2016-mi 4445-mi nappaatipalaanit tunillanneqarput. Taakkunannga 62- t 14-t inorlugit ukioqarput! 62-nit arfineq-marluk meeraapput tallimat qulingiluallu akornanni ukiullit.
Meeqqat arfinillit tallimaniik qulingiluanut ukiullit klamydiarput aamma alla meeraq tallimat qulingiluallu akornanni ukiulik gonorrerpoq.
Suliat meeqqat nappaatipalaarnerannut tunngasut amerliartorput.Naluara kiisami paasineqartalernerat imaluunniit paasiniaallaqqissisimanerput pissutaanersoq naluara.
Qineqqusaarnermi tamaavitta neriorsuutigaarput ikioqatigiilluta akiuniarluta. Tamanna ilumooruteriartigu inatsisiliuinnarata kinguaassiutitigut persuttarneqarsimasut illersorluarnerunissaat pillugu.
Suleqatigiissutigeriartigu immikkoortumut aningaasaliissuteqarnerunissatta pingaarnerutinnissaa, nunarsuarmioqatigiinnut suleqataanissarput aamma Naalagaaffeqatigiit iluanni, landskarsimi aningaasaatigut atorlugit. Kanngunaqisumik aserorterisumillu inunnut allanut persuttaasarnerup, sualummik meeqqanut inuusuttunullu akiuineq tassaavoq siunissami aningaasaliissutini akilerluarsinnaanerpaasussaq.
Innersuussutigaarput
Naalakkersuisut kaammattorusuppagut meeqqat kinguaassiutitigut atornerlunneqarsinnaanerannut kannguttaatsuliorfigineqarsinnaanerannullu illersuinissaq pillugu Europarådip isumaqatigiissutaa sapinngisamik piaarnerpaamik atuutileqqullugu.
Nunarsuarmi ilitsinnut takutitsinissaq pillugu aamma nunarsuarmioqatigiit iliuuseqarneranni suleqataasinnaaqqulluta taamatullu nunarsuarmi nunat suulluunniit suleqatigisinnaalerumallugit meeqqat inuusuttullu internettimi atornerlunneqartarnerisa akiornissaat pillugu.
Ilitsersuutinik nakkutilliisussanut sanasariaqarpugut aamma qularnaartariaqarparput sullissisut aamma peqqinnissaqarfimmi allat isumassuisut, inunnik isumaginnittut, kommuunini aamma innuttaasut pinngitsooratik pigisariaqangaannik, ersarissarlugu allannguutit suunersut aamma qanoq inatsit atortussanngortinneqarsinnaanersoq.
Atortussanngortitsineq taamatullu sullissisunut, nalunaaruteqartunut, meeqqerivinnut aamma inersimasunut ilitsersuusiortoqarnissaa pinngitsoorneqarsinnaanngilaq inatsit sunniuteqarluassappat.
Nassiusseriarta pinaveersaartitsinermut atortunik kiisalu kannguttaatsuliortarnermut paasititsiniutinik aamma kanngutsaattuliornerit qanoq pinaveersimatinneqarsinnaanerannut taamatullu meeqqerivinnut tamanut nassiullugu sumut saaffiginnittoqarsinnaanersoq pasitsassimagaanni kanngutsaattuliortoqarsimasoq aamma inunnik isumaginninnermut ikiortit, meeqqerivinni ikiortit allallu ilinniarsimanngitsut meeqqatsinnik paarsisussat ullumininnguit atorlugit pikkorissartigit tunngaviusumik eqqiluissarneq pillugu kiisalu suut ernummatigisariaqarnerit allallu iliuuserineqarsinnaasut.
Paasisaqarnerorusukkuit una attavigiuk: tmar@ina.gl; +299 27 49 27 – Tillie Martinussen