Aalisarnermi aningaasarsiornermut immikkut ilisimasallit pigissallugit ajussanngikkaluaqisoq aquttut maskinmesterillu piariaqartinneruagut.

Ilaannikkut ilinniagartuutut suleqqilernissara pilerigiummertarpara. Issiarujoorluni eqqarsaruloornermi suliarineqarsinnaasarput qaqutigoortut imaluunniit eqqarsartoqarsinnaavoq itisuunik nunatta sammivissaa pillugu. Uanga nammineq suliarerusussinnaasara tassaavoq aalisarnermi aningaasarsiornermut immikkut paasisimasaqalernissaq. Assersuutigalugu paasisaqarfigerusutama ilagaat ukiut 2000-t ingerlanerini assagiarsunniarnerup aningaasaqarnerput pitsanngoriartissimaneraa imaluunniit annaasatta siuariartinngitsoorsimaneraatigut. Nuummi tamatup ilisimatusarfiginissaa pilerinaraluaqaaq.

Nunarsuarmili piviusut qissimikkaanni suliffissuaqarfiillu aperalugit ilisimatusarfimmi aalisarnermi aningaasarsiornermut immikkut ilisimasalinngorniarneq iluaqutaassanersoq qularinngilara akineqassallunga: “Iluaqutaassagunaraluaqaaq kisianni massakkorpiaq aquttut, maskinmesterit, pilittat, fabrikkini pisortat kiisalu trawlbasillu amingaagut”.

Qaammatialunnguit matuma siorna umiarsuarmi igasoq oqaloqatigaara. Oqaluttuuppaanga umiarsuarmi igasunik pikkorissunik pissarsiniarneq qanoq ajornartigisoq. Kukkunerugaluarpoq taassallugit umiarsuarmi igasut, pilittaappummi. Assistentimik ataatsimik suleqateqarajupput akisussaaffigisarlugu umiarsuup inuttaasa peqqinnartunik nerisaqarnissaat.

Nerisaat ullup ingerlanerani pisussani qilanaarnarnerpaasarput saniatigullu inuttat inuunerinut pingaarutilerujussuullutik. Kalaallit Nunaanni igasunik ilinniartitsisarpugut, kisianni ilaanni qaammat naallugu inuttat nerisassaannut inuulluataarnissaannullu kisimiilluni akisussaasarnerat imaannaanngissinnaasarpoq immaqalu umiartornerlussinnaasarlutik. Allarluinnaasarpoq neriniartarfimmi kantiinamiluunniit igasuuneq. Kisianni umiarsuarni igasunik nutaanik pikkorissunik ilinniartitsinissarput aaqqissuulluangaanngilaq.

Oqaatigineqartarpoq umiarsuit kalaallinik inuttaqarnissaat qularnaarniartassagipput. Ilumoortorli tassaavoq umiarsuarmi naalagarpassuit soraarninngulermata ilinniarsimasullu pikkorissut pigisagut ikittunnguummata taarsiisussat naammaqqajanngillat.

Taamaattumik aap, aalisarnermi aningaasarsiornermut immikkut ilisimasallit pigissallugit ajussanngikkaluaqaaq. Kisianni umiarsuit naalagassaqartinngikkutsigit maskiinallu ingerlatissinnaanagit taava iluaqutaanavianngilaq. Atagu umiarsuarni inuttassanik ilinniartitsisarneq ilungersuutigeriartigu. Tamarmik suliffissaqarput. Kalaallit Nunaanni aalisarnermi aningaasarsiornermut immikkut ilisimasalinnik ilinniartitsiniarutta Norgemi universitetit suleqatigisigit maani nutaamik aallartitsinngikkaluarluta.

 

 

Michael Rosing, Suleqatigiissitsisut