Suleqatigiissitsisuni arlaleriarlunga oqaatigisarparput sulisussanik amingaateqartugut.
Suliffeqarneq matoqqalluinnartoq iluatsitsiviunngisaannarpoq nunami inukittuaqqami Kalaallit Nunaatut ittumi. Paarlattuanik ineriartorneq unissaaq.
Avataaneersunik sulisussanik pisariaqartitsivugut piginnaaneqarluartunik – AAMMA.
Inuutissarsiortut, atuarfiit, paaqqinnittarfiit, peqqinnissaqarfik il.il. ukiorpassuanngortuni sulisussanik amingaateqartuarput uangut sulisussanik ilinniartitsinitta nalaani.
Suliffeqarneq ammasoq aamma unammillersinnaasoq pilersinngikkutsigu allatut ajornartumik siunnersuisut atortariaqarpagut aamma kiffartuunneqartariaqarpugut sullinneqarluta Danmarkimi nunanilu allani najugalinit nunami maani immikkut ilisimasalinnik amingaateqarluinnaratta. Taakku akileraartassapput, pisiniartassapput attartornermullu akiliiisarlutik nunani allani – akileraarutit allatigullu isertitat nunami maani pisariaqartilluinnaraluarlugit pinngitsoortarpagut. Aamma sanilinit ilinniartinneqarnissaq piginnaasanillu ineriartortitsinissaq Kalaallit Nunaata ungataani piuartariaqassaaq.
Inuiaqatigiinnut kalaallinut iluaqutaanngillat. Aamma ineriartortitsinavianngillat siuariartortitsinaviaratillu.
Inuutissarsiortut kattuffiinit, Nationalbankimit allanillu suliat ataatsikkut amerlavallaat aallartikkutsigit suut tamarmik akitsoriartulissasut oqaluttuunneqarpugut.
Atagu erseqqissariarlara: suliat angivallaat ataatsikkut aallartereerpagut kinguneranillu suut tamarmik akitsoriartulissaqqaarput. Suliffissaaleqisut ikittuaraapput suliffissaaleqisullu sinneri inunnik isumaginnittuni ikiorneqaqqaartariaqarput ilinniaqqaartariaqarlutillu sulisinnaalissagunik. Taamaakkaluartoq Kalaallit Nunaanni sulilernissaq pilerinarsarnikuunngilarput suli aamma nunami maani sullivimmik ingerlatsinissaq.
Taamaasilluta ajornartorsiutit iluarsisinnaanngilagut imaluunniit nassuerutigisinnaanngilarput avataaneersut sulisussat pisariaqartillugit aamma tikisitat.
Tungiuineq isamikkiartuaarpoq aamma taamaattumik suliffeqarneq pillugu inatsisigut allanngortittariaqarpagut aporfiillu piiarlugit avataaniit suliartortut eqqarsaatigalugit aamma nunaqqatigut angerlarusuttut.
Atagu inuutissarsiortut ingerlatseqatigiiffillu namminneq aalajangeriarlissuk sulisussanik tikisitsissanerlutik, unammillersinnaajumallutik taamatullu aamma suliariumannittussarsiuussisoqartillugu neqeroorsinnaajumallutik.
Pingaarnerpaavoq inuiaqatigiinni sulisartut pisariaqartinneqartut PIGIINNARNISSAAT.
Iluarsartuussinissaq minnerpaamik makkunannga imaqartariaqarpoq:
* 2012 Nalikilliliinissamut malittarisassat 2012 sioqqullugu atuuttut
* Ingerlatseqatigiiffiit akileraarutaata appartinnissaa
* Nutaaliornerit pitsanngorsaanerillu sallliutinnissaat – aallarnisaasarneq kisiat pinnagu
* Suliartorlutik nuuttunut malittarisassat pisariinnerit
* Ilinniartitaanerup nukittorsarnissaa – tassunga ilanngullugit oqaatsit
* Inunnik isumaginninnerup nukittorsarnissaa
* Sulilernissamut kajumissaarutit pitsaanerulernissaat
* Sulisussaaleqiffiusuni illoqarfinni initaarnissamut periarfissaqarnissaq.
Taannarpiaq kisimi siuariartornissamut aqqutaammat.