Suleqatigiissitsisut akerleraat siornatigut pisassinneqartarsimasut salliutinneqartassasut pisassiissutit arsaarinnissutigineqartut agguaanneqaqqilerpata. Assigiinnarpaa lottomi eqqukkat tigoriikkat tigoqqinneqalersut.
Demokraatit, Partii Naleraq, Inuit Ateqartigiit Siumullu aalisarnermut ataatsimiititaliami isumaqatigiittumi issiatitaqarput, taakku 2017-mi upernaakkut inatsisartut ataatsimiinneranni immikkoortoq115 aappassaaneerneqarmat Naalakkersuisunut inassutigaat sinerissamut qanittumi avataanilu raajartassiissutit tamakkiisut agguaateqqinneqassasut (TAC – Total Allowable Catch) tassa avataasiortunut pisassiissutigineqarsimasut 57 %-t sinerissamullu qanittumi pisassiissutigineqarsimasut 43 %-t naligiimmik pisassinneqartussanngorlugit – 50 %-t sinerissamut qanittumi taamatullu 50 %-t avataasiortunut. Fifty-fifty atorlugu aaqqissuussineq naapertuuttuunerarneqarmat. Kisianni ilumut taamaappa?
Suleqatigiissitsisut isumaqataapput oqartoqarmat raajartassiissutit aalisartunut tunniunnqarneq ajormata qaqugorsuarmut pigineqartussanngorlugit.
Pisassiissutit agguaateqqinneqarsinnaasariaqarput, kisianni allannguinissamut periarfissap sivisussusa ima sivisutigisariaqarpoq aalisartitseqatigiiffiit ataasiakkaat aningaasaliissutigisimasaminnut naapertuuttunik isertitaqarsinnaatissallugit.
Aalisarnermut ataatsimiititaliaq isumaqatigiilluni siunnersuut aappassaaneerneqarmat isumaliutissiissummini ima allappoq:
– Agguaassinermi tunngavik ukiunik tallimanik siumut nalunaaruteqareernikkut pissaaq.
Suleqatigiissitsisuni isumaqarpugut piffissaliunneqartoq sivikippallaartoq. Kilisaatit akilersorneqarajupput ukiut 20-t missaanni taamaattumik ukiut taakku akornanni sivisussusiliinissaq tulluassaaq.
Siumut nalunaaruteqareernissaq sivikippallaarpat aalisartitseqatigiiffiit Namminersorlutik Oqartussat eqqartuussivimmut suliassanngortissagaat ilimagisariaqarpoq ajungaallutillu.
-Agguaassinermi tunngavimmik allanngortitsisoqarpat aalisartut nutaat aalisalersinnaanissaat periarfissaalissaaq – tassunga ilaatinneqassaaq pisassiissutinik peqarnikuusimasut tassunga atatillugu salliutinneqassammata. (uanga nammineq naqissusigara)
Suleqatigiissitsisut akerleraat pisassiissutinik peqarnikuusimasut salliutinneqassasut, pisassiissutit arsaarinnissutaasimasut agguaateqqinneqalerpata. Assigiinnarpaa lottomi eqqukkat tigoriikkat tigoqqinneqalersut.
Allatut oqaatigalugu, aalisartitseqatigiiffiit pisassiissutinik pisiarisimasaannik arsaarniarpaat ukiunik tallimanik siumut nalunaaruteqareernikkut illillu siusinnerusukkut pisassiissutit pissarsiatit aalisartitseqatigiiffinnut pineqartunut tunisimasatit, maannakkullu arsaarinnissutigineqartut, taava salliussaatit pisasseqqinneqartussatut. Pisassinneqaruillu nutaanik taava kiffaanngissuseqarputit nioqqutigeqqinnissaannut.
Assigiinnarpaa angallatiga nuannaariartaat tunigiga kingornalu pisisoq arsaarneqarluni, uannut utertinneqartussanngorlugu kingorna uannit tuneqqinneqarsinnaanngorlugu.
Isumaqarpunga oqalligineqarsinnaasariaqartoq pisassiissutit qanoq sivisutigisumik pigineqarsinnaassanersut. Pisassiissutit assersuunneqarsinnaapput akuersissutinut, soorlu taamaattoqartartoq kuuit eqaloqarfiit takornarianut tammaviutsussarsiniarlutillu aallaaniartartunut atortussanngortinneqaraangata. Akuersissutit taakku imaluunniit atuinissamut pisinnaatitaaffiit ukiuni 20-ni 30-ni atorsinnaakkajuttarput sivitsorneqarsinnaallutilli, sulliviit periarfissinniarlugit pilersitsinerminni aningaasartuutigisimasaminnik matussusiisinnaanissaat. Kilisaat ukiut 20-t missaanni akilersorneqakkajuttarpoq, taamaattumik aalisartitseqatigiiffiit ajornartorsiortinneqalersinnaapput pisassiissutit utertinneqariataassappata. Aalisartitseqatigiiffinnut ataasiakkaanut tamanna akisuupilussuanngorsinnaavoq. Aamma inuiaqatigiinnut.
Pissuserissaarnissaq pillugu erseqqissassavara uanga nammineq taamani partiit taaneqartut ilaanni ilaasortaagama, isumaliutissiissummik pineqartumik saqqummiusseqataasuni, tassalu Demokraatini. Kisianni Nivi Olsen aalisarneq pillugu oqaaseqartartuuvoq immikkoortorlu pisartut sakkortuumik pissutaaqataavoq Demokraatini uanga ilaasortaajunnaartariaqarninnut.