Advarsel: Heavy read. Possible trigger content. Tallimanngormat siullerpaamik toqqaannanngikkaluamik attorneqaatigisannik imminut toquttoqarmat eqqarsaatigisimavara qanoq allassanerlunga. Politikkimi allannissaq ajornaatsuaraavoq aamma aaqqiissutissat takusinnaanissaat taamatullu aningaasat allamut atorneqarnissaannut kissaatinik nalunaaruteqarnissaq nalorninanngilaq.
Ajornarnerpaavoq inuttut oqaaseqarnissaq. Minnerunngitsumik uannut. Sapaatip akunnerata naanerani inuk ilisarisimasara imminut toquppoq. Taanna inuppassuit ilisarisimalersimasama nuannarilersimasamalu ilangaat.
Inuit aalajangeraangamik nuna manna qimanniarlugu,qanigisaanut kisimik eqqorneqarneq ajorput, inuiaqatigiilli tamarmik eqqorneqartarput. Annilaanganartoqartuaannarpoq allaaserissallugu eqqartussallugulu imminut toquttarneq. Tulleriiaarnerat unippa? Allanik malinneqassava?
Annappugut – uangut inuuginnarusuttut, naak aamma assigiinnik ajornartorsiuteqartaraluarluta – qimataasarpugut eqqarsaamasagut pigalugit, eqqarsaatigisarparput ikiuunnerusimasinnaagaluarnerluta, aperinerusimasariaqaraluarnerluta, imminut toquttut ikiornerusimasariaqaraluarnerlugit. Imaluunniit suna tamarmi imaaruttuusisarpoq oqaasissaaleqisarlutalu misigissutsit kingorna takkuttut pillugit. Ilioriusissaaleqineq, kiserliorneq, pisuutinneq, kamak, aliasunneq, amingaateqarneq aamma ersineq. Takusimasinnaagaluarnerlutigu? Iliuuseqarsimasinnaagaluarnerluta? Iliuuseqassaagut? qimagaasut qanoq oqarfigineqartarpat? Qanoq ippunga. Qanigisakkamita qanoq ippat?
Uanga allatulli – qimagaasutut allassinnaavunga. Amerlasooriarlunga qimagaasutut. Inuusunnerugallarama kamattarpunga, misigittaannerulersarpunga, sukanganerulersarpunga, aliasunnera akiorsuaartarpara aamma kamattaqaanga inuit sioqqutsillutik qimangukkusuleraangata. Inersimasunngorama pisuusutut misigisimasarpunga eqqarsartarlungalu qimaguttut aliasuutaat aliasuutigisariaqarlugit aamma misigisimasarpunga nassatarissallugu. Puigortariaqarnagu. Ersigisarpara inuunissara aamma illarnissara ingerlaqqinnissaralu. Qimagaasutut misigisimasarpunga, ilagiumaneqanngitsutut, allat pallinnissaannut mattuttarpakka, aliasunneq pitillugu artornartaqimmat.
Ukioqqortunerulerama; paasivara allat artorsaataat ersussinnaanagit. Kisiani oqilisaassinnaavakka, naapikkaangatta nukissaqartillungali.
Paasinikuuara imminut siulliuttariaqarlunga aamma imminut siulliullunga paarisariaqarlunga – taamaallaat ikittunnguani pisuni ilungersuanerusariaqarfinni aamma akiliisarpunga qasuersaarnikkut aamm uangavik nassaariniartarpara. Paaseqqinnikuuara ikiortissarsiorneruguma, pakkunneqarusukkuma imaluunniit sianerfigitikkusukkuma qianinni – taava peeruttut kingorna, asanninneq takkuttarpoq immerlungalu.
Akuersigutta. Akuerseqqaartariaqartarpugut aamma inunnut ajunngitsuliorusuttunut tatiginnilluta takutitsisariaqartarpugut, taakkumi nassaariumaarpaatigut aamma inuunermi aliasunnartorsuarmik misigisaqareernitsinni allornerit ataasiakkaarlugit nikuikkiartortarpugut. Paasisinnaavara inuit ammarnissaminnut ersisarmata.
Qinngasaarisoqartarpoq, mattussisoqartarpoq, soqutigisaqanngitsoqartarpoq aamma paasinnikkumasoqarneq ajorpoq, misiginneqataanissamut nalorsartoqartarpoq – aamma inuiaqatigiinni sualummik ikittuni mamarliisoqartarpoq eqqartuussisoqartarlunilu aamma inuit aliasuttut, matoqqasut ersisullu allat kingunipilutsitsineri sorsuutigisariaqartarpatit. Kisianni. Taakku saneqqutiinnakkit illillu peqatissatit nammineq nassaaralugit – qanorluunniit eqqumiitsigigaluarpat, paasiuminaatsigigaluarpat allaanerutigigaluarpalluunniit. Arlaanniipput. Inuiaqatigiinni ilaqutariinnik pingaartitsisuni, artornarnerusaqaaq ilaqutariit iluanni imminut toquttoqaraangat imaluunniit ilaquttanik annertoqqutissaqanngikkaanni, aliasunnerup takkuffiani.
Tamarmik ajungillat. Aamma aliasunneq ajunngilaq aamma suut tamarmik ajorfianni ingerlaqqissinnaanngitsutut misiginermi. Imaluunniit misigissuseqannginneq piusinnaavoq aliasunneq pissutaalluni imaluunniit annilaanngatigineqarsinnaavoq angorusutat angusinnaannginnerat.
Inuppassuunngillat avitseqatiginnittartut kisianni tamatta inuunitsinni piffissani assigiinngitsuni tassaniittarnikuuvugut. Inuuneq oqittuinnaaneq ajorpoq aliasuffeqartarpugut. Ilaannikkut ima artornartigisarpoq qaangigassaanngitsutut isumaqarfiginartarluni. Nalunngilarpulli; inuit sanngiitsut, imaluunniit sanngiilliortuartut, ulorianartorsiornerusarput, napparsimakulanerusarput, ajortunut qaninnerusarput il.il. Taamaattumik isumalerujussuuvoq orlusimasunut, arlaata assamminik kissartumik isaassinissaa qaqillugillu. Taamaaliortoqarsinnaavoq qungujulalluni illarluniluunniit, eqitaarisoqarsinnaavoq qanilaartoqarlunilu, nerisassanik sassaallertoqarsinnaavoq oqaasertaliisorsuunngikkaluarluni, sivisuumik oqaloqatigiittoqarsinnaavoq, unnuisoqarsinnaavoq ikinngutit arnaqatillu ilagalugit imaluunniit biilertoqarsinnaavoq kaffisoqatingiittoqarlunilu. D. Inuppalaarnissamut iliuuserineqarsinnaasorpassuupput aamma ikiueriaatsit suli amerlanerusinnaapput. Uanga misilittakkani ajornersaavoq, naassaanngitsumik nipaarluuneq.
Ilaannikkut oqaasissaaleqisarpugut qimataasunut kisianni aamma ajunngilaq. Misiginneqataaneq allatigut takutinneqarsinnaavoq. Annilaanganeq pissutigalugu takkutinngitsoorani.
Uanga nammineq pisoq pimmat, imaaruttutut misigivunga. Eqitaarisinnaanaga, oqaasissaaleqillunga aamma allat aliasunneruat qatsulluinnaqqavara. Tamatumuuna ikiunissannut nukissaalatsivunga. Tamanna ajuusaarutigaara. Paarlattuanilli imminut eqqaasippunga immaqa pakkutaarinnissinnaasut peqatigisinnaallugit, illarsinnaasut aamma qanilaarnissaminnut nukissallit, ataqqivara siunissami nammineq tunniussassaqarnerussagama.
Nittaalat angisoorsuit Nuummi maani nakkaasut isiginnaarpakka ullumi. Nipit tamarmik sakkukillippput, suut tamarmik qaqortipput aamma suna tamarmik qallerneqarpoq, inuunerlu ingerlaqqippoq naak angerlarsimaffini aliasuttoqaraluartoq angisuumik aamma maani Nuummi inoqarpoq, nunattalu sinnerani aliasunnermik suugaluartumilluunniit misigisaqartunik. Eqqumiippoq Inatsisartut ataatsimiittarfiani assortuuterujulluni, annuttut isigalugit, biilit saneqquasut isiginnarlugit, meeqqat illartut suliarlu nangillugu naak qamani ilorpianni nipaalluinnaraluarlunga.
Inuunerup nalliuttorsiutingerujussuarusullugu misigisimavunga. Inuillu qinnuigalugit suarsuit pingaartikkunnaassagaat. Allaffimmiuissuit qatsuteqqaqaakka, assortuunnerit, inuit soqutigisaqanngitsut allanik nakkarsaasut. Nipaatsumiikkusulluinnarpunga. Atorfik kukkusoq tassanerpiaq atorfigaara. 
Ikinngutinnut pakkuteqqussaanga qanilaaqqullugillu, oqaloqatigiumassavakka aamma asanninneq qaaqqussavara issiallungalu nipaatsumik pisariaqartitara naapertorlugu sivisussusilimmik, misigissutsip imaqanngitsup aanngariartornissaata tungaanut.
Taava misigissuseq imaqanngitsoq immissavara inuunermik, asanninnermik aamma qanilaarnermik.
Neriuppunga amerlanerusunik annaasaqassanata aamma neriuppunga ilaannikkut unikaallalluta immitsinnut qiviartassasugut paasillugulu asanninnermik amingaateqartunut asanninneq takkuttarumaartoq aamma allanut isaassineq inuunermut pingaaruteqarluinnarmat.
Inuuneq ingerlaqqissaaq allat peerunneranni, tamanna pisariaqarluinnarpoq. Aamma inuupassuit uangut sioqqulluta artorsartarnikuupput, taakku aperisinnaavagut qanoq ingerlaqqittoqartarnersoq.
Inuuneq ajungaajuaannartariaqarpoq, inuuneq naleqaqaaq aamma tamatta artorsartarpugut aamma inuunitsinni inuit qasunartut siumortarpagut. Aammali ataatsimoorutta nukittussaagut.
Tassa eqqarsaatikka annaasaqaqqinnerup kingorna. Qimagaasut eqqarsaatinik asannittunik nassippakka, attorneqartut aamma inuit artorsartut. Misiginneqatigigaarpassi. Asanneruttoq immerlisi.