Piginnaasat avissaartuunnerunngitsoq pisiariaqartinneqarput
Naagga, anisitsissanngilagut!
Maanna siulersuisuni sulinermi piginnaasat inuiaassutsikkullu tunuliaqutaq pillugu oqallinnitoqarsuaq uterfigeqqissavarput? Ullumikkut siulersuisut suliaminnut piginnaasallit siulersuisuni sukumiisumik sanarfineqarsimasuni ilaasortaapput.
Siulersuisuni ilaasortat piginnaasatik tunngavigalugit toqqarneqarsimapput.
Taamaakkaluartoq qineqqusaarutaarpaluppoq, maanna tusagassiutitigut sioorasaarisoqarmat.
Hans, tassa.
Nunatsinni siulersuisuni ilaasortaatitatsinnut oqaloriaaseq sunaana? Qunusaarutit nikisitsineq ajorput, ingammik soraarsitsiniarluni qunusaaruti.
Oqaaseqaatit taama ittut kikkut tamaasa eqqortarpaat; ilinniarsimasortagut, maanga nuuttortagut, siulersuisuni ilaasortagut kalaallisut oqalussinnaanngitsut.
Siulersuisuni ilaasortagut kalaallisut oqalussinnaasut – kalaallisut oqalussinnaanertik kisiat pillugu tassani issianerarneralugit pasillerneqartut.
Tamarmik assoroorlutik sulisut ingerlatseqatigiiffinni pitsaasumik aqutsillutik ingerlatsisut, Hans Enoksenimit taassumalu oqaaseqaataanit tatisimaneqartutut misigisariaqarput.
Assaa silarsuarmik isiginneriaaseq ittagaq. Nunarsuarmioqataajartuinnartunut ilaavugut, tamanna Hans Enoksenip sungiunniaannartariaqarpaa.
Alla pingaarutilik tassaavoq; inuit avataaneersut pisariaqartinneqartuaannartussaapput, aamma siulersuisuni.
Ilaatigut piginnaasat qulakkeerniarlugit, iluanaarniutigalugu akiliilluni pinerluttoqannginnissaa, kammalaatersorneq kiisalu nunamut maanga isumassarsianik eqqussuineq pillugut.
Ingerlatseqatigiit ingerlatseqatigiiffinnit ingerlanneqarunik pitsaanerpaasarpoq, kiisalu niuertut pitsaasut aningaasarsiornermullu piginnaasallit il.il.
Pingaanerpaaq tassaavoq, siulersuisut inunnit sulerinerminnik ilisimasalinnit katiterneqarsimanissaat.
Politikerit inussutissarsiortuusaanerat unittariaqarpoq. Aamma aningaasaliisartugut, maanga nuuttut ilami maani najugaqavissut qunutittariaqanngilaat.
Tamat oqartussaaneranni inuiaassutsikkut tunuliaqutaq immini piukkunnaateqarnermut atanngilaq.
Tillie Martinussen Samarbejdsprtiet/Suleqatigiissitsisut
27 49 27