Assagut isaappagut – suleqatigiinnerunissamut
Nuannerpoq tusarlugu Berthel Haarderip Kalaallit Nunaata Danmarkillu suleqatigiinnerunissaat kissaatigigaa.
Tamanna Suleqatigiissitsisut politikkiminni kissaatigiuaannarpaat suleqatigiinnerunissamut periarfissat atorluarneqarnissaat.
Apeqqutaavoq taamaallaat kalaallit politikerit ikittunnguit suliamik aallartitsinissaat.
Danmark, Savalimmiut Kalaallit Nunaallu nunarsuup sinneranut naleqqiullugit tamarmik nunaarannguupput – ataatsimooruttali nunarsuarmiut suleqatigiinneranni nippaarissuussaagut.
Berthel oqarpoq kissaatigalugu naligiinnerup uppernarsarneqarnissaa – Namminersornerlu pillugu Inatsimmi tamanna nassaassaareerpoq, suliat Kalaalllit Nunaannut tunngasut pineqartillugit. Matumani saqqummiunneqartoq isumassarsiaq ilassilluarusupparput.
Kalaallit Nunaat nunanut allanut tunngatillugu qanoq pilersaarnermik nalunaaruteqartareerpoq aamma nunanut allanut tunngatillugu atuupput Memorandums of understanding, soormi taava aamma taamaaliorsinnaassanngilagut Kalaallit Nunaata, Danmarkip Savalimmiullu akornanni?
Kalaallit Nunaata suleqatigiinnerulerneq iluaqutissarsivigisinnaavaa soorlu inuutissarsiornikkut, Kalaallit Nunaannut aningaasaliinertigut – attaveqatigiinnermut pisortat namminersortullu peqatigiillutik aningaasalersuinerat – inissat, nunanut allanut politikki pillugu annerusumik suleqatigiinneq il.il.
Ilinniartitaaneq, meeqqanut navianartorsiortunut sullissineq, inuutissarsiutnik ineriartortitsineq aamma ineqarneq nukittorsassavagut. Naalagaaffeqatigiinni misilittakkat taava qanoq iliorluta iluaqutissarsiviginiarsinnaavagut?
Atorsinnaasagut periartigit inunnik isumaginninnerup iluani ilinniarsimassutsikkut piginnaasat – sualummik meeqqat inuusuttullu navianartorsiortut eqqarsaatigalugit aamma ukiorpassuit ingerlanerini persuttaasarneq, kinguaassiutitigut atornerluinerit il.il. pillugit paarlaasseqatigiinnikkut paasissutissat pisarsimasagut atuleriartigit.
Kalaallit Nunaanni ikioqatigiissaagut ilungersorlutalu suleqatigiinnerulernerup iluaqutissartaanik pissarsiumalluta.
Aamma nammineq akilertariaqassavarput bloktilskudit isumaqatigiinniutigeqqinnianngikkutsigit.
Kisianni atagu aallarteriarta periarfissallu takullugit assammik isaassisoqarnerani.
Kalaallit Nunaata Danmarkillu suleqatigiinnerani Best practices pilersittariaqarpagut, killissanut tappippallaarata.
Periutsinik eqaannerusunik eqqusseriarta aamma ullumikkut suleqatigiinnerup iluani.
Naalakkersuisunngortussanut piumasaqaat angivoq, Danmarkimi naalakkersuisunut aamma Inatsisartut Folketingillu suleqatigiinneranni.Soorunami aallartittariaqarpagut.
Immikkoortut tigussaasut aallartissinnaasagut:
Naalagaaffeqatigiinni nunat pingasut attaveqaqatigeriaasiat eqaallisartariaqarparput.
Apeqquteqaatit Inatsisartunut Naalakkersuisunulluunniit kingaalaarunneqartarput. Allaat sapaatip akunneri sisamaniit 12-nut ingerlaqqaartariaqartarput Danmarkimiit Kalaallit Nunaanniillu akissuteqartoqarnissaanut.
Aamma Suleqatigiissitsisuninngaanniit isumaqarpugut Kalaallit Nunaat akulikinnerusumik peqataatitaqartalertariaqartoq, Kalaallit Nunaat pillugu nunanut allanut tunngasut isumaqatigiinniutigineqassatillugit.
Aamma oqaloqatigiittariaqarpugut nassuiarlugulu suliat suut Kalaallit Nunaannut tunnganersut. Tamannami pisinnaareerpoq Namminersorneq Inatsit naapertorlugu.
Namminersorneq pillugu Inatsimmi 2009-meersumi, Kalaallit Nunaata Danmarkillu nunanut allanut tunngasutigut, niuernikkut, nunallu taakku akornanni naligiisitaaneq pillugu suleqatigiinnerunissamut sinaakkutissat pitsaalluinnartut pioreeraluarpoq aamma Naalagaaffeqatigiinni nunat pingasut suleqatigiinnerunissaat eqqarsaatigalugu.
Kalaallit Nunaannut tunngasut susassaqarfigisagut iliuuseqarfigisinnaavagut ilaatigut Folketingimi ilaasortaatitagut marluk aqqutigalugit aamma Inatsisartunut inatsisissanik nassiussisarnikkut kiialu Naalakkersuisunut ilisimatitsisarnikkut.
Inatsisit Kalaallit Nunaannut tunngasut Inatsisartut aqqutigisarpaat tassani akuerineqartarmata itigartinneqarlutilluunniit.
Kalaallit Nunaat tamakkiisumik kiffaanngissuseqarpoq inatsisiliornissaminut atuutsitsinissaminullu.
Qinersereernerup kingorna suliap aallartinnissaanut qilanaarpugut.
Mvh Tillie Martinussen / Suleqatigiissitsisut
+299 274927
Selvstyreloven/Namminersorneq pillugu Inatsit:
https://www.retsinformation.dk/eli/lta/2009/473