Namminersorlutik Oqartussat pikkoriffigiuaannarnikuuaat meeqqat inuusuttullu ingerlalluannginnerat akiorniarlugu suliniutinik aallartitisarneq, sualummik meeqqat inuusuttullu kinguaassiutitigut atornerlunneqarsimatillugit. Tamanna inuiaqatigiinnut isumalluaammersitsiuaannarpoq, neriuutigineqartarluni ullut nuannernerulerumaartut. Ajoraluartumilli Tasiilami meeqqat inuusuttut ilaqutariillu taarsuarmut kaaminneqaqqipput.
Inunnik Isumaginninnermut Naalakkersuisoq nalunaarpoq meeqqat inuusuttullu sumiginnakkat sullinnissaannut immikkut aningaasaliisoqassamaanngitsoq naak tamanna pisariaqartinneqaraluartoq, immikkut aningaasaliisoqarnissaa pisariaqartinneqarmat suliniutit kinguneqarluartussat aallartinneqassappata.
Martha Abelsenilluunniit suleqataaffigerusunngilaa Tasiilami aalajangersimasumik sulisussarsiornissaq, taakkumi pisariaqartinneqarmata sumiginnaasarneq alliartorunnaarsikannerneqassappat.
Tamanna ikinnerussuteqarlutik naalakkersuisoqatigiit taakkununngalu amerlanerussusiisartut Demokraatit tunniutiinnarnerattut oqaatigisariaqarpoq. Pissaaneq maannakkut tigummigassiuk meeqqat atugarissaarneruleqqullugit iliuuseqarsinnaagaluarpusi, taamaakkaluartorli meeqqat atugaat pitsanngorsarumanngilasi. Meeqqat inuusuttullu siunissaraagut uangullu meeqqanut inuusuttunullu kiffartuussisussatut sipaarfigisussaanngilagut inuunerisa pitsaanerulernissaat pillugu aningaasaliinissaq pineqartillugu.
Louis (Looqi) Sigurdsen,
Siulittaasoq, Suleqatigiissitsisut Nuummi immikkoortortaani