Isumaqatigiinniartarnernut immikkoortup ulluni makkunani ukiunilu makkunani pakatsinaqisumik aqunneqarnertoq takuarput.
Perorsaasut socialpædagogillu ilungersorput ulluni naliginnarni inuunertik ataqatigiisinniarlugu aamma peqatigiiffimmik akiuulluarnerulernissaa anguniarlugu, perorsaasut sullivinnut allanut qimarrammata. Ilungersoqaaq ullullu tamaasa meerartagut paaralugit.
SIK-p isornartorsiorpai – pissusissamisoortumik – politikerit pingaarnersiueriaasiat aamma neqeroorutaat appasilluinnartut.
Peqqinnisaqarfimmi sulisut kattuffii, PK aamma PPK isumaqatigiinniarnerit kinguaattoorfioqisut nilliaatigiloorpaat allaallu peqqissaasut, sundhedsassistentit, aaviisartut, fysioterapeutit radiografillu akissarsiat sulinermilu atukkat pillugit isumaqatigiissutit imaat ilisimajunnaarpaat – qaammaterpassuarni kinguaattoornikuummata aamma pissaminnit 1 koruuninnguarluunniit suli takunngilaat….
Anstaltini betjentit taamatullu politiit isumaqatigiissutaannut tunngatillugu tusarfiginikuunngilarput danskkit politikeriisa oqaloqatigineqarnissaat aallartinneqarsimanersoq – taamaallaat naalakkersuisuusimasumit akisussaasumit Anton Frederiksenimit tusarnikuuarput “naapissamaartut” taannali maannamut allanit marlunnit kingoraarneqarnikuuvoq.
Naak pissutsit ilungersunartut qulaani takuneqarsinnaagaluartut Naalakkersuisut piumassuseqartorsuusimanngillat akissuteqarnissaminnut, taamaallaallu oqaatiginikuullugu isumaqatigiissutit “kinguaattoorfiunngitsut” (takuuk PK aamma PPK pillugit § 37 naapertorlugu apeqqutikka ilanngussami mailimiittut).
Sooruna taamak ajornartigisoq?
Akissaatit sulinermilu atukkat pillugit isumaqatigiissutit aamma taaneqartarmata “isumaqatigiissutit”. Tassa isumaqatigiissutit piffissaq eqqorlugu naammassineqartussat, sulisitsisut sulisartullu isumaqatigiissutissaat, qulaani pineqartunut tunngatillugu, pisariaqarpoq piffissaagallartillugu iliuuseqarnissaq aamma sioqqutsisumik iliuuseqarnissaq.
PK aamma PPK eqqarsaatigalugit suliumajunnaarsinnaanikuunngillat, qaammarterpassuarni salloqittagaanikuugamik oqaluttuunneqartarlutik “isumaqatigiittoqalersoq”. Ataatsimut isumaqatigiissutit nunatsinnut pingaaruteqarluinnarput, sulisartorpassuit pineqarput akissarsiamikkut pitsanngorsaavigineqartussat, siulliullugilli; isumaqatigiissuteqartoqarnissaa sulinerminni akissarsiatik pillugit.
Peqqissaasunut isumaqatigiissutit amingaataapput, peqqinnissaqarfimmi sulisut suleruluttupilussuupput, anstaltini sulisut quianaannartumik akissarsialupput aamma taamaapput perorsaasut SIK-llu ilaasortai.
Kisianni Namminersorlutik Oqartussat tatigisinnaavagut, kukkuluttornersuarmik iluarsinissaannut akisussaaffimmik tiguserusunngippata aamma piffissaagallartillugu isumaqatigiissusiortoqarnissaa qularnaarsinnaanngippatigit?
Kalaallit Nunaanni sulisitsisuni annersatut isumatigiinniarnernut tunngatillugu piffissaagallartillugu suliassaminik isumaginnissimanngimmata nunatsinni kalluarneqartut tamarmik nipituuliortussaagaluarput.
Pisut kusanaappallaarujussuaqaat.
Sulisartut sulisitsisutik tatigisinnaasariaqarpaat, soorlu aamma nunap Naalakkersuisuni tatigisinnaasariaqarai.
§ 37 – SAM: PK, PPK: https://ina.gl/documents/para3637/2018/svar/119_2018_Overenskomst_sundhedsvaesnet_TMAR_svar.pdf
§ 37 – polittit aamma anstaltini betjentit Kalaallit Nunaanni: https://ina.gl/documents/para3637/2018/svar/147_2018_Politiet_i_Groenland_TMAR_svar.pdf
§ 37 – Perorsaasut atugaat: https://ina.gl/documents/para3637/2018/svar/242_2018_paedagogernes_vilkaar_TMAR_svar.pdf
§ 37 – Nuna tamakkerlugu perorsaasunik amingaateqarneq, suli akineqanngitsoq:
https://ina.gl/documents/para3637/2018/spm/275_2018_Foerskoleomraadet_personalemangel_TMAR_da.pdf