Nammineq piumagutta aamma nammineq aningaasaliissutissat nassaarisariaqarpagut. Aamma ullumimut naleqqiulluta akisussaanerusariaqassagut – pisarialinnillu iluarsartuussilluta – aamma annernassagaluarpalluunniit aamma Aningaasanut Inatsimmi allanngortiterilluta – ingerlatsineq sipaarfigiumallugu ileqqaarlutalu piffissanut sussaaleqiffiusunut.
Ukiut sisamakkaarlugit paasilertarparput kingullermik killiffitsinnut naleqqiullugu ajornerusumik inissisimalersimalluta. Taamatut ingerlavugut ukiuni kingullerni 38-ni. Sikup sinaaniippugut taamaakkaluartoq eqqartukkani pingaarnersaatinneqarpoq Air Greenlandimi piginneqataassutsinik amerlanernik pisissanersugut. Sussaanngilluinnaqqissaarpoq.
Iluarsartuussinerit suamik suamik eqqaaneqarput, mianersortumilli aamma tigussaanngitsumik. Sanaartornissaraasiit eqqaaneqarpoq oqaatiginagu aningaasat suminngaanniit pissarsiarineqassanersut. Siunnersuuterpassuaqarpoq “suut suliniutigineqarusunnersut” kisianni aningaasartassai eqqaaneqanngisaannarput.
Piumagutta; allanik suliniuteqarnissarput avaqqussinnaanngilarput. Aningaasaliisartut avataaneersut tikilluaqqusariaqarpagut aamma piffissap ungasinnerusoq isigalugu isumaqatigiissuteqartariaqarpugut politikerit niuertuusaartillugit – kisianni ataguli tamakkununnga pikkorissut suliseriartigit.
Avataaneersut sulisussat sulliviit pisariaqartitaat tikilluaqqusariaqarpagut, nunaqavissut sulisilernissaannut ilungersuutitta QAAVISIGUT – taamaasilluta akileraarutit amerlanerusut isertittalerumallugit, suliffinnilu namminersortuni suliffiit aamma amerlanerulersikumallugit. Inuutissarsiortut suninngua tamaasa aqukkunnaartariaqarpagut taarsiullugulu meerartagut sullillugit.
Qulaani taasama aaqqissuussaannikkut ajornartorsiutit, sulisartut nikittarsinnaanerat, matchgruppe 3-miittut ikiornissaat, meeqqat atuarfiata kivinneqarnissaa imaluunniit meeqqat inuusuttullu navianartorsiortut ikiorneqarnissaat iluarsinavianngilaat.
Maannakkut isumaqatigiissutitta anersaartornissarput inissaqartinngilaa aamma partiit pioreersut aningaasrsiornkkut ajornartorsiutigut aaqqisssinnaanikuunngilaat, iluarsartuussinikuunngillat malunnaatilimmik imaluunniit nutaanik isertitassanik nassaarnikuunngillat Bloktilskudimut taarsiisinnaasunik.
Paarlattuanillu ileqqaarnikuunngillat, piffissami ingerlalluarfimmi illuartitsinikuunngillat, aamma aaqqiissutissanik saqqummiussinikuunngillat.
Aatsitassarsiornermi milliarterpassuit isertitassat utaqqinerini imaluunniit tupinnaannartumik aalisanganeriataarnissaata utaqqinerani taava naviartorsiortortatta meeqqallu atuarfiata utaqqivaat aaqqiissutissat pitsaasut.
Aalajangersariikkanut aningaasaliisarnissanut siunnersuutigut IMALUUNNIIT Danmarkimiit nunatsinnut anngussassat piginnaasat pillugut suleqatigiinnissamut siunnersuutigut misiliutaapput iluarsiiniarnermut taamaakkaluartorli siunnersuutinut allanut ammavugut aamma piffissaq ungasinnerusoq isigalugu aaqqiissutissatut siunnersuutinut ammavugut. Meerartatta inuusuttattalu annertuumik ikiorneqarnissaq pisariaqartippaat. Meeqqat atuarfiat nakkaannikuuvoq, ilinniartitsisunik nukinnillu amingaateqarpugut. Inissiaatigut nakkaannikuupput iliuuseqarnissarpullu kinguarsartuarutsigu kinguaattoornerput alligaluttuinnartussaavoq.
Naalagaaffeqatigiinni suleqatigiinnerunissamut siunnersuummut ullumi naaggaarnerup paasiuminaatsipparput. Imatut paasissanerlutigu partiit pioreersut iluarsartuussinissat pinngitsoorneqarsinnaanngitsut suliarerusulersimagaat isumaqatigiissusiorlutillu ukiuni 10-ni 20-ni atuuttussanik, allamiut aningaasaliisartut kalaallillu naatsorsuutigisinnaasaannik?
Taavami qanoq iliorluta immitsinnut nassaarissaagut?
Partiit allat aggersarpagut oqallilluarnissamut, piffissaq ungasinnerusoq isigalugu aningaasaliissutissat pillugit, piffissaq ungasinnerusoq isigalugu sipaarutissat pillugit aamma aaqqiissutissat atasinnaasut pillugit.
Tillie Martinussen
Suleqatigiissitsisut/ Samarbejdspartiet