Oqartussaaffiit nukinnik piginnaanernillu amingaateqarmata akisussaaffiit tamarmik naammattumik sukkassusilimmik naammassineqarsinnaanngillat, naammattumik pitsaassusilimmik imaluunniit naammattunik piginnaanilinnit. Taamaattumik Tillie Martinussenip sulissutiginiarpaa peqatigiiffiit aaqqissuunnissaat ullumikkumut naleqqiullugu ikiuunnerusalerniassammata, oqartussaaffiit ikiorlugit akisussaaffimminni sulianik ingerlatsinerminni, iluamik naammassisaqarsinnaanngimmata. Tilllie Martinussen, Suleqatigiissitsisut sinnerlugit qinigasanngortittoq isumaqarpoq allaqqussinnaanngitsoq.
Kalaallit Nunaanni peqatigiiffippassuaqarpoq taamaattumik piffissanngorpoq akisussaasunit ataqqineqalernissaat ikorfartuisutut oqartussaasut suliaminnik naammassinninnissaminnut naammattumik periarfissaqannginnerat pissutigalugu. “Siullerpaatut pisortat nassuerutigisariaqarpaat inatsisit naapertorlugit pisussaaffimminnik naammassinnissinnaanatik” Tillie Martinussen isumaqarpoq.
”Ikiorneqarpugut nammineq piumassutsiminnik ingerlasunit kattuffinnit maanngaanneersunit aamma nunani allaneersunit. Tamanna nuannerlunilu kanngusuusaarnarpoq. Nuannerpoq allat takusinnaammassuk Kalaallit Nunaanni immikkoortut ilaanni ingerlanerluttoqarpoq. Kanngusuusaarnarpoq nammineerluta pitsaasumik aaqqissuussamillu iliorsinnaasimannginnatta, naqissusiivoq Tillie Martinussen.
Peqatigiiffiit pilersinneqartarput pisortat politikerillu ilisimasakippallaarnerat pissutigalugu aamma pisunut paasinneeqatuttarpallaarnerat pissutigalugu taamaasillutillu suliassatik suliarinngitsoortarmatigit.
“Ilumoorsinnaanngilaq ilaqutariit ataatsimik meerartallit imaluunniit inuusuttoq anisiinnarneqartarmata ikorfartorneqarnissaannik neqeroorfigeqqaarnagit imaluunniit ilisimasanik tunineqaarnagit.
Amerlaqisut ilisarsigunarput namminnermi qitornamik nappaataa paasiniartariaqartarnikuugamillu qarasaasiakkut imaluunniit allaffiit akornanni ingerlateqqinneqaqattaartarlutik. Angerlartinneqartarput ilaanni apeqqutaat akineqaratik ilisimasaqannginneq sulisussaaleqinerluunniit pissutigallugu aamma oqartussaaffiit oqaluttuussineq ajorput sumi ikiuisoqarsinnaanersoq aamma sumut saaffiginnissanersut ilisimasaqarnerulerusukkunik meeqqap inuusuttulluunniit iluaqutisinnaasaanik.
Akuttunngitsumik ilaqutariit namminneq paasisassarsiortariaqartarput, ataatsimiinnerit ataqatigiissartariaqartarpaat imaluunniit namminneq oqaluttuarisariaqartarpaat meeraq inuusuttorluunniit sumik ajoquteqarnersoq qarasaasiami nammineq paasisatik tunngavigalugit, quppernerit eqqortut nassaarisinnaasimagunikkit paasisinnaallugillu. Ilisimasassat amingaatigineqakkajupput taamaammat tungiuineq innarlerneqartarpoq, toqqissisimaneq aamma ilaqutariinni nuannaarneq, nalusaramikku sussanerlutik, tassa 2018-mi atukkat erloqinarluinnartut taamaappoq, isumaqarpoq Tillie Martinussen.
”Kattuffiit piffissarujussuaq atortariaqartarpaat politikerinit tusaaqqugaluarlutik, tusarnaartoqartartuuppalli paasinnittoqartarlunilu, tigussaasunik aallartitsisoqartarsinnaagaluarpoq soorlu inatsisiliortoqarluni, suliniutinik aallartitsisoqarluni il.il. Kisianni aamma tamakku suliarineqartarneri arriitsuararsuarmik pisarpoq, siunnersuutit suliarineqartussat, suliniutissat ukiup tullianut missingersuutit isumaqatigiinniarnissaannut ilannguteqqaarneqartarmata il.il. taamaattumik ajornartorsiutip saqqummiunneraniit ukioq ingerlapallartarpoq susoqarani. Tamakku pinaveersimatittariaqarpagut iliuuseqarasuarnikkut pitsaaliuisoqarsinnaammat ilaqutariinnut pissutsit ajortivitsinnagit. Toqqissisimasariaqarput apeqqutaalluni akineqarlutik, nangilluni oqarpoq Tillie Martinussen.
Naalakkersuisut inatsisiliaat kommuninit malinneqartussaammata, kommunit ilaqutariinnut assigiinngitsunik atugalinnut ikorfartuineq eqqarsaatigalugu akisussaaffimmik angisoorujussuarmik tunineqartarput. Kommunilli aamma malinnaasinnaanngillat, sualummik piginnaasaqarluartunik sulisussarsiornikkut.
Taamaasinerani kattuffiit piumassutsiminnik ingerlasut nunami maaniittut nunanilu allaneersut atorluarneqarsinnaagaluarput; Røde Kors, Blå Kors, Naalagaaffiit Peqatigiit meeqqanut suliniaqatigiiffissua UNICEF, Lions Club Grønlandsfonden, Rotary, Red Barnet Kalaallit Nunaat, Foreningen Grønlandske Børn, Angajoqaaqatigiit, Inooqat, ISI, Sugisaq, KTK, KNIPK, Kræftens Bekæmpelse, Angajoqqaat peqatigiiffiat allarparpassuillu.
“Kattuffinnut qujanarsuaq ilisimatittarmatigut iliuuseqarlutilli oqartussaaffiit kukkungaangata.
Kattuffiit ullumimut naleqqiullugu aningaasanik amerlanerusunik tapersinnaasariaqarpagut inuiaqatigiinni suleqataammata qularnaarlugit toqqissisimaneq, ilisimasat ikorfartuinelu aamma pissutigalugu kommuninut pisortanullu oqilisaasarmata. Qitiusumiit qinnutiigneqarsinnaasunik aningaasanik peqartariaqarpoq qaammarsaanissanut aningaasaliissutaasinnaasunik aamma aningaasaateqarfinnik namminersortunik aallartitsinissanut assersuutigalugu.
Aamma tapersersorsinnaavagut allatseqarfimmik pilersitsinikkut peqatigiiffiit kisimik atorsinnaasaannik, allatseqarfimmiittut ilisimasaqassapput aningaasaateqarfinnut qinnuteqarnermut. Kikkut tamarmik suleqatigiinnissaat pisariaqarpoq aamma qarasaasianik atuineq siuarsartariaqarpoq taamaasilluta kikkut tamarmik suleqatigiinnissaat qularnaarsinnaassagaluarparput, peqatigiiffiit kikkuugaluarpataluunniit.
Suliniutit pitsaasut aallartippata aningaasanik tapiissuteqarnissarput, pikkorissarnernik aamma immikkut ilisimasalinnik sulisunik ikiorteqartitsisarnissarput piareersimaffigisassavarput. Suleqatigiinneq siunissaavoq nunami maani inunnik isumaginninneq qaffarsarluinnartariaqarmat.
Neriuppunga peqatigiiffiit suli amerlanerusut pilersinneqarsinnaajumaartut taamma kinguaassiutitigut kanngutsaattuliorfigineqarsimasut peqatigiiffiit, imminut toqunnermik eqqorneqarsimasut il.il. ilaqutariit pisariaqartitsimmata akissutinik, oqaloqatigiittarfinnik immaqa aamma massakkorluinnaq ajornartorsiortoqarmat assigiinngitsutigut ikiortariaqartunik. Aamma pikkoriffigaat politikerinik eqeersaasarneq, oqarpoq Tillie Martinussen.
Peqatigiiffiit pisortanit tapiiffiigineqartarput aamma katersuiniarnikkut, kisianni peqatigiiffippassuaqarpoq inuillu tapiisinnaasut ikittuaraallutik taamaattumik aamma pisariaqarpoq unittuunnginnissaat aningaasassaarunneq pissutigalugu imaluunniit politikerit anniaatigut atukkanullu paasisimasaqakkatunnerat pissutigalugu.
Qinnutaavoq ilisimasat qularnaarnissaat aamma ilisimasat taakku amerliartortittuarnissaat qularnaarumallugu kusanarnerpaamik ineriartortitsinissaq, politikerilli paarlakaattuarmata assigiinngitsunillu pingaarnersiueriaaseqartoqartarmat peqatigiiffinni ilisimasat annertusartariaqarput, annertusaanerlu pitsaanerpaamik qularnaarneqarsinnaavoq amerlanerusunik aningaasanik tapiisarnikkut, innuttaasut iluaqutigisussaammatigit taamaasillutik aamma kikkulluunniit pisinnaatitaaffeqareersut anneruniuttariaarutissagaluarput.
Qulequttat pillugit ilisimasaqarnissaq pingaaruteqarpoq, atorluartariaqarpagut paaralugillu.
Tillie Martinussen, Suleqatigiissitsisut / Samarbejdspartiet.