Kangerlussuaq dollarimik ataatsimik akilerlugu pivarput Kangerlussuaq qanga angallanikkut inissisimalluarallarmat aamma eqqatsinni sillimanissamut ikorfartueqataanissarput pillugu. Mittarfik pissutigalugu Danmarkimit ukiut tamaasa aningaasanik pisarpugut aserfallattaaliinermut sulisullu akissarsiaannut atugassanik, ajoraluartumilli aningaasat taakku Naalakkersuisut kingoraattaattut allanut atorfissarinngisaannut atortarsimavaat. Taamaattumik Kangerlussuup aserfallattaalinissaanut malinnaasinnaajunnaarsimavugut. Taamaattumik ullutsinni nunarsuarmioqataasutut pisussaaffigut naammassisinnaajunnaarnikuuagut.
Kangerlussuup inissisimaffianut pissutaavoq sakkutooqarfiunera, kisianni mittarfimmik inissiinermi inuinnaat angallannerminni pisariaqartitaat aamma angallanneq Kalaallit Nunaata ineriartornissaanut ikorfartuisussaq eqqarsaatigineqarsimanngillat. Ullumikkut Kalaallit Nunaanni mittarfik nunarsuarmi angallannermut qitiusoq suut tamarmik qeqqannut inissinneqarnavianngilaq – nunarsuarmi kangerluit isorartunersaasa qinnguanut aamma illoqarfiit pingaarnersaaniit akunneq ataaseq sinnerlugu timmeqqaarluni tikinneqarsinnaasumut.
Mittarfik 3 kilometerisut takitigisoq imaluunniit suli takineq Nuummi, sakkutooqarfittalik aamma nunatsinni sakkutooqarfimmit akileeqataaffigineqartoq pissutaalluni aamma uangut nunap iluani sillimanissakkullu politikki pissutigalugu tigussaasumik akisussaaqataasariaqarpugut, Issittumi sillimanissaq pillugu apeqqut issiaqataatilluta isumaqatigiinniarnerni suleqatitsinnut ilitsinnullu uppernassuseqassagutta.
Sakkutuunut nunatsinniittunut iluaqutaassaaq taamaasillunilu inuiaqatigiinnut kalaallisut nalitussaaq, nunarsuarmilu iitsinnut kiffaanngissuseqartunut demokratiskimillu ingerlasunut kiisalu nunatsinnut namminermut, mittarfiliorneq akileeqataaffigineqarsinnaammat allanit Namminersorlutik Oqartussat aningaasartuutissaraluannik ikilisaasussamik taamaasilluta nunatsinni immikkoortunut allanullu pingaartitatsinnut akissaqarnerulissaagut Kalaallit Nunaanni innuttaasut nuannaarutissaannik.
Suleqatigiissitsisuni isumaqartuaannarnikuuvugut Nuummi mittarfik pioreersoq tallineqassappat eqqarsarnikippallaassasugut Nuup kujataani mittarfiliortoqarnissaanut naleqqqiullugu periarfissanik atorluaanngitsuussagatta sualummik USA´p NATO´llu akulerunnerisigut periarfissat nerrivimmut qallorneqartut misissorluaraanni.
Nuup mittarfiata pioreersup tallineqarnissaanut periarfissalissuunngitsumut taarsiullugu Nuup Kujataani mittarfiliornissaq toqqartariaqarpoq aamma tulluarnerummat Kommuneqarfik Sermersuup Nuup avatinnguani qeqertanik atorluaanissaq pillugu pilersaarutigeriigaanut.
Qanorluunniilli pisoqassagaluarpat takorluuillaqqinnerusariaqarpugut atorluarlugulu USA-p iligisat isumaqatigiinniarnissaannut atatillugu isumaqatigiissuteqarluarnissaq pillugu suleqatiginnikkusulluni assamminik isaassinera, nunatsinni angallannermut tamanna ineriartortitsisussaammat peqataanimmi qulakkeertussaavarput sakkutuunit ilitsinnit nunatsinniittunit illersugaanissarput.
Atagu unikaallalaariarluta mittarfiliortiternissat eqqarsaatigilluaqqilaariartigit ernuttatta aningaasaataat atulersinnagit.
Tillie Martinussen – Suleqatigiissitsisut