Oqartoqartarpoq kikkut tamarmik sila eqqartortaraat, susoqarnerli ajortoq. Aamma taamaappoq politikkimi tassami innuttaasut taasitinneqariataarsinnaapput uffa inuit ilisimanngikkaat suniarnerlutik aamma qanoq. Taava eqqarsaatigilluangaanngitsorpassuit erfangiunneqaqattaarsinnaasarput. Aamma uanga paasiuminaatsuliortartunut ilaavunga. Tusagassiutinut nalunaarut kukkunersioreerlugu nassiussara kukkuneqarpoq allaqqagami pisassiissutit utertinneqarsinnaassasut siumut ukiut 5-t 20-llu akornanni ilisimatitsereernikkut. Isumagali unaavoq ukiut 20-t 30-llu akornanni siumut ilisimatitsereerluni utertitsisoqarsinnaassasoq, tamannalu takuneqarsinnaasutut allaanerungaatsiarpoq.
Apeqqutit soqutiginaatillit marluupput: Pisassiissutit kikkunnut tunniunneqassappat. Aamma tamanna qanoq pissava. Apeqqummut siullermut S, IA, PN aamma Demokraatit ersarissumik akissuteqareerput, tunniunneqassapput ataasiarlutik nioqquteqareersimasunut. Apeqqutip aappaani pineqarpoq qanoq periuseqartoqassava utertitsinermi aamma agguaaqqinnermi, ersarissumimmi suli oqartoqanngilaq, politikerit tungaanniit.
Ilisimasakka naapertorlugit pisassiissutinik tunniunneqareertunik utertitsisoqarnikuunngilaq. Aalisarnermi pisassiisarneq atorneqaleraangat taava pisassiissutit tunniunneqartarput aalisareersimasunut. Tamanna isumaqarluarpoq ukiorpassuimmi aalisarsimangaanni taava aalisarnissamut pisinnaatitaaffeqartoqalersarpoq. Assigiinnarpaa ilaqutariit ukiorpassuarni kuup eqqaani tupertarsimasut, tuperfik pigilertarpaat allassimasoqanngikkaluartoq. Kisianni pisassiissutit utertinneqarpata allanut tunniunniarlugit taava pigiinnarnissaannnut piumasaqartussanik soqanngilat arsaarneqartut eqqaassanngikkaanni, kisianni taakkorpiaat pisassiissutini pineqartunik nioqquteqareernikuupput taamaasillutillu aalisarsinnaatitaagaluarnertik allanut tunniunnikuullugu.
Alla eqqarsaatigisariaqartoq tassaavoq qanoq iliorluni pisassiissutinit piginnneqataassutsit utertinneqartassanersut. Oqartoqartassava “Asasara aalisartoq, pisassiissutitit 2030-mi atorsinnaajunnaassapput?”
Taannalu eqqarsaatigilluaraanni Kalaallit Nunaanni suliffissuaateqartoqarpoq. Kisianni kilisaateqanngilaq tuniinnarneqarsinnaasunik pisassiissutit atuuffissaat qaangiuppat. Fabrikkeqarpoq, siammarteriveqarpoq, nioqquteqartarfeqarpoq aamma (eqqarsaatigineqartorsuunngitsoq piusarpoq) tassalu pisisartut akornanni tatigineqarneq. Niuernermi attavippassuit qangarsuaaniilli piusarput. Pisisartut aalisartitseqatigiiffiit tatigisarpaat. Qanoq sivisutigisup ingerlanerani tamakkorpassuit pilerseqqinneqarsinnaappat aamma inuiaqatigiit isertitassaraluaminnik qassersuarnik annaasaqassappat?
Periuseq piviusorsiortoq takusinnaasatuara tassaavoq minnerpaamik ukiut qulit ingerlanerini ataavartumik tunuariartuaartarnissaq tassani pisassiissutinit piginneqataassutsit kataanneqartarlutik. Kisianni taamaaliorutta partiit amerlanerit piumasaattut kikkut tamarmik peqataanissaat anguneqassava? Pisassiissutinik nioqquteqartuaraanni qularaara aalisartut nutaat aningaaserivimmit taarsigassarsitinneqarsinnaasassasut. Tamakkiisumik akiliisarneq qimallugu raajanut kiilumut akitsuummut akilerumasaq akilerneqartalissappat taava ingerlatseqatigiiffissut aamma ajungaasuussapput, taakku aalisarluarsinnaanerusaramik aallarterlaanut naleqqiullutik. Taavami suna anguneqassava? Ajunnginnerpaamik pisoqassappat raajanut akitsuut qaffasinnerusoq akitsorterussisarneq pissutaalluni, kisianni suli qulalaarpunga.
Inuiaqatigiit tamat pisuussutaannut naassaanngitsumik peqartitsisarnissaq kissaatiginanngilaq, kisianni iluarsartuussiniaraanni taama kinguneqartigisussamik taava innuttaasut aalisartut aamma kikkulluunniit Kalaallit Nunaannut aningaasaleerusussinnaasut oqaluttuuttariaqarput sorusuttoqarnersoq aamma iliuuseriniakkat qanoq kinguneqassanersut. Uani eqqartukkatsinni pigiinnarusunneruara killeqanngitsumik pisassiisarneq, suliniarnermi isummat tunngavigisat piinnarlugit periusissamik eqqarsaatigilluangaanngitsumik atortitsilernissamut naleqqiullugu.
Partiit arlallit aalisarnermi kikkut tamat oqartussaaqataalernissaat eqqartorpaat. Oqaatsit kusanaraluaqaat, tusarnerput kisianni uanga paasisinnaanngiinnarpara qanoq isumaqarnersoq aamma qanoq kikkut tamat oqartussaaqataalersinneqassanersut. Oqaatsinik taamaattunik uteqattaarisut arlaatatoruna oqaluttuutilaarlinga qanoq isumaqarnersoq?