Innarluutilinnut ineriartornermikkullu akorngutilinnut ikorfartuineq nutaamik eqqarsarfigitigu

Suleqatigiissitsisuni innarluutillit inerortornermikkullu akorngutillit ikiorneqarnissaat politikkikkut oqallisaaneroqqullugu Innarluutillit illersortaata kissaataa taperserparput. Isiginerusariaqarparput

inuit paasinnissinnaanikkut ajornartorsiutillit qanoq iluaqusiisinnaanersut.

 

Allattoq siulittaasup tullia aamma Inatsisartunut qinigassanngortittoq Tillie Chile Martinussen

Angummut inuusuttunnguamut infantil autismeqartumut aleqatut paarsisutullu inuttut Innarluutillit illersortaat isumaqatigiinnarsinnaavara kissaatigimmagu innarluutillit inerortornermikkullu akorngutillit arnat angutillu ikiorneqarnissaat politikkikkut oqallisaanerusariaqartut. Politikeritullu periarfissat takulluarsinnaavakka.

 

Inuit paasinnittaatsikkut ajornartorsiuteqartut tunniussaqarsinnaapput

Innarluutilinnik sullissinitsinni nutaamik eqqarsaatiginerusariaqarparput inuit paasinnittaatsikkut ajornartorsiuteqartut qanoq tunniussaqarsinnaanersut.  Innarluutilippassuit aamma ineriartornermikkut akorngutilippassuit iluamik ikiorneqarunik piffissaq qaninnerusoq isigalugu inuiaqatigiinnik pilersitseqataasinnaapput tunniussaqarlutillu. Inuutissarsiortut suleqatigalugit paasinnittaatsikkut ajornartorsiutilinnut suliffissarsissussisartut soorlu ineriartornermikkut akorngutilinnut, autismertunut, spasticitetilinnut, noqartartunut, nukeeruttoortunut, qaratsakkut ajoquteqalersimasunut imaluunniit arlaannik allamik innarluuteqartunut, tassa naliginnaasumik sulilernissaminnut ikiortarialinnik suliffissarsissussisarlutik.

Inuiaqatigiinni naleqalersitsisumik ilanngutitsineruvoq tamanna aamma inuiaqatigiit iluaquserneqassapput suliffeqarnermut tikilluaqqugutsigit.

 

Ilaqutariit ikiorneqarnerussapput

Innarluutilinnut ilaquttat qanigisallu ikorfartorneqartariaqarput oqilisaanneqarlutillu.

Nappaammik suussusersiniaanermut, paasiniaanermut aamma neqeroorutinik periarfissanillu ujaasinermut nukippassuit atorerlugit qasusarput.

 

Ilaqutariit ilaatigut pisariaqartippaat:

* Angerlarsimaffimmi oqilisaanneqarnissaq, eqqiaanermut  ilinniarsimasunillu oqaloqateqarnissamut ikiorneqarnissaq taamatullu sapaatip akunnerata naanerani oqilisaanneqarnissaq.
* Meeqqat innarluutillit taakkulu angajoqqaavisa meeqqerivinni, atuarfinni sunngiffimmilu ornittakkani sinaakkutit akuersaarnerusut pisariaqartippaat aamma sulisinnaasut pisariaqartippaat suliffittaarnissaminnut ikiorneqarnissartik.
*Angajoqqaat, meeqqanut paarsisut aamma inersimasunut innarluutilinnut paarsisut aamma angisuumik pisariaqartippaat terapi siunnersorneqarnissarlu.

 

Angajoqqaat qanigisaasullu aamma isumaaluttaqaat:
* Qanoq pisoqassava peerukkuma? Qitornara ingerlaqqissinnaasava? Kiap paarissavai?
*Angajoqqaatut qitornara eqqortumik ikorfartorpara? Kukkusimanerlunga?
* Kalaallit Nunaat qimattariaqassavara qitornara pisariaqartitaminik ikiorneqaqqullugu ikorfartorneqaqqullugulu. Ilaquttakka tamaasa nooqatigissavakka imaluunniit avissaartariaqassaagut immikkuulerluta?

Peqatigiiffinnik pilersitsiortussaagut aamma attaveqaatinik ilinniarsimasunik inuttalinnik

Danmarkip iluanni peqataalersitsisartut peqatigiiffiit amingaataapput, ilaqutariit Danmarkimi kalaaleqatiminnut attaveqarsinnaaqqullugit. Innarluutillip qanigisaasalu kulturip qimatamik attatiinnarnissa apisariaqartittarpaat.

Aamma attaviit ilinniarsimasut  Kalaallit Nunaanni immikkoortumi tassani sulisut piginnaanngorsartariaqarpagut, amerlanerpaat nunatsinniiginnartaqqullugit – periarfissaqartilluguli pisariaqartitsinertik naapertorlugu ikiortuarneqarnissaat pisariaqarpoq.  Kisianni pilliutigissanngisaannassapput ineriartornissaat, eqqarsartaatsikkut peqqissusaat imaluunniit inuunerminni nuannaartuunerat.

Tillie Martinussen/Suleqatigiissitsisut – Samarbejdspartiet: