Nunami maani aqutsisut nutaat aallartinnerat paatsiveqarsimanngilaq.
- 37 naapertorlugu apeqqutit asuli akineqartarput tamannalu pingaakujunniarnertut oqaatigisariaqarpoq.
Allaanngilaq Naalakkersuisut nutaat sungiunniaqqaartariaqarsimagaat inatsisiliortuni amerlanerussuteqartut naalakkersuisuutitaqarnissaat tunngaviusumik isumaqarmat innuttaasut partiillu apeqqutaannik tamakkiisumik akissuteqartarnissat taamatullu innuttaasunik sullissinissaq – aamma isumaqarpugut sapinngisamik amerlanerpaanik isumaqatigiissuteqartitsisarniarluni oqalunneq tamanillu suleqateqarnissamik oqalunneq asuli oqaasiinnaasut. Neriuppugut piviusunngorumaartut.
Suleqatigiinneq pisariaqarpoq nunami taama inukitsigisumik kusanartumik ineriartortitsisoqalissappat.
Suleqatigiissitsisuni immikkut maluginiarsimavarput Kalaallit Nunaat qimallugu nuuttartut amerlalluinnartut, Peqqinnissaqarfimmi sulisussarpassuarnik amingaateqartugut, immikkoortuni pingaarutilinni sulinermi atukkat akissarsiallu pillugit isumaqatigiissutit annertuumik kinguaattoorfiusimasut, nalunaarutini takuneqarsinnaasoq silami persuttaasarnerit ingatsikkiartortut – aamma inuit atungarliorput taamaakkaluartorli Naalakkersuisunit ikiorneqanngillat.
Kommunit imminiiginnarneqaqqapput. Imminut toquttartut, kinguaassiutitigut atornerluisarneq, persuttaanerit aamma kanngutsaattuliortarnerit suli amerlaqaat – aamma innuttaasut ajornartoorfimminni ikiorneqarnissaminnut pisariaqartitsipput, pikkorissunit ilinniarsimasunillu ikiorneqarusupput iliuuseqarfigineqarlutillu.
Amerlaqisut atungarliungaartut ukiorpassuarni suneqarneq ajorput, ingerlariaqqissinnaanatik naak qineqqusaarnerup nalaani neriorsuigaluartugut iliuuseqarumaarluta, maannamullu suli pilersaarutinik takusaqanngilagut, suleqatigiinnissamut piareersartoqanngilaq imaluunniit tigussaasumik aallartittoqanngilaq inuit tamakku amiilaarnartumik misigisaqarsimasut sullinniarlugit. Suli ikiorneqanngillat. Neriuppugut Naalakkersuisut siunnersuusiorlutik aallartissimassasut aamma tamanik suleqateqarnissaminnut piareersalersimassasut inuit ikiorneqarnissaminnut pisariaqartitsisut ikiorniarlugit aamma inuttut peqqissutsikkullu ajornartorsiuteqartut ikiorniarlugit.
Uangut piareersimavugut suleqateqarnissatsinnut.
Peqataanik aalisarnermut inatsit, mittarfiit aningaasalersornissaat kiisalu nunanut allanut Naalagaaffeqatigiinnermullu politikki tukattumik ingerlanneqarput. Naalakkersuisut aaqqiissutissat nipaarsaaruppaat innersuutigiinnartarlugillu suliniutit pioreersut naammaqqajanngitsulli.
Nunatsinnut nuuttunut sukangasuumik pissusilersussanngilagut paarlattuanilli tunngavissittariaqarparput nunasisut ingerlalluarnissaat aamma tikilluaqqusaasutut misigisimanissaat – aamma maaniiginnarnissaat nunaqavissunngornissaallu. Peqqinnissaqarfimmi, kingutileriffinni, ilinniartitaanermi, pisortani namminersortunilu ilinniarluarsimasut pisariaqartippagut aamma meeraaqqerivinni, meeqqerivinni allanilu.
Akileraartartut amerlanerit pisariaqartippagut aamma ilinniarluarsimasut amerlanerusut – inuerusaanissaq akissaqartinngilarput.
Aamma meeqqat siunissaat immeraassutigiunnaartariaqarparput ilungersorlutalu sulissutigalugu meeqqat inuusuttullu atungaasa pitsanngorsarnissaat. Sualummik meeqqat atuarfiani piffissaq ungasinnerusoq isigalugu iluarsiissutissanik eqqarsartariaqalerpugut qularnaarumallugu inuusuttut siunissami ilinniartalernissaat, pingasuinnik oqaaseqalernissaat qularnaarlugu ilinniarnerminni atugassaannik, kulturiminnik piujuartitsinissaminni atugassaannik aamma nunarsuup sinnerani inooqataanerminni atugassaannik.
Taamaallaat taamaaliorutta qularnaassavarput peqqinnartumik nunarsuarmioqataanissaq, nammineq kulturi oqaatsillu isumannaatsumik tunngavigalugit – siunissamilu aqutsisussagut isumannaarlugit. Ilinniartitaanerup iluani suliniutit pitsaasut amerlanngitsut saqqummiunneqarput. Taamaakkaluartorli qilanaaraagut.
Meeqqat inuusuttullu aamma innuttaasut ulorianartorsiortut, inuttut ajornartorsiutillit, innarluutillit, tarnikkut ajornartorsiutillit taakkulu ilaqutaasa ikiorneqarnissartik annertuumik pisariaqartippaat – aamma naliginnaasumik peqqissuunissaq, ineriartornissaq perorsaanikkullu pisariaqartitsineq eqqarsaatigalugit. Neriuppugut aaqqiissutissat politikerinit assigiinngitsuneersut, aamma immikkoortuni assigiinngitsuneersut piviusunngorumaartut, tassunga atatillugu kissaatigaarput Namminersorlutik Oqartussat kommunillu piviusorsiortumik suleqatigiinnerunissaat – aamma Naalagaaffeqatigiit iluanni.
Qaa ila suleqatigiiffiusinnaasut pioreersut atorluariartigit.
- 37 naapertorlugut apeqqutigisarsimasannut maannamut akissutaasut takutippaat kommunit naalakkersuisullu attaveqatigiinngitsut. Kikkut tamanna ajoqutissarsivigissavaat? Soorunami innuttaasut ulorianartorsiortut.
Illoqarfinni ilinniarfilinnit kollegiani inissarpassuit suli amingaatigineqarput, sualummik Nuummi aamma illoqarfinni minnerni nunaqarfinnilu siuariartorusuttuni, annertuumik inuutissarsiornikkut ineriartortitsinissaq amigaataavoq. Ineriartorneq pivisusorsiortoq amigaataavoq.
Takoreerparput qanga ineriartortitseriaatsip, Landskarsimit akilersorneqartutut taaneqarsinnaasup, atorsinnaanngissusaa atasinnaasimanngissusaalu – taamaattumik illoqarfinni minnerni nunaqarfinnilu imatut iluaqusiinikuunngilaq, nakimaannerulersitsinikuunngilaq ineriartortitsinikuunanilu – imaluunniit akimanerulersitsinikuunngilaq.
Inuttut ajornartorsiutit nunami maani iluarsiniakkagut asuli ersarinneruliinnartarput sumiiffinni pineqartuni.
Inissaqarniarneq sunnguamilluunniit tusarfiginikuunngilarput naak inissaaleqinersuaqaraluartoq.
Illut sulliviillu isateriaannaat aamma oqummik ulikkaartut ilaqutariinnullu peqqinnanngilluinnartut nunami maani ajornartorsiutigaagut, sulinngitsoortitsisarput aamma inissaaleqilersitsisarput angerlarsimaffeerutsitsisarlutillu. Iluarsiissutissanillu sunnguamilluunniit suli saqqummiussisoqanngilaq.
Tassani najukkani namminersortut suliassarpassuaqarsinnaagaluarput – mittarfiliortiternerimmi aalisapilunnerlu kisimik tunngaviusinnaanngillat. Piujuaannartitsinissaq, piffissaq ungasinnerusoq isigalugu iluarsiissutissat, mingutsitsinikinnerulernissarlu suli tusarfiginngilagut.
Akitsuutit, akiliisitsiniarnerit aningaasartuutillu tusakatappagut taamaakkaluartoq innuttaasut pisariaqartitaat pillugit ataatsimoortumik pilersaarummik suli tusagaqanngilagut aamma piffissaq ungasinnerusoq isigalugu aningaasalersueriaasissaq pillugu qarluallattoqarnikuunngilaq. Inissaaleqinersuaqarpoq aamma sanaartukkatigut kinguaattooqqaqaagut, iluarsaassisarnissaq aserfallattaaliisarnissarlu kingulliunnikuugatsigit. Iliuuseqarluartariaqarpugut tassani pisariaqartitalli pillugit aamma suli qarluallattoqanngilaq. Naalakkersuisut ersarissuliorlutik saqqummiussinissaat utaqqiuarsinnarparput.
Suleqatigiissitsisuni isumaqarpugut kiniiserinik aningaasalersuititsinissarsuarmik eqqarsarneq tulluanngitsoq eqqarsaatigilluartariaqartorlu. Qarasaasiamimi ujaarliut google atorlugu takuinnariaavarput Kina inuit pisinnaatitaaffiinut qanoq isumaqarnersoq, Kina Tibetimut qanoq pissusilersornersoq kiisalu nunanut minnernut “akiitsoqarlualersimasunut” aningaasat sakkugalugit qanoq tiguaasarnersoq.
Minnerunngitsumik nalunngikkallartillugu naatsorsuutigisamit aatsitassanik qaqutigoortunik peqarnerorpasittugut qularnaanngitsumik akiitsunik naafferaalluta akilersuinissatsinni isumalluutigineqarpasittunik….
Tassungali atatillugu atagu nunani killerni suleqatitoqqagut kiisalu Naalagaaffeqatigut suli annerusumik suleqatigilluaannariartigit.
Naalakkersuisut pimoorussinerusariaqaraluarput, niviimiataaginnarlutik isumatoqqatik illersorunnaarlugit. Kukkuneq kanngunanngilaq innuttaasut illersornissaat pingaarnerusariaqarmat.
Naalakkersuisut nersualaassavagut sorusummata – suleqatigiinnerli amingaatigaarput, amingaatigaagut aalajangiinerit pissusiviusunik tunngavillit taamatullu naleqqat. Naalakkersuisunut pitsaassagaluarpoq inuppalaarnerusuuppata, ammanerusuuppata suleqatigiinnerlu pilersillugu. Kalaallit Nunaata tamanna pisariaqartilluinnarpaa.
Aap, ajornaatsuinnaanngilaq taamaakkaluartoq paaseriartigu innuttaasut sullittussaagatsigit, uangutsinnuunngitsoq.
Inuiaqatigiit suliniutit pitsaasut suulluunniit amerlanersaat qujaruttarpaat aamma innuttaasut taakkorpiaat ullut tamarluinnaasa nunarput ingerlappaat.
Tusarnaarusuppugut peqataarusullutalu. Aggersarneqaannartussaavugut.