Nunatsinni illunik amingaateqarpugut. Tamatumunnga pissutaavoq ineqarnermut ukiorpassuarni kukkusumik politikkeqarsimaneq, kiisalu pissaanermik tigumminninnikuusut nunatsinni sanaartornernut aningaasaliinissamut tamakkiisumik aqutsivallaarusussimanerat nunatsinni oqimaaqatigiinnginnermik annertuumik pilersitsisimavoq; illoqarfiit annerit alligaluttuinnarnikuupput uffa nunaqarfiit illoqarfiillu minnerit nilliasut: “Inuerusaasoqarpoq!”
Inuerussaanermut taamaattumut pissutaavoq sanaartortoqartarmat najukkani taamaallaat ineriartornissamut periarfissaqartuni. Illut pisariaqartitsisuniissapput. Inoqatitta ilaat angerlarsimaffeqanngitsutut inuupput naak nunatsinni suleqataanissaminnut nukissalissuugaluarlutik. Aamma illoqarfinni ilinniarfiusinnaasuni inuusuttoqarpoq inissaqartinneqarneq ajortunik, sinerissamiik ilinniariartortut tupinnanngitsumik kolligiani inissanik agguaanermik salliutinneqartarmata.
Nunatsinni sivitsortumi nilliaatigineqarpoq inissiat pitsanngorsarneqassasut, katersortarfiit nutarterneqassasut aamma allaat nunaqarfiit ilaanni meeqqeriviit amingaataapput atuarfeqarlunilu iluarsartarialerujussuarnik. Tamatumunnga pissutaavoq ukiunut pissakilliorfinnut aqutsisuusimasut ileqqaarinneq ajorsimanerat. Taamaattumik inissiaatigut massakkut aserfallalluinnalernikuupput.
Nunani allani aningaasaateqarfiit aningaasaliisartut nunami sanaartornikkut kivitseqataasussat tikilluaqquniartigit. Attartornermut akiliut eqqarsaatigalugu unammilleqatigiinnermik pilersitsissagaluarput peqataanillu najukkani sanasunik suliffissaqartitsilerlutik taamatullu sanaartornerup iluani ilinniarnermut atatillugu sungiusaatigalugu suliffissanik aamma pilersitseqataassagaluarput. Tamatuma kingorna taava aatsaat nuannareqqusaarluni qineqqusaarut pisinnaanngussagaluarpoq: Attartornermut akiliutit appasinnerulerlik. Akunnattumik isertitallit nammineq illusisinnaanissaat ajornannginnerulertariaqarpoq, taamaattumik Suleqatigiissitsisuni pilersaarutigaarput nammineq illutaarusuttunut taarsigassarsititseriaaseq 10-40-50 atulerseqqinniarlugu. Housing First Suleqatigiissitsisuni tunngavigaarput angerlarsimaffeqanngitsut inuillu navianartorsiortut eqqarsaatigalugit.
Anguniagaassaaq angerlarsimaffiugallartussanik pilersitsinissaq, toqqissisimaffiusussanik, inuunermi anguniakkat piviusunngortinneqarsinnaaqqullugit.