Kalaallit Nunaanni landskassemiit aningaasanik atuinerulersinnaanissamut biilit sarfatortut hybriusullu aallerfiussanngillat.
Qularnanngilaq taakkuninnga tunisinerit ikilissammata, maannami inuiaqatigiit biilinik sarfatortunik atuinissamut suli piareersimanngillat.
Akitsuut maanna Aningaasaqarnermut Akileraartarnermullu ataatsimiititaliaani ilaasortaaffigisatsinni suliarineqaleruttorpoq, oqaatigissavarpullu akitsuutip pipallagaasup piviusunngunnginnissaa sorsuutigissagatsigu.
Inussutissarsiuutit avatangiisinut asattuussinerunissaannik biilinillu nutarterinissaannik piumasaqarfigisinnaanngilagut kinguninngualu akitsuummik mikigisassaanngeqisumik artukkerlugit. NaaggangaatsiaqKangaatsiaq.
Oqimaassuseq tunngavigalugu akitsuusiineq atuutsilerniaraanni ingerlatiinnartumik biilinik sarfatortunik atorunnaartitsissaagut, sarfatortummi biilit biilinik nalinginnaasunit oqimaannerujussuupput, eqqussuinermilu akitsuummik qaffaaniaraanni, tamanna immikkuit suliartineqartariaqarpoq, taamaalillunimi atuisut ilisimasussaassavaat sunarpiaq pineqarnersoq.
Nunatsinni biilinik nutaangitsunik mingutsitseqisunillu peqarpugut, tamakkua ajornanngitsunnguamik iluaqutaasumik avatangiisinut asattuussinerusunik taarserneqarsinnaapput.
Eqqussinermi akitsuut oqimaassuserlu tunngavigalugu akitsuut siunnersuutigineqartumiipput. Siullertut biilit sarfatortut oqaimaannerujussuupåput, tulliatullu biilit sarfatortut erngup nukinganit avatangiisinut asattuussisumit ingerlateqarput.
Siunnersuuutigineqartumittaaq nalinginnaasumik akitsuutit qaffanniarneqarput – nipikilluinnartumik.
Tamanna Suleqatigiissitsisunit peqataaffigisinnaanngilarput.
Aningaasameerneq patsisigalugu aaqqiipallannertut akitsuusiisarneq qimattariaqarparput –uanilu siunnersuutigineqartumi avatangiisinik mianerinninneq akiliutaassaaq, biilitoqqanillu mingutsitsinerusunik taarsiinissaagaluaq aamma qatangiinnartinneqarpoq.
Avatangiisivut sussakkeerpagut innuttaasullu sumiginnarpagut tassanngaannartumik biilinut sarfatortunut akitsuusiinitsigut. Allannguisariaqarpugut avatangiisinullu mianerinninnerulluta, meerartavut pillugit.
Naalakkersuisut nikinneranni tamani aningaasanik aallerfigisassanik ujartuilersoqartarpoq mittarfinnut, ataatsimiittarfinnut allanullu pingaarpianngitsunut aningaasaliiniarnermi, uffa innuttaasut tarnimikkut ikiortariaqartut, sakkortuumik nalaataqarnerup kingunerisaanik ikiortariaqartut inigisaminnilluunniit ikiorneqarnissaminnik pisariaqartitsisut ikiorserneqarsinnaanngitsut.
Unikaallattariaqarpugut misissorluarlugillu pisortaninngaanniit tapiissutit suut sipaarfigisinnaanerigut. Suut ineritaqarsinnaappat suut ineriataqarfiunngillat, siunissarput qanoq takorloorparput? Avatangiisitsinnik asattuussinerusariaqarpugut.