Quarsaarnarpoq tusarlugu Nuummi MFR-mut kapuuisarneq taamaallaat 50 %-imiimmat.

 

Nunarsuarmi kapuut ersigineqaqaaq kingunerlutsisinnaanermulli ersissuteqarneq piviusunut naapertuutinngilluinnarpoq. Puigornikuuarpummi nappaatit akiuussutissat atorlugit ingalassimaartitagut qanoq ulorianarsinnaatigisut, allaat toqqutigineqarsinnaallutik. Ilumoorsimappat Nuummi kapitittartut taama ikitsigisut taava ukiorpassuunngitsut qaangiuppata kinguneqarnerlorujussualersinnaavoq.

Kapuutinut ersinerup takutippaatigut “nutaarsiassat eqqunngitsut” nunarsuarmi takusassaajuaannartut, allaallu ilaannikkkut ajorluinnartumik kinguneqartartut. Qanga kapuut MFR  autismeqalersitsisartoq tusarsaaleraluarpoq. Misissuinermili tunngavigineqartut ima ikitsigisimapput allaat tutsuviginartutut taaneqarsinnaanani aamma ukiualunnguit ingerlareersullu paasineqarpoq ilumuunngitsoq. Kisianni ukiut 60-t qaangiutereeraluartut Nuummi kapitittartut ikittuararsuupput suli.

Tassunga aalisarneq assersuutinngitsoorsinnaanngilara. Ukiut qulit ingerlanerini Qeqertarsuup Tunuani qaleralinniarneq ajutooraluttualersoq oqaatigineqartuarpoq. Tamannanu piviusunnguliivippoq. Kapuuineq iluatsinngippat aalisakkat toqorartut takunavianngilagut kisianni takulerumaarpagut inuit toqorartut.

Aaqqiissutissani pitsaanerpaassaaq qaammarsaaneq, angajoqqaat paasitittariaqarpagut meeqqatik ulorianartorsiortikkaat kapitinngikkunikkit aamma akiuussutissamik kapuinermut ilaanngikkunik meeqqat allat qanoq ulorianartorsiortitsigigaat.

Iluaqutaanngippat akiuussutissanik kapuuisarneq inatsisitigut peqqussutinngortittariaqassavarput. Social Liberalitut inunnik pinngitsaaliinissaq annereqaara. Iliuuseqanngikkuttali takkuttussaq ersinarpallaaqaaq.

 

Michael Rosing, Suleqatigiissitsisut