Anguteqatiminoortartut arnaqatiminoortartullu pillugit politikki
Kalaallit Nunaat nunaassaaq kiffaanngissuseqarfiusoq asissuiffiunngitsorlu. Kikkut tamarmik inissaqassapput.
Suleqatigiissutsisuni ikinnerussuteqartut peqatigalugit akiuunniarpugut, assigiinngisitsinerillu suulluunniit akiorniarlugit.
Anguteqatiminoortartut arnaqatiminoortartullu ilaasutut misigiguit, suiaaqatigiittut angajoqqaajullutit ilaqutariikkussi, inuugavit suiaassusittut suiassuseqartutut misiginngikkuit, angutinik arnanillu atoqateqartaruit, atoqateqartarnermik soqutigisaqanngitsuuguit imaluunniit allamik suiaassuseqartumik atoqarteqartaruit, innuttaasutulli allatut, aappalaartutut qaqortutulluunniit, neriusaatut qalipaateqartutut, qalipaateqanngitsutut taakkualuunniit akornanniittutut pineqassaatit.
ukiuni kingullerni qulini siuariarujussuarnikuuvugut, inuiaqatigiinni ingerlatsisut sapiissuseqartut, pridesini, oqallinninnerni siuttuusut imminnullu maligassiuisutut atortut ikiortigalugit. Qujanartumik
Kisiannili suli angusassarpassuaqarpugut.
Inuiaqatigiinni inuppassuit anguteqatiminoortartut arnaqatigiminoortartullu kissaatigineqanngitsumik iliuuseqartartut isigineqarnissaq, timikkut pillarneqarnissaq, assigiinngisinneqarnissaq ilaqutaminniluunniit peqataatinneqarunnaarnissaq – inuiaqatigiinnullu ammasumik saqqummernissaq suli annilaangagisarpaat.
Kalaallit Nunaanni siuariassaagut aammalu inuttut inuiaqatigiittullu iniartortilluta, inuit kikkulluunniit peqatigigaluarutsigit peqataatitsisartutut. Kikkut tamarmik inissaqassapput.
Pisinnaatitaaffeqarnermik suliassaqartorujussuuvugut aammalu anguteqatiminoortartut arnaqatiminoortartullu pillugit immitsinnut paasisitsiniaanissami nalorninartuiaanissamilu akisussaaffeqarluta.
Meeqqat atuarfianni pingaartumik atoqatigiittarnermut tunngasunik ukioqassutsimut naleqquttumik ilinniartitsisarnissaq kissaatigisinnaavarput – tassunga ilanngullugit anguteqatinik arnaqatinillu atoqateqartarneq kiisalu allaanerusumi inooriaaseqarneq, inuttut toqqaasarneq atoqatigiittarnermullu tunngatillugu kissaateqanngittarneq pingaartumillu qinngasaarisarneq avataaniititsisarnerlu pillugit – timikkut allaassuteqarneq, ilukkulli allaassuteqannginneq. Asanninneq asanninneruvoq, akuersaarneq nakuunermut takussutissaavoq.
Immikkut suliniutit suliniutiginiakkagut
Anguteqatiminoortartut arnaqatiminoortartullu inuunermi pissutsini tamani naligiissitaanissaat. Angajoqqaatut, aappatut, inooqatitut meerarsiartaarnermilu pissutsini.
Inuunermi suiassuserisamik suiassuseqanngitsutut misigisimasut naligiissitaanissaat, Rigshopitalilu suleqatigalugu taakkua timikkut suiaassusiannik allannguineq assersuutigaluguluunniit Islandimi taakkununnga iisartagalersuinermut atatillugu hormonilinnik iisartagaqarsinnaanermi naligiissitaaneq.
CPR-normumi kisitsinit akunnaatsunit kisitsinut akunnattunut Danmarkimi oqartussat suleqatigalugit ajornannginnerusumik allannguisinnaaneq.
Inuit anguteqatiminoortartunut arnaqatigiminoortartunullu 18-it inorlugit ukiulinnut tapersersuineq, inuillu anguteqatigiminoortartut arnaqatigiminoortartullu pillugit innuttaasunut siamasinnerusumik qaammarsaaneq.