Akulikippallaaqaaq ajunaartoqartarnera persuttaanerup kinguneranik.
Inuuneq kipitinneqarpoq, arnaq inuusuttunnguaq suli ukiukittunnguulluni toqukkut qimaguppoq sapaatip akunnerata naanera qaangiusimatsiartorlu, qaqugu pisartut naammagilissagatsigit?
Angerlarsimaffimmi eqqissiviilliornerit ikiliartortuartut tusartarpagut – aamma tusakulagaaratsigu sungiutiinnarnikuuarput aamma silami persuttaattarnerit amerlasuupilussuupput. Tarnikkut persuttaasarneq naliginnaaqaaq aamma timikkut persuttaattarnerit aqqusinerni aqqusineeqqanilu ersiortitsiuarput.
Kiap eqqaamanngilaa qanittukkut sussuteqanngitsoq aqqusinermi persuttarneqartoq, Nuummi savilersortut, sineriak tamakkerlugu imerniartarfinni persuttaattut – aamma angerlarsimaffiit igaasa sisamaasut iluani persuttaannerpassuit tusarlinneqanngisaannartut piuarput, immaqami tusarliuttalertariaqaraluarput?’
Angerlarsimaffinni eqqissiviilliornerit, persuttaannerit aamma sakkortuumik persuttaanerit politiit ukiumoortumik nalunaarutaanni takussaajuarput. 2017-mi pisartut amiilaarnaannarput: arfinillit toqutaapput, 16-t toqoriarneqarput, persuttaanerit 854-t nalunaarutigineqarput, 326-t kinguaassiutitigut persuttaanerit, Kalaallit Nunaanni agguaqatigiisillugu persuttaasarnerit Danmarkimut naleqqiullugu sisariaammik amerlanerupput kinguaassiutitigullu persuttaanerit arfineq-pingasoriaammik amerlanerullutik. Tamanna amilaarnarluinnarpoq.
Persuttaaneq aamma sakkortuumik persuttaanerit pigajupput aanngajaarniutinit sunnertisimanerup imigassartorsimanerullu nalaani aamma persuttaanerit amerlanerpaat pisarput sapaatip akunnerata naanerani. Pinaveersaartitsisoqarsinnaalluarpoq!
Inuit pitsaanerusumik periarfissittariaqarpagut kamaajarnissaannut inunnik allanik ajortumeerinnginnerini imaluunniit ajornerusumik pisoqartinnagu; qanittukkut alianarluinnartumik pisoqarpoq; toqutsisoqarpoq.
Persuttaasarneq pillugu ataatsimeersuarneq Kattunneq 2015-mi ingerlanneqarmat neqerooruterpassuit ingerlanneqarsinnaasut saqqummiunneqarput. Persuttaanernik pinaveersaartitsinerit, meeqqat inuusuttullu ilinniarnissaannut atortut, angusassanik toraagaqarluni angerlarsimaffinni eqqissiviilliortarnerit pillugit suliniutissat, meeqqanut inuusuttunullu, pinerlunnaveersaartitsinissamut suliniutissat aamma sillimanissamut annertusaatissat kiisalu persuttaasartunik katsorsaasalernissat, islandimiut periusaat naapertorlugu.
Meeqqat suli atualilinngitsut ornittariaqarpagut pinaveersaartitsillutalu, nunami maani angutit suleqatigiiffii nukittorsartariaqarpagut, persuttaaneq eqqartornerusariaqarparput paasititsiniaallutalu, qinngasaaruttarnerit pillugit qaammarsaasariaqarpugut aamma angusassanik toraagaqarnerulluta ilaqutariinnut meerartalinnnut immikkut aaqqissuussanik neqerooruteqartariaqarpugut. Persuttaanerit kingorna malitseqartitsisarnissat pereerput.
Pinaveersaartitsinermi pisariaqartippagut suliniutit amerlanerit pitsaanerillu, pinerluuteqarsimasunut inissiisarfinni inuit persuttaasartut katsorsartarnissaannut periusissat pitsaanerit pigisariaqarpagut aamma aapparisat persuttaasartut ajoqusersuisartullu pitsaanerusumik suliniarfigisariaqarpagut. Meeqqat atuarfiani pinaveersaartitsinerit aallartittariaqarpagut aamma inuusuttuaqqat akornanni. Iliuuseqarluta pinaveersaartitsisariaqarpugut. Ilaqutariit meerartallit angerlarsimaffinni eqqissiviilliornermik nalaataqartartut suliniarfigisariaqarpagut, sukkasuumik iliuuseqartarluta.
Eqqissilluta angalaarsinnaassaagut, eqqissisimasumik fiistersinnaasariaqarpugut aamma persuttarneqarnissatsinnut annilaanngateqassanngilagut.
Pinerluuteqarsimasunik Isumaginnittoqarfik amerlanerusunik suliniuteqartariaqarpoq aamma qaammarsaanerit pinaveersaartitsinerillu pitsaanerit ingerlanneqartarnissaat pisariaqarpoq. Inuiaqatigiinni ajornartorsiut pivarput aamma tamatta isiginneriaaserput allanngortittariaqarparput.