Soorlu MIO-p eqqortumik oqaatigigaa, meeqqanut tunngasut pillugit angisoorsuarmik ajornartorsiuteqarpugut. Aningaasanik immikkoortitsiortorpugut aalisartunut piniartunullu, mittarfissuarnut akisoorujussuarnut, nammineq siunnersuutitsinnut iluartuaannanngitsunut inimi maani oqaluuserisatsinnut, meeqqalli inuusuttullu ajornartorsiutaasa ilungersunartut akiornissaannut sunnguamilluunniit aningaasaliinngilagut.
Taakku ajornartorsiuteqaqaat. Meeqqat nappaatipalaanik tunillanneqartarput. Meeqqat quarsaartinneqartarput angerlarsimaffimmi persuttaannernit, persuttarneqarnertik pissutigalugu, qinngasaarneqarnertik, kaannertik aamma sumiginnagaanertik pissutigalugu. Ajorluinnartumik sumiginnagaasarput.
Aningaasanut Inatsit qiviaraanni meeqqat atugaasa pitsanngorsarnissaannut kissaateqarneq sunnguamilluunniit aningaasartalerneqanngilaq. Killiliisa aamma pilersaarutit allat, saqqummiunneqanngitsulluunniit iluamik allanngortinneqartarput.
Politikerit assatik errortuloorpaat, oqalunniannguarlutik angajoqqaat perorsaanissartik artoraat. Taama oqaluttoqarnerata nalerpiaani meeqqat arsaarinnissutigineqartarput pisortanit imaluunniit angajoqqaarsialerlugit inissinneqartarput, meeqqat angerlarsimaffiannut inissinneqartarput, ikinngutini tukkusariaqartarput aamma kammalaatiminni, angerlarsimaffik tujorminarpallaarujussuaraangat – imaluunniit sumiiffissaqanngikkaangami tummeqqani sinnguttarput aqqusinerniluunniit angalaarlutik unnuaq naallugu ulluni akissarsivinni imaluunniit angerlarsimaffimmi aanngajaarniutinik sussaqanngikkaangat.
Nalunaarutit aamma apuussinerit kukkusumik arriippallaamillu suliarineqartarput, kommunit Namminersorlutik Oqartussanit ikiorumaneqarneq ajorput – aamma sulisussarsisinnaanngillat.
Kingunerisarpaa imminut toquttoqarnera, inuusuttut naalasseriitsunngornerat, asanninneq ilinniarnerlu paarisassaajunnaartarpaat aamma sumiginnarujussuarneqartarput. SOOQ aningaasaliiffigisinnaanngilagut? Sooq tikisitanik sulisoqarumanngilagut meeqqanik inuusuttunillu sullissisut ikiortigisinnaasaannik? SOOQ Namminersorlutik Oqartussat Kommunillu suleqatigiissinnaanngilluinnarpat?
Allaanngilaq pisortat ingerlatsinerat nammineq ingerlallualersinnaanngitsoq immaqami aamma kukkuallaarnerunngilaq sullissisut politikerillu inunnik isumaginninnermi sakkortoorsuit pisartut pissutigalugit kingunerlutsisarmata. Immaqaluunniit uangut politikerit paasisimanngilarput suliassaq qanoq pingaarluinnartigigaluartoq.
Ukiorpassuunngitsut ingerlareerpata nunarput ingerlannissaqanngilaq, inuerutaasarsimassaaq taamaallaat sanngiinnersagut kiserngorussimassapput imminnut ikiorsinnaanatik , siuariartorsinnaanatik ineriartorsinnaanatillu.
Meerartaqanngikkutta siunissaqanngilagut.
Meeqqat taama ajornartorsiuteqartigigallartillugit angisuumik ikiorneqartussaapput aamma inunnik isumaginneriaaseq allanngortittariaqarpoq. Massakkorluinnaq. Amerlanerit annaanissaannut akissaqanngilagut imaluunniit uummateqarnerusariaqarpugut – meeqqat amerlanerusut annaassanngikkutsigit.
Tamatta isumaqatigiissutigisariaqarparput nunami tamarmik atorneqartussamik iliuusissanut pilersaarusiornissarput. Ilisimariikkat tunngavigalugit. ANGERPARA sukkanerpaamik suliniuteqarnissaq aamma meeqqanut inuusuttunullu atugassanik aningaasaliisoqarnissaa.