugu pilersaarutit unioqqutinneqarsinnaanerata akiornissaanut Naalakkersuisut pilersaaruteqarnersut, mittarfiliortiternissanut aningaasaliinerit Kalaallit Nunaata oqaluttuarisaanerani aningaasaliinerummata assissaqanngitsumik.
Naatsorsuutigaarput taama amerlatigisunik akileraartartut aningaasaataannik aningaasaliisoqarsimagallartillugu, paasisaqarsinnaasariaqarluta tamanullu saqqummiussisinnaasariaqarluta, unammilleqatigiinnerup suliariumannittussarsiuussinerullu
ataqqineqarnissaat pisariaqarsimanngippata, minnerunngitsumik sanaartornissaq inatsisillu tamanut soqutiginartuummata mittarfiliortiternissanut aningaasaliissutit amerlanerujussuat eqqarsaatigalugu.
Taamaattummik soqutiginassaaq tusassallugu atortut oqallisaaqisut isertuussalli Naalakkersuisut qaqugu saqqummiutissamaarneraat.
Taasinerup nalaani Inatsisartunut ilaasortat paasissutissat suliamut tunngasut tamakkerlugit pisinnaasimanngilaat taamaallaallu naammagiinnartariaqarsimallugu suleqatit ataatsimiititaliami issiasut oqaluttuarisinnaasaat, issuaaqqusaannginneq pissutigalugu ataatsimiinnermi matoqqasumi nammineq oqaatigisimasat eqqaassanngikkaanni.
Naluneqanngitsutut Inatsisartuni ilaasortarpassuit periarfissaqarsimanngillat mittarfiliortiternernut tunngasunik pappiaqqanik pilersaarutinillu atuarsinnaasimanngillat aamma paasissutissanik tamakkiisumik pissarsisinnaasimanngillat apeqqutaallu akineqarsinnaasimanatik mittarfiliortiternissamut tunngasut ataatsimiititaliani suliarineranni.
Taamaattumik soqutiginassaaq tusassallugit Naalakkersuisut pilersaaruteqarnersut, aalajangiisartunut ammaatissallugu qanga qanoq taasisoqartarsimanersoq taamaasillunilu qularnaarlugu demokratimi peqataasinnaanissaq. Aamma soqutiginartutut misinnarpoq akuusimanngitsunut ilaasortanut paasissutissanik nammineq misissuisinnaanissaq. Ajornarpat sanaartukkalluunniit naammassereerpata, oqaluttuarisaaneq demokratilu pillugit.
Apeqqutit akeqquneqarput ullut qulit qaangiutsinnagit.