Maaneeqqatigiippugut uummatitsinni anniaateqaratta. Annaasaqarnikuugatta. Inuuneq toqqaratsigu. Inunnik isumaginninnermi sukumiisumik iliuuseqartoqartariaqarpoq. Ikioqatigiittariaqarpugulli aamma. Qulliit kuupput. Uummativut attortisimapput. Assammik isaassinissaq artornarpoq. Maaniinneq artornarpoq. Pisariaqarporli.
Illit- pisariaqarputit. Illit- maaniittutit aamma illit kisimiillutit allamiittutit. Tamatta immitsinnut pisariaqartippugut, tamavitta. Immitsinnut iliuuseqaqatigiissinnaaqaagut.
Qinngarsuineq – aamma ersiortitsinerusoq – unitsitigu. Kannguttaatsuliornerit – unioqqutitsinerusut – unitsitsigit. Ajortisaarinerit, uumissuinerit, ajattuinerit malersuinerillu unitsitsigit, taarserlugillu asananninnermik, akuereqatigiinnermik, tullerput pillugu iliuuseqarnerunermik – ilisimanngikkaluaruitsigilluunniit. Ineriartorfiusunik peqataaffeqalersitsisa. Akuutitsilerfiusunik peqataaffeqalersitsisa.
Isumaqatigiissutigisigu naalliuuteqarneq naalliuuteqarnerummat. Qanorluunniit annernartigigaluaraangat – naalliuuteqarneq inuunermut ilaavoq. Naalliuuteqraneq piviusuuvoq. Soorlu aamma asanninneq piviusuusoq.
Eqqaaseqatigiitta qanorluunniit taartup pissaaneqarfianiikkaluaraangatta , tarnitta erloqiffiginerpaaffianiikkaluaraangattaluunniit – taava naalliuuteqarfiuinnarpoq. Naalliuuteqarfiuinnarpoq – qaangersinnaasarput. Pakkuteqatigiinnikkut anigugassaq. Qulliit kuunneratigut aniguiffissaq.
Inuunermik ingerlaannarnitsigut aniguiffissaq. Naalliunneq pivisusuummat. Soorlu asanninneq piviusuusoq. Ajunngilaq.
Sanngiitsuunngilatit qullitit kuummata, anniaateqaravilluunniit. Asanninneq pisassarivat aamma inuuneq aqqusaarsinnaasat. Tamaakkoqqissaat, illerpiaq inunngoravit. Misigisassarpassuaqarpoq, inuit, asanninneq, nerineq, atoqatigiinneq, erinarsorneq allarpassuillu misiginngitsuugassat toqu toqqarutsigu. Inuuneq toqqartigu. Naak artornartunik maannamut misigisitsisaraluartoq.
Ataatsimut immitsunnut nukkassarsinnaavugut. Neriorsuisoqarnikuunngilaq inuuneq oqitsuinnaassasoq.
Inuuneq allanngorartuuvoq, pilluarfiulluni aliasuffiullunilu – inuit asasavut, inuillu qinngarisavut, uagullu nammineq aamma inuit inuuneranni teqqalaqataasutut pilluta – imaluunniit kisimiilluta taartumi nipitaqanngilluinnartumi. Ataannartariaqarporli
Meeqqat anniaatillit ilagaannga. Meeqqat uiernerup iluani inuuneqarsimasoq. Inuusuttut ilaat qinngarsorneqartoq, ajattugaq kukkusaasutullu taagugaq. Toqusoqarnera misigereerpara, naalliuuteqarneq qaangersinnaasorinngisara. Isumaqaraluarpunga naalliunneq qaangiutinngisaannassasoq. Soqutiginninnginerup, misigittaassutsip naalliuuteqarnerullu illua’tungerivai qanilaarneq, attaveqarneq, asanninneq, illarneq – imaluunniit issiaqatigiineq, ingerlaaqatigiinneq, oqaloqatigiinneq nipangersimaqatigiinnerlu.
Aliasunnermut, atornerluinermut, kinguaassiutitigut atornerlunneqarnermut annaasaqarnermullu illersuutaasoq nukittunerpaaq tassaavoq inoqammut ataqateqarneq, Uaguulluta. Ataatsimut.
Ajunngilatit, illerpiaatillutit.
Tamanna siammartertigu allaat tusanngitsoorneqarsinnaajunnaartivillugu. Ajunngilatit, illerpiaatillutit, pisariaqartippatsigit, pisariaqartipparma – nakkaleraangatta peqataaffeqarniarlutalu ikiortikkusulluta assatsinnik isaassisinnaaneq pisariaqartipparput.
Tamatta maaniittugut, sinerissap sinnerani aamma katersuuttugut: Ingerlariarneruvugut aallartittoq: Neriorsorpugut tarnitta quppaanik asanninnermik immersuiniarluta. Inunnik isumaginninnermi suliniutit pingaarnertut salliutinneqarnissaat sorsuutigissavarput. Tamatinnut inissaqassammat.
Inuuneq ajugaassaaq.
Una sorsuutiginninneq ajugaassavarput.
Ataatsimut nukittuneruvugut.