Perruualaarutigisarparput inunnik isumaginninnerup iluani “ajunngitsup tungaanut ingerlagatta”.
Ajunngilaq ajunngitsup tungaanut ingerlagatta, aallaaviuppat tunngavik ima aseqqukuutigisoq allaat suut tamarmik sussaajunnaalerlutik.
Kommuneqarfik Sermersuup nakkutilliinermut nalunaarusiaa kingulleq naapertorlugu amingaaterpaalussuit tikkuarneqarput.
Angajoqqaarsiaasinnaasut pissarsiassaanngillat – tamannalu paasilluarsinnaavarput, meeqqanummi angajoqqaarsialerneqarsimasunut ikiuisarneq ersinngigajappoq.
Naalagaaffiit Peqatigiit Meeqqat pillugit Isumaqatigiissutaat arlalitsigut suli unioqqutittuarparput, aamma sakkortuumik eqqarsaatigalugit meeqqat illersugaanissaat, toqqissisimanissaat, ulloqartarnissaat persuttaaffiunngitsumik, qinngasaarneqartannginnissaat aamma meeqqat ineriartornerisa ulorianartorsiortinnginnissaat.
Tamakku tamarmik toqqorneqartarput unitsinneqarallartarlutillu “ajunngitsup tungaanut ingerlagatta”.
Kingaappallaamilli ingerlasoqarpoq.
Innuttaasut ukioq manna arlaleriarlutik angalaarput akerliussutsimik takutitsillutik. Ilaatigut erseqqissaatigiumallugu meeqqeriviit ingerlanerlunnersuat, isumassuinermik suliallit suleruluttitaanerat, aningaasaliissutit ikippallaartut, sulisut ikippallaartut, suliniutillu atorsinnaasut ikippallaartut.
Aamma sullissineq taamaappaluppoq, qisuariartarneq kingaappallaarpoq il.il.
Ajorpoq.
Inatsisartunngorlaat inunnik isumaginninnerup iluani pitsanngorsaanissaq anguniarlugu nutaanik amerlanerusunillu aningaasaliisoqarnissaa pingaartissimanngilaat, Inatsisartuni ukiakkut ataatsimiikkatta siunnersuuteqaraluarnitsitut.
Aamma suliniutit nutaat aallartinnissaannut aningaasaliiumanngillat. Sulliviit nukillaarluinnartut aningaasaliiffigineqarumanngillat; akissarsiat pillugit isumaqatigiissutit, avataaniik ikiorneqarnissaq, meeqqat inuusuttullu naalliuttut immikkut ilisimasalinnik katsorsarneqarnissaat imaluunniit sinaakkutit pitsanngorsarneqarnissaat aningaasaliiffigineqanngillat. Aningaasanut Inatsimmi immikkut aningaasaliissutaasinnaasunik ersittoqanngilaq.
Akikippallaaqaaq taaguusiissalluni “Meeqqat Ukiuat” suli akikinaarineruneruvoq oqaannarluni “ajunngitsup tungaanut ingerlavugut”.
Assiliineq akeqanngilaq, peqataanillu kommuninut bloktilskudit ilanngarneqarmata taamaakkaluartorlu kommunit taamannaannaq suliakkersorlugit, aningaasartaqanngilluinnartunik, taava tusiattoqalissaaq assut oqaatsillu asuli oqaasiinnaallutik.
Naalakkersuisut; Qaa ila kommunit ikioriarsigit aningaasanik aamma aningaasat atorneqarlik MEEQQAT ikiorneqarnissaannut kiisalu inunnik isumaginninnermi suleqatigiinnissaq sallinngortilaariarsiuk.
Ajorsigaluttuinnartumut ingerlanerput ukiut 30-40-t kingulliit ingerlanerini ajunngitsumut saatinneqarsinnaanikuunngilaq. Massakkulli ilisimasaqarnerulernikuuvugut. Qaa pitsaanerusumik sulilaariaritsi!