Sermitsiaq.ag-mi ullumi atuarsinnaavarput Isumaginninnermut Inatsinillu Atuutsitsinermut Naalakkersuisup innuttaasut kinguaassiutitigut kanngutsaattuliortartut, oqartussaaffimmi ataaniittut, kingulliuttalerniarai – allaat innersuussutigalugu naalakkersuisoqatigiinnermut isumaqatigiissut.
Naalakkersuisut ilanginnarneqassanngilluinnarput.
Qineqqusaarnerpassuarni partiit TAMARMIK qineqqusaaqataasut neriorsuutigaat kinguaassiutitigut atornerluisarneq akiorniarlugu, suliassani sallerpaanngortinniarlugu allaat partiit assigiinngitsut ataatsimoorlutik sorsoqatigiissasut oqaatigalugu.
Kinguaassiutitigut kanngutsaattuliorfigineqarsimasut mittatigineqarput, inersimasut annernarnerpaatulli meeqqat allaat sassarlutik oqaluttuarnikuusut inuunertik aserorneqarsimasoq, peqateqarsinnaanertik aserorneqarsimasut, sulisinnaassusertik allaallu ilinniarnertik aserorneqarsimasoq. Ilaqutariit tamarmik aserorneqartarput, kanngutsaattuliortulli annikitsuaqqamik pillarneqartarput allaat pineqaatissinneqarsinnaasarlutik kanngutsaattuliorfigisaminnut qanittuaqqami.
Eqqorneqartut suamik ikiorneqartarput politiit sullissereernerisa kingorna puigussanngilarpulli inuit inuunerisa aserorneqartarnerat uani pineqarmat.
Antuut kanngusunnginnerluni inuit eqimatta taakku kingulliuttalerniarlugit oqalukkami??? Tupinnanngilluinnarpoq qanittunnguaq tikillugu inuit nunarput qimallugu nutsernerat sukkalluinnartumik pimmat.
Qineqqusaarnerup nalaani neriorsuutaasimasut imaluunniit neriulersitsigaluarnerit isumalluaammertitsinerillu piviusunngorsinnaajunnaarput.
Antuut kaammattuinnassavara ukiut ingerlanerini naalakkersuisoqarfiata nalunaarusiarisarsimasai atuaqqullugit, takullugulu kinguaassiutitigut atornerluinerit qanoq kinguneqartarnersut aamma qanoq kingunerlutsitsisoqartarnersoq.
Aamma kaammattuinnarusuppara akerliussutsimik takutitsinerit pereersut, kangutsaattuliortarsimasunik apersuinerit ajornartorsiullu taannarpiaq pillugu qineqqusaarutaasut aamma – innuttaasut toqqaannartumik politikerinik avitseqatiginnissimaneri kingumut qiviaqqullugit. Saqqummiunneqarput inuit qamani isertugaataat, attortinnarluinnartut – neriuutigalugu Kalaallit Nunaat siunissami pitsaanerulerumaartoq.
Pisoq akuerineqarsinnaanngilluinnarpoq.
Naalakkersuisoq qinnuigiinnassavara naalakkersuisooqatigiinnissamut isumaqatigiissut atuaqqeqqullughu.
Immikkoortoq nr. 33, 38 aamma 39 tassanilu sualummillu immikkoortoq 39 qimerloorluassallugu tulluarpoq.
Ilanngullugu sukumiisumik aamma atuaqqussavakka meeqqat inuillu pisinnaatitaaffii pillugit isumaqatigiissutit minnerunngitsumillu nammineq partiimi qineqqusaarnerup nalaani neriorsuutai.
Innuttaasunik sumiginnaaneruvoq.
Suliassatit paarisariaqarpatit, Antuut!