Utoqqaat amerligaluttuinnarput pilersuisussallu ikiligaluttuinnarlutik. Sulisussanik amingaateqarpugut sualummik immikkut ilisimasalinnik, uangut nammineq nunaqqattitta ilinniartut naammassinissaasa tungaanut – angerlarusuppata! Erseraluttuinnarpoq tungiuneq nakkariartortoq nunami maani. Takuinnartigu aningaasarsiornikkut ukioq manna siuariartoqanngitsoornera. Aalisagaatigut akigissaarput kisianni taamaattuaannarnavianngilaq. Qiviarsiuk Peqqinnissaqarfiup ilungersornera pitsaasumik sullissiumalluni, meeqqat atuarfii nakkaakkaluttuinnartut, illut oqoqanngitsut amingaataaneri, ilinniarfiit aamma tusagassiorfiit aseroraluttuinnartut, iluarsaanneqarneq ajoramik aserfallattaalineqarnerlu ajorlutik. – Sulisartut aalajaatsut amingaatigaagut aamma sumiiffippassuarni siuarsaavinni sulisussaqanngilagut. Paarlattuanik inuttut ajornartorsiuteqartut aatsaat ikiorniarsarilikkagut takussaapput. Nunatta siunissaa qanoq iliorluta qularnaassavarput? Ilinniartitsineq, ilinniartitsineq ilinniartitsineq, nunaqqatitsinnik – meeqqat atuarfii pitsaasut, ilinniaqqiffiit pitsaasut kiisalu killeqarfitta ammarnissaat. Tikisitat tikilluaqqutigit.
Takornariaqarneq, peqqinnissaqarfik inunnillu isumaginninneq angisuumik sulisussaaleqiffiupput pikkorissunik. Amerlanerit akileraartalerpata inuiaqatigiit piginnaasaqarnerulissapput ilisimasaqarnerulerlutillu aamma siunissami tungiuineq akissartinneqarnerulissaaq. Kusanartumik allamiunik akuutitsilerneq aqqutissaavoq. Nuna tamakkerlugu oqaatsinik ilinniartitsinerit, tikilluaqqusinerit, assigiinngitsunik kulturillit ataatsimoortillugit sammisassaqartinnissaat najukkami najugallit ataatsimoornerulernerannik kinguneqassaaq aamma isummersoriaaserput allanngortittuugutsigu siumut alloriagaatsiaqqajarpugut. Suleqatigiitta ataatsimoorluta ilisimasaminnik tunniussiniarlutik suliartortut tikilluaqqusarlugit. Ilinniartut nunanilu allani najugaqartut nunaqqatigut angerlarusulersitsigit. Inuiaqatigiinnut kinaassutsiminnik ilisimaarinnittunut peqataanik nunarsuarmioqataasunut. Tassa Suleqatigiisitsisut politikkiat. Kalaallit Nunaat avataaneersunut tikilluaqqusiuaannarnikuuvoq, nunarsuup sinnerani allaaserinnittartut, tv-qarfiit aamma takornariartitsisartut nunatsinnut tikeraartartut allaaserisarpaat tamanut inussiarnersuunerput, kaffillertarnerput aamma ammasuunerput. Taamatut tusaamaneqarnerput tigummiinnartigu. Suleqatigiissutigisigu aningaasarsiornerulernissarput tungiuinerput pitsanngorsarumallugu.
Tillie Martinussen