Suliartorusuttunik mattussisarnerup ajornartorsiutaanera suleqatigiissitsisuni arlaleriarluta uparuartarnikuuarput tassunga atatillugu kinaassutsimik ingasattajaarluni illersuinerujussuaq qalliummat taamaakkaluartoq peqataanik pipallattumik aalajangiisarpugut soorlu assersuutigalugu mittarfiliortiternissamut tunngatillugu.
Suleqatigiissitsisuni arlaleriarluta sulisussanik amingaateqarnerput uparuartarnikuuarput. Sulisussanik akileraartartussanillu amerlanerusunik pissarsinngikkutta siuariartulernavianngilagut, siuariartornermi pisariaqarpoq mittarfiliassat akissaqartissagutsigit.
Killeqarfiit matuneqartarneri kusanartumik kinguneqanngisaannartussaapput nunani inukittuaqqani Kalaallit Nunaatut ittuni. Paarlattuanik ineriartorneq unissaaq.
Inuutissarsiortut, atuarfiit, sulliviit, peqqinnisaqarfik il.il. ukiuni arlaqalersuni sulisussanik amingaateqarnikuupput. Siornatigut aalajangiipallattarnerit allaat inatsisit atuuttut sanioqqutiinnarlugit pisarnikuupput ilaatigut tikisitat aamma suliartorlutik nuuttartut eqqarsaatigalugit (aamma taamaappoq Missingersuusiornermut inatsimmut atatillugu aningaasarsiornikkut tunngaviit eqqarsaatigalugit).
Siuariartornavianngilagut sulisussanik immikkullu ilisimasalinnik avataaniik tikisitserusunngikkutta. Aalisarneq qiviaannartigu. Kalaallit Nunaanni aalisakkat pisarineqartut ilaannaralanngui maani tunisassiarineqartarput. Aalisarnermik aallutaqartut akileraarutaat milliuunerpassuit Landskarsimut tuttalissagaluarput tikisitat tikilluaqqusalertuugutsigit.
Sulisartut piginnaanerillu nunatsinni pisariaqartikkatsigit – AAMMA.
Peqataanik tunngaviusumik ilisimasaqarnerup misissorneqarnissaa kissaatiginngilarput aamma kommunit ilaanni piginnaanngorsaqqinnissat killilersorneqarput soorlu ilinniartitsisut allallu eqqarsaatigalugit, akissaqartoqanngimmat.
Amiilaarnaqaaq tikisitanut tikilluaqqusinerusinnaannginnatta kiisalu kusanarnerusumik oqaloriaaseqarsinnaannginnatta. Tamanna itsarnisaavallaarujussuaarpoq.
Allatut oqaatigalugu; immitsinnut akorngusersortuarpugut tikisitat inuiaqatigiinnik kalaaliujunnaarsikkiartortitsinissaat ernummatigiinnarlugu.
Nunasinerit kusanarnerusumik tikilluaqqusalernissaannut pilersaarusiortariaqarpugut, oqaatsinut pikkorissamut periarfissat pitsanngorsartariaqarpagut aamma maanngarlutik suliartortunut
akuersaarnerusariaqarpugut inuiaqatigiinni ataqatigiinneq pigiinnarumallugu.
Tungiuineq isamikkiartorpoq, suliffeqarnerup iluani inatsisigut allanngortittariaqarpagut aamma nuullutik uteqqillutilluunniit suliartortunut inatsisit tulluanngitsut piiartariaqarpagut.
Nakkaakkiartuinnarpugut Naalagaaffeqatigiinnermut akerartuinerput piinnarlugu, avataaneersunut ersinerput piinnarlugu naak kissaatigigaluarlutigu ineriartortoqassasoq. Ataqatigiinngilluinnarput.
Tamanna Naalakkersuisutta aamma naalakkersuisoqatigiinnut ilaasut partiit ersarilluinnartumik takutereerpaat mittarfiliortiternissanut atatillugu tikisitanik sulisoqartariaqarnissaq pillugu immikkut inatsiliortariaqalernermikkut.
Tassungali ilanngunneqarsinnaavoq nunatsinni sumi tamani tikisitat amingaataammata, Naalakkersuisut eqqaamaneqaatissaminnik sanatitsiniarnerinnaaniunngitsoq.
Inuutissarsiortut ingerlatseqatigiiffiillu namminneq aalajangerlissuk qanoq atungaqarusunnerlutik, unammillersinnaaqqullugit aamma suliassanut neqeroortarsinnaaqqullugit.